2 KORINICA 11
11
Ni ra sa beci Paula ko ira nai talatala vakailasu, sa tukuni koya, ni sa dauvunau ka sega ni voli kina; ka sa levu sara na nona cakacaka, a sa ka vakaidina na ca sa vosota ko koya, 133.
1Au sa vaka mo dou vosoti au mada ga niu lialia vakalailai: io, dou vosoti au mada ga. 2Niu sa lomani kemudou sara me vaka na loloma ni Kalou: niu a musuki kemudou vua e dua me watimudou, meu vakaraitaki kemudou vei Karisito e dua na goneyalewa savasava. 3Ia kau sa rere, de dua na ka ena vakacalai kina na lomamudou mai na kena dina kei na kena savasava vei Karisito, me vaka ka vakacalai Ivi eliu na gata e na nonai lawaki ca. 4Ia sa dodonu ga mo dou vosoti koya sa qai lako mai, kevaka sa vunautaka e dua tani na Jisu, o koya keitou sa sega ni vunautaka eliu, se sa yaco vei kemudou e dua tani na Yalo, o koya sa sega ni yaco vei kemudou eliu, se dua tani nai tukutuku-vinaka, dou a sega ni vakabauta eliu.
5Niu sa vakasama niu sa sega sara ni uasivi sobu vei iratou nai apositolo eratou sa uasivi cake. 6Ia kevaka kau sa sega ni matai ni vosa, sa tu ga vei au na vuku; ia keitou a vakaraitaki sara vei kemudou e na ka kecega. 7Au sa qai cala beka niu sa vakamalumalumutaki au mo dou vakalevutaki kina, niu sa vunautaka vei kemudou nai tukutuku-vinaka ni Kalou ka sega ni voli kina? 8Au a vakadravudravuataki ira nai soqosoqo lewe ni lotu tani eso, niu sa voli vei ira, meu ia kina na cakacaka vei kemudou. 9Ia niu a tiko vakadravudravua kei kemudou, au a sega ni vakaogai koya e dua: ni ra sa soli ka me rauti au e na noqu dravudravua ko ira na veiwekani era a lako mai Masitonia: ia e na ka kecega au a vakaraici au meu kakua ni vakaogai kemudou, kau na vaka tikoga kina. 10Me vaka kau sa dina e na mata i Karisito, ena sega sara ni tarovi na noqu vosa doudou e na ka oqo e na yasayasa vaka-Akaia. 11E na vuku ni cava? niu sa sega li ni lomani kemudou? Sa kila na Kalou. 12Ia na ka kau a cakava, au na cakava tikoga, meu muduka tani kina na vuna maivei ira era gadreva na vuna: me ra kune ga me ra vakataki keitou e na ka era sa vakalevulevui ira kina.
13Ni ra sai apositolo vakailasu ko ira sa vakaoqo, era sa tamata daucakacaka vakaveivakaisini, era sa vakamataliataki ira me rai apositolo kei Karisito. 14Ia ka sa sega ni ka e veivakurabuitaki oqo; ni sa vakamataliataki koya ko Setani me agilose ni rarama. 15O koya oqo sa sega kina ni ka levu me vakamataliataki talega ko ira na nonai talatala me ra vakataki ira nai talatala ni valavala dodonu: ia na kedrai tinitini ena vaka na nodra cakacaka.
16Au sa kaya tale, Me kakua na tamata me nanuma kau sa lialia; ia kevaka sa nanuma vakakina e dua, mo dou vosota ga na noqu lialia, meu vakalevulevui au talega vakalailai. 17A ka kau sa kaya, au sa sega ni kaya me vaka na ka ni Turaga, me vaka ga na ka lialia, niu sa vakalevulevui au e na vosa doudou oqo. 18Ni ra sa lewe vuqa era vakalevulevui ira vakayago ga, koi au talega kau na vakalevulevui au. 19Ni dou sa reki mo dou vosoti ira era sa lialia, ni dou sa vuku. 20Ni dou sa vosota ga, kevaka sa vakabobulataki kemudou e dua, kevaka sa vakadravudravuataki kemudou e dua, kevaka sa lawakitaki kemudou e dua, kevaka e dua sa vakalevulevui koya, kevaka sa sabica na matamudou e dua. 21Au sa vosa, me vaka kau sa beci, me vaka keitou a malumalumu. Ia kevaka e dua sa doudou e na dua na ka, (au sa vosa vakalialia,) au sa doudou vaka talega kina. 22O ira beka era sa Iperiu? au sa vakakina. Era sa luve i Isireli? au sa vakakina. Era sa kawa i Eparaama? au sa vakakina. 23Era sai talatala i Karisito? (au sa vosa me vaka na lialia,) au sa uasivi cake; au a daucakacaka vakalevu cake, au a yaviti vakalevu sara, au a tiko vakavuqa cake e na vale ni veivesu, au a voleka ni mate vakavuqa. 24Sa yaviti au vakalima ko ira na Jiu a sa tau na kuita vakayatolusagavulu ka ciwa. 25Au a warolaki vakatolu, au a vakaviriki vakadua e na vatu, e na noqu veisokoyaki au a mate vakatolu, au a tiko e na wai titobu ka bogi dua ka siga dua; 26au a veilakoyaki voli vakavuqa, au a ca e na veiuciwai, au a ca maivei ira na daubutako, au a ca maivei ira na kai noqu, au a ca maivei ira era sa sega ni lotu, au a ca e loma ni koro, au a ca e loma ni veikau, au a ca e loma ni wasawasa, au a ca maivei ira na veiwekani vakailasu; 27au a dauoca ka daurarawa, au a dauyadra vakavuqa, au a dauviakana ka dauviagunu, au a daulolo vakavuqa, au a liliwa ka luvawale. 28Ia ka sa sega ni wili na veika sa vo, oqori talega sa bitaki au e na veisiga, na daunanumi ira kecega na veisoqosoqo lewe ni lotu.
29O cei beka sa malumalumu kau sa sega ni malumalumu? ko cei sa vakacalai, kau sa sega ni lomakatakata kina? 30Kevaka e dodonu meu vakalevulevui au, au na vakalevulevui au e na vuku ni noqu malumalumu. 31A Kalou na Tama ni noda Turaga ko Jisu, o koya sa vakarokorokotaki ka tawa mudu, sa kila niu sa sega ni vosa lasu. 32Mai Tamasiko, na Kovana nei Arita na tui sa vakatawa na koro ko Tamasiko, ni sa via tauri au; 33ia kau sa tukuci sobu e loma ni dua na sova, mai na katuba e cake e taudaku ni bai, ka bula kina mai na ligana.
Currently Selected:
2 KORINICA 11: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
