1 SAMUELA 5
5
Era sa kauta na kato ni Kalou ki na bure kalou i Tekoni ko ira na kai Filisitia; a sa ca kina ko Tekoni, 1-5. Sa yaviti ira na Kalou e na mate levu; a ra sa qai bose me kau tani na kato, 6-12.
1Ia era sa taura na kato ni Kalou ko ira na kai Filisitia, ka kauta tani mai Epenisa ki Asitoti. 2Ia ni ra sa kauta na kato i Jiova na kai Filisitia, era sa kauta mai ki na bure kalou i Tekoni, ka vakatikora voleka vei Tekoni. 3Ia ni ra sa sou e na mataka na kai Asitoti, raica, sa bale vakatoboicu ki na qele ko Tekoni, e na mata ni kato i Jiova. A ra sa kauti Tekoni, ka vakatura tale e na nonai tutu. 4Ia ni ra sa sou e na mataka e nai karua ni siga, raica, sa bale vakatoboicu ki na qele ko Tekoni e na mata ni kato i Jiova, a sa muduki tu e nai lago na ulu i Tekoni kei na qeteqete ni ligana ruarua, sa vo walega vua na yago vakaika. 5O koya oqo era sa sega ni daubutuka kina nai lago ni bure kalou i Tekoni mai Asitoti, ko ira na bete i Tekoni kei ira kecega sa curu ki na bure kalou i Tekoni, ka yacova na gauna oqo.
6A sa bikai ira sara na kai Asitoti na liga i Jiova, a sa vakacacani ira, ka yaviti ira e na somunadara, io, ko Asitoti kei na kena veiyasana. 7Ia ni ra sa raica na kai Asitoti ni sa vakaoqo, era sa kaya, me kakua ni tiko vei keda na kato ni Kalou ni Isireli; ni sa bikai keda vakararawa na ligana, kei Tekoni talega na noda kalou. 8A ra sa talaki kina ka vakasoqona vata na nodra turaga kecega na kai Filisitia, ka ra kaya, A cava me da kitaka e na vuku ni kato ni Kalou ni Isireli? A ra sa kaya, Me kau voli yani ki Kaca na kato ni Kalou ni Isireli. A ra sa kauta voli yani na kato ni Kalou ni Isireli. 9Ia ni sa oti na nodra kauta voli, sa qai vakacacana vakalevu sara na koro ko ya na liga i Jiova; a sa yaviti ira ko koya na lewe ni koro, ko ira na lelevu kei ira na lalai, a sa tubu vei ira na somunadara.
10Ia era sa vakauta yani kina na kato ni Kalou ki Ekironi. Ia ni sa yaco na kato ni Kalou ki Ekironi, era sa qoqolou na kai Ekironi, ka kaya, Era sa kauta voli mai vei keda na kato ni Kalou ni Isireli, me vakamatei keda kei ira na kai noda. 11A ra sa talaki ka vakasoqona vata na nodra turaga kecega na kai Filisitia, ka ra kaya, Dou kauta tani na kato ni Kalou ni Isireli, ka me lesu tani ki na kena tikina, ia me kakua ni vakamatei keda kei ira na kai noda: ni sa dua na veivakacacani levu e na koro taucoko: sa tau bibi sara maikea na liga i Jiova. 12Ia ko ira na tamata ka sega ni mate era sa yaviti e na somunadara: a sa rogo cake ki lomalagi na nodra qoqolou na lewe ni koro.
Currently Selected:
1 SAMUELA 5: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
