1 CESALONAIKA 5
5
Sa tukuna na siga ni lewa, a sa vakarota vei ira me ra gumatua sara e nai valavala vinaka kecega, a sa qai masulaki ira, ka sa tinia na nonai vola, 128.
1Ia sa sega ni yaga meu volavola vei kemudou, na veiwekani, meu tukuna na veigauna kei na veiyabaki. 2Ni dou sa kila dina sara vakataki kemudou ni na lako mai na siga ni Turaga, me vaka na daubutako e na bogi. 3Ni ra kaya tiko, Sa mai vakacegu ka tiko vinaka; ena qai yaco vakidacala vei ira na rusa, me vaka na yaluma vua na yalewa sa bukete; a ra na sega ni dro tani rawa. 4Io koi kemudou na veiwekani, dou sa sega ni tiko e na butobuto, me yacovi kemudou kina na siga ko ya me vaka na daubutako. 5Oi kemudou kecega na gone ni rarama, kei na gone ni siga: eda sa sega ni gone ni bogi, se gone ni butobuto. 6O koya oqo me da qai kakua ni moce, me vakataki ira na tani; me da vakatawa ga ka yalomatua. 7Ia ko ira era daumoce era sa moce e na bogi; kei ira era daumateni era sa mateni e na bogi. 8Ia koi keda, eda sa gone ni siga, me da yalomatua, me da vauca na vakabauta kei na loloma mei sasabai ni lomasereda: kei na vakanuinuitaka na bula, mei vakaruru ni uluda. 9Ni sa sega ni lesi keda na Kalou me da rusa me da rawata ga na bula e na vuku ni noda Turaga ko Jisu Karisito; 10o koya ka mate e na vukuda, me da bula vata kaya, se da yadra se da moce. 11O koya oqo mo dou qai ia na veivakacegui vakai kemudou, ka veivakatataki cake vakai kemudou, me vaka dou sa kitaka tiko.
12Ia keitou sa vakamasuti kemudou, na veiwekani, mo dou kilai ira era sa daucakacaka vei kemudou, ka lewai kemudou e na Turaga, ka vakavulici kemudou; 13ka mo dou vakarokorokotaki ira, ka lomani ira vakalevu sara, e na vuku ni nodra cakacaka. Ka mo dou veivinakati vakai kemudou.
14Ia keitou sa vakarota vei kemudou, na veiwekani: mo dou vunauci ira era sa talaidredre, vakacegui ira era sa yalolailai, vukei ira era sa malumalumu, dauvosoti ira kecega na tamata.
15Raica me kakua e dua sa veisausaumitaka na ca vua e dua; ka mo dou dui muria tikoga na ka e vinaka vei kemudou yadua, vei ira talega na tamata kecega.
16Dou reki tikoga. 17Dou masu tikoga ka kua ni mudu. 18Dou ia na vakavinavinaka e na vuku ni ka kecega: ni sa loma ni Kalou oqo vei kemudou e na vuku i Karisito Jisu.
19Dou kakua ni bokoca na Yalo Tabu. 20Dou kakua ni beca na vosa ni parofisai. 21Vakatovolea na ka kecega; taura matua na ka e vinaka. 22Qarauni kemudou mai nai valavala kecega sa ca.
23Ia me vakasavasavataki kemudou sara na Kalou ni veivakacegui; ka me sa maroroi taucoko, me kakua sara ni cala, na yalomudou kei na lomamudou kei na yagomudou, ka yacova na siga ena lako tale mai kina na noda Turaga ko Jisu Karisito. 24Sa dina ko koya sa kacivi kemudou, ena kitaka talega ko koya.
25Oi kemudou na veiwekani, masulaki keitou. 26Dou loloma vei ira kecega na veiwekani ka dou veireguci e na yalosavasava. 27Au sa vakarota vei kemudou e na yaca ni Turaga, me wili nai vola oqo vei ira kecega na veiwekani yalosavasava.
28Me nomudou na loloma ni noda Turaga ko Jisu Karisito. Emeni.
Currently Selected:
1 CESALONAIKA 5: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
