2 CESALONAIKA 1
1
Sa vakacegui ira ko Paula, ni sa tukuna vei ira na lewa dodonu ni Kalou, 112.
1Oi keitou ko Paula, kei Silivenuse, kei Timoci, ki nai soqosoqo lewe ni lotu mai Cesalonaika era sa tu vua na Kalou ko Tamada kei na Turaga ko Jisu Karisito: 2Me nomudou na loloma, kei na vakacegu, mai vua na Kalou ko Tamada kei na Turaga ko Jisu Karisito.
3Sa kilikili kei keitou me keitou ia tikoga na vakavinavinaka vua na Kalou e na vukumudou, na veiwekani, ni sa dodonu ga oqori, ni sa tubu vakalevu sara na nomudou vakabauta, a sa uasivi cake na nomudou veilomani vakataki kemudou yadua; 4ia keitou sa vakacaucautaki kemudou vei ira na veisoqosoqo lewe ni lotu ni Kalou, e na vuku ni nomudou lomadei kei na vakabauta e na nomudou vakacacani kecega, kei na vakararawataki dou sa vosota: 5oqo nai vakatakilakila ni lewa dodonu ni Kalou, mo dou vakabau kina mo dou yaga me rawata na matanitu ni Kalou, o koya dou sa vakararawataki talega kina: 6ni sa dodonu vua na Kalou me saumi ira vakararawa era sa vakararawataki kemudou; 7ia vei kemudou talega sa vakararawataki, me vakacegui vata kei keitou, ni na vakaraitaki mai lomalagi na Turaga ko Jisu kei ira vata kaya na nona agilose kaukauwa, 8e na yameyame ni bukawaqa, me cudruvi ira era sa sega ni kila na Kalou, a sa sega ni vakabauta nai tukutuku-vinaka ni noda Turaga ko Jisu Karisito: 9sa nodra cudruvi na veivakarusai tawa mudu mai na mata ni Turaga, mai na nona kaukauwa vakaidina talega; 10ni na lako mai ko koya me ra vakarokorokotaka ko ira na nona tamata yalosavasava, ka me dokai koya ko ira kecega era sa vakadinata, e na siga ko ya, (ni sa vakadinati na neitou i tukutuku vei kemudou.)
11O koya oqo keitou sa masulaki kemudou tikoga; me vakabauti kemudou na neitou Kalou mo dou yaga me rawata na ka dou a kacivi kina, ka me vakayacora sara e na kaukauwa na gagadre vinaka kecega, kei na cakacaka ni vakabauta: 12me vakacaucautaki kina na yaca ni noda Turaga ko Jisu Karisito e na vukumudou, koi kemudou talega e na vukuna, me vaka na loloma ni noda Kalou kei na Turaga ko Jisu Karisito.
Currently Selected:
2 CESALONAIKA 1: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific