1 TIMOCI 2
2
Sa tukuna ko koya ni sa vinaka me ia na masulaki ira na tamata kecega, 18. Sa tukuna na ka e kilikili kei ira na yalewa, 915.
1O koya oqo kau sa vakarota kina, me ia mada eliu na masumasu, na kerekere, na veimasulaki, na vakavinavinaka, e na vukudra na tamata kecega: 2e na vukudra na tui, kei ira kecega era turaga; me da tiko vinaka kina ka vakacegu, me da ia nai valavala kece sa vakalotu ka kilikili: 3Sa dodonu oqo, ka vinaka talega e na mata ni Kalou na nodai Vakabula; 4o koya sa vinakata me bula na tamata kecega, ka mai kila sara nai vakavuvuli dina. 5Ni sa dua bauga na Kalou, ka dua bauga na dauveisorovaki, e na maliwa ni Kalou kei ira na tamata, io, na tamata ko Jisu Karisito; 6o koya sa soli koya me kedrai voli na tamata kecega, a ka me tukuni e na kena gauna. 7Oqori kau a lesi kina meu dauvunautaka meu kenai apositolo talega, (au sa vosa dina, au sa sega ni lasu;) meu nodra i vakavuvuli na veimatanitu e na vakabauta kei nai vakavuvuli dina.
8O koya oqo kau sa vinakata kina me masu ko ira na tagane e na yasana kecega, ni ra sa dodoka cake na liga savasava, ka me sega na cudru kei na veiba.
9Me vakaisulu vaka talega kina ko ira na yalewa e nai sulu e kilikili, ni ra sa lokomi ka yalomatua: me kakua ni tali na drau ni uludra, me kakua ni vakoula, se vakamata-ni-civa, se vakai sulu talei: 10ia (me vaka ga sa kilikili kei ira na yalewa era kaya era sa lotu) e nai valavala vinaka. 11Me tiko lo na yalewa ka me vakatavulici, ka vakamalumalumutaki koya vakalevu. 12Ia kau sa sega ni laiva na yalewa mei vakavuvuli, se viavialewa vei koya na tagane, ka me tiko lo ga. 13Ni sa buli taumada ko Atama, ka muri ko Ivi. 14A sa sega ni temaki ko Atama; na yalewa ga sa temaki, ka sa talaidredre kina. 15Ia ena vakabulai ni sa vakasucu gone, kevaka era sa tu dei e na vakabauta, kei na loloma, kei na yalosavasava, kei na yalomatua.
Currently Selected:
1 TIMOCI 2: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
