2 KORINICA 10
10
Sa vunauci ira nai talatala vakailasu ni ra sa beci koya e na vuku ni nona malumalumu vakayago; ia ka sa levu na nona kaukauwa vakayalo, 118.
1Ia koi au ko Paula, kau sa masuti kemudou e na yalomalumalumu kei na yalomalua i Karisito, oi au sa malumalumu niu sa tiko vei kemudou, ia kau sa doudou vei kemudou niu sa tiko tani; 2io, kau sa vakamasuti kemudou meu kakua ni doudou niu sa tiko vata e na kaukauwa, kau sa nanuma meu doudou kina vei kemudou eso, o ira sa vakasami keitou ni keitou sai valavala me vaka na ka vakayago. 3Sa dina ga sa vakayago na neitou bula, ia keitou sa sega ni vala me vaka na ka vakayago: 4(ni sa sega ni ka vakayago na neitou i yaragi, ia sa kaukauwa ga e na vuku ni Kalou me talaraki kina na bai ni valu kaukauwa:) 5sa talaraka sobu kina na veinanuyaki, kei na ka cecere kecega sa vakalevulevui me vorata na vuku ni Kalou, ka sa vakamalumalumutaka na nanuma kecega me talairawarawa vei Karisito; 6ia keitou sa vakarau tu me sauma kecega na talaidredre, ni na vakayacori dina na nomudou talairawarawa.
7Dou sa lewa beka me vaka na ka sa rairai? Kevaka e dua sa vakadinata ni sa nei Karisito ko koya, me nanuma talega oqo ko koya, me vaka sa nei Karisito ko koya, keitou sa nei Karisito vaka talega kina. 8Ia kevaka kau sa dokai au vakalevu cake e na vuku ni lewa (sa solia mai vei keitou na Turaga, mo dou vakatataki cake kina, ia ka sega ga mo dou vakarusai kina,) au na sega ni vakamaduataki. 9Meu kakua ni vaka ni kau sa via vakarerei kemudou e na noqu i vola; 10ni ra sa kaya, Sa bibi ka kaukauwa na nonai vola; ia sa malumalumu ga ni sa tiko vei keda, ka sa ka wale na nona vosa; 11me qai nanuma na ka oqo, ko koya sa vakakina, ni rau na tautauvata ga, na neitou vosa e nai vola ni keitou sa tiko tani, kei na neitou i valavala ni da sa tiko vata ga. 12Ni keitou sa sega ni doudou me wiliki keitou vata kei ira eso, se vakatautauvatataki keitou kei ira era sa dautukuni ira vakai ira; ia ko ira ni ra sa vakarauti ira vakai ira, ka vakatautauvatataki ira vakai ira, era sa sega ni vuku. 13Ia koi keitou, keitou na sega ni vakalevulevui keitou e na veika sa uasivita nai vakarau, me vaka ga nai vakarau ni yalayala sa vota vei keitou na Kalou, ai vakarau me keitou yaco dina vei kemudou. 14Ni keitou sa sega ni uasivita na neitou i yalayala, me vaka keitou sa sega ni yacovi kemudou: ni keitou sa yacovi kemudou talega e nai tukutuku-vinaka kei Karisito: 15keitou sa sega ni dokai keitou e na veika sa uasivita nai vakarau, e na vuku ni nodra cakacaka na tamata tani; ia keitou sa nuinui ga, ni sa vakalevutaki tiko na nomudou vakabauta, keitou na vakalevulevui kina vei kemudou me vaka na neitou i yalayala me keitou uasivi, 16me keitou vunautaka nai tukutuku-vinaka e na yasana sa uasiviti kemudou, me keitou kakua ni vakalevulevui keitou e na vuku ni yalayala ni tamata tani, e na veika sa vakarau tu vei keitou. 17Ia ko koya sa vosa doudou, me vosa doudou e na vuku ni Turaga. 18Ni sa sega ni vakabau ko koya sa tukuni koya, sa vakabau ga ko koya sa tukuna na Turaga.
Currently Selected:
2 KORINICA 10: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
