1 TIMOCI 1
1
Sa loloma yani vei Timoci ko Paula, a sa tukuna na ka sa laivi koya kina mai Efeso, 14. Sa tukuna na ka sa yaga kina na vunau i Mosese, 511. Sa tukuni koya ko Paula, 1217. Sa vakarota vei Timoci, a sa tukuni Imeneo kei Alekisada, 1820.
1Koi au ko Paula, nai apositolo i Jisu Karisito, e nai lesilesi ni Kalou na nodai Vakabula, ko Jisu Karisito, na vu ni nodai nuinui; 2vei Timoci, na luvequ dina e na vakabauta: Me sa nomu na loloma, na yalololoma, na vakacegu, mai vua na Kalou ko Tamada, kei na noda Turaga ko Karisito Jisu.
3Me vaka kau a vakamasuti iko mo tiko ga mai Efeso, niu a lako ki Masitonia, mo vakarota kina vei ira eso me ra kakua ni vakatavulica nai vakavuvuli tani, 4me ra kakua talega ni dinata nai tukutuku wale kei nai vola ni kawa tawa mudu, sa tubu kina na veileti, ka sega ga na veivakatataki cake e na ka ni Kalou, o koya sa yaco e na vakabauta, au sa kitaka tale oqo.
5Ia na ka sa nakiti e na vunau na loloma mai na yalo savasava, kei na lewa-eloma vinaka, kei na vakabauta tawa vakailasu; 6a sa cala maikina ko ira eso, ka sa lesu tani me ra ia na veileti walega; 7a ra sa gadreva me ra vu-ni-vunau: a ra sa sega ni kila na ka era sa dautukuna, se na ka era sa dauvakadinadina kina. 8Ia eda sa kila sa ka vinaka na vunau, kevaka sa muria na tamata me vaka na kenai valavala: 9ni da sa kila sa sega ni bale na vunau vei ira na tamata yalododonu, vei ira ga era sa sega ni muria na vunau, ka sa dautalaidredre, vei ira era sa sega ni lotu, a ra sa dauivalavala ca, vei ira era sega ni yalosavasava, a ra sa vakasisila ga; vei ira era sa labata na tamadra, a ra sa labata na tinadra, a ra sa dauveiraravui, 10vei ira era sa daudara, vei ira era sa veimoceri vakatagane, vei ira era sa daubutakoca na tamata, vei ira era sa daulasu, vei ira era sa daububului vakailasu, kei na ka tani kecega sa sega ni vaka nai vakavuvuli vinaka: 11me vaka nai tukutuku-vinaka vakaidina nei koya na Kalou daumaka, kau sa lesi kina meu vunautaka.
12Ia kau sa vakavinavinaka vei Karisito Jisu na noda Turaga, o koya sa vakaukauwataki au, ni sa nanumi au niu sa lomadina, a sa lesi au ki na cakacaka vakaitalatala; 13oi au eliu na dauvosavakacaca, kei na dauvakacaca, kei na dauveivakasewasewani: ia kau sa lomani, niu a kitaka e na lialia kei na tawa vakabauta, 14ia ka uasivi cake sara na loloma ni noda Turaga, kau a vakabauti Karisito Jisu kina ka lomana. 15Sa dina na vosa, a sa yaga me vakabauti vakalevu, ni sa lako mai ki vuravura ko Jisu Karisito me vakabulai ira na tamatai valavala ca; ia koi au, kau sa uasivi cake vei ira. 16Ia e na vuku ga ni ka oqo kau a lomani kina, me vakaraitaka ko Jisu Karisito vei au ka uasivi cake na vosota vakalevu sara, meu i vakarau vei ira era na vakabauti koya emuri me ra bula tawa mudu kina. 17Ia, vua na Tui tawa tubu, sa sega ni mate rawa, sa sega ni rairai, na Kalou vuku duaduaga, me ia na vakarokoroko kei na vakadokadokai ka sega ni mudu. Emeni.
18Ai vakaro oqo kau sa solia vei iko, na luvequ Timoci, me vaka na parofisai ko a tukuni kina eliu, mo ia kina na veivala vinaka; 19mo taura matua na vakabauta, kei na lewa-eloma vinaka: oqori era sa biuta eso, a sa kasa kina na nodra vakabauta ka mate: 20sa vakaoqo ko Imeneo kei Alekisada, koi rau kau sa solia vei Setani, me rau kila kina me rau kakua ni dauvosavakacaca.
Currently Selected:
1 TIMOCI 1: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
