1 SAMUELA 4
4
Sa mokuti ira na Isireli ko ira na kai Filisitia, 1,2. Sa kauta mai na kato ni veiyalayalati ko ira na Isireli, a sa rere kina ko ira na kai Filisitia, 3-9. A ra sa moku tale, a ra sa kovea na kato ko ira na kai Filisitia, 10,11. Sa la'ki tukutuku e dua, a sa mate ko Ilai ni sa rogoca, 12-18. Sa vakasucu ka qai mate na wati i Finiase, 19-22.
1A ra sa lako yani ko ira na Isireli me ra veivala kei ira na kai Filisitia, a ra sa la'ki tiko mai Epenisa, a ra sa la'ki tiko mai Efeki na kai Filisitia. 2A ra sa tuvai ira vakaivalu ko ira na kai Filisitia me ra vala kei ira na Isireli: ia ni ra sa vala, sa mokuti ira na Isireli ko ira na kai Filisitia: a ra sa mokuti ira nai valu mai na veiwere, e le va beka na udolu na tamata.
3A ra sa lako mai ki nai tikotiko ko ira na tamata, a ra sa kaya ko ira na nodra qase na Isireli, A cava sa mokuti keda kina edaidai ko Jiova e na matadra na kai Filisitia? me da kauta mai Sailo ki vei keda na kato ni veiyalayalati i Jiova, me yaco mai ki na keda maliwa, ka vakabulai keda mai na ligadra na noda meca. 4Ia sa talaki ki Sailo ko ira na tamata, me ra kauta maikea na kato ni veiyalayalati i Jiova ni lewe vuqa, o koya sa tiko e na tadrua ni Jerupi: a rau sa tiko maikea kei na kato ni veiyalayalati ni Kalou koi rau na luve i Ilai, ko Ofinai kei Finiase. 5Ia ni sa yaco mai ki nai tikotiko na kato ni veiyalayalati i Jiova, sa kaila ko ira kecega na Isireli e na kaila levu, a sa yavala kina na vanua. 6Ia ni ra sa rogoca ko ira na kai Filisitia na rorogo ni kaila, era sa kaya, A cava nai balebale ni kaila levu oqo e na nodra i tikotiko na Iperiu? Era sa qai kila ni sa kau mai na kato i Jiova ki nai tikotiko. 7A ra rere na kai Filisitia, ni ra sa kaya, Sa lako mai na Kalou ki nai tikotiko: a ra sa kaya, Isa! koi keda! ni sa sega ni vakaoqo eliu: 8Isa! koi keda! o cei ena vakabulai keda mai na ligadra na kalou qaqa oqo? o ira oqo na kalou era a vakacataki ira na kai Ijipita e na mate ca kece mai na veikau. 9Dou qaqa ka valavala vakatagane, na kai Filisitia, mo dou kakua ni qali vei ira na Iperiu, me vaka era a qali vei kemudou: ka dou i valavala vakatagane, ka ia nai valu.
10A sa ia nai valu ko ira na kai Filisitia, a sa moku ko ira na Isireli, a ra sa dro ko ira yadua ki na nona vale laca: a sa ka levu sara na moku; a sa mate vei ira na Isireli e le tolu na oba era taubale. 11A sa kovei na kato ni Kalou; a rau sa vakamatei ko Ofinai kei Finiase na luve i Ilai.
12A sa dua na tamata vei ira na Penijamini sa cici mai nai valu, a sa lako mai ki Sailo e na siga ko ya, a sa kadresu na nonai sulu, a sa kabuya tu na uluna e na qele. 13Ia ni sa lako mai, raica, sa tiko vakatawa ko Ilai e na dua nai tikotiko e na bati ni sala, ni sa ririkotaka na kato ni Kalou na yalona. Ia ni sa lako mai na tamata ka tukuna e na koro, sa qoqolou na koro taucoko. 14A sa rogoca na rorogo ni qoqolou ko Ilai, a sa kaya, A cava nai balebale ni ue oqo? A sa lako vakatotolo mai na tamata, ka tukuna vei Ilai. 15A sa ciwasagavulu ka walu na yabaki i Ilai; a sa buawa na matana ka sa sega ni rai rawa. 16A sa kaya vei Ilai na tamata, Sai au ka lako mai nai valu, ka'u a dro edaidai mai nai valu. A sa kaya ko koya, A cava na ka sa yaco, na luvequ. 17A sa vosa mai ko koya sa mai tukutuku, ka kaya, Sa dro ko ira na Isireli e matadra na kai Filisitia, a sa dua talega na moku levu vei ira na tamata, a sa mate talega koi rau na luvemu, ko Ofinai kei Finiase; a sa kovei na kato i Jiova. 18Ia ni sa cavuta tiko ko koya na kato ni Kalou, sa qai bale sobu vakatadrai cake ko koya mai nai tikotiko sa voleka ki na matamata-ni-koro, a sa ramusu na domona, ka sa mate ko koya; ni sa qase ko koya, ka tamata bibi. A sa lewai ira oti na Isireli ko koya ka yabaki vasagavulu.
19Ia sa bukete na vugona, na wati i Finiase, ka sa voleka ni vakasucu: ia ni sa rogoca ko koya nai rogorogo ni sa kovei na kato ni Kalou, ka sa mate na vugona kei na watina, sa cuva sobu ko koya ka vakasucu; ni sa qai taratara ko koya. 20Ia ni sa voleka ni ciba ko koya, sa kaya ko ira na yalewa era tiko vata kaya, Mo kakua ni rere; ni ko sa vakasucuma e dua na gonetagane. A sa sega ni vosa mai ko koya, ka sega ni vakarorogo. 21A sa vakayacana na gone ko koya ko Ikapoti [Sa yali nai ukuuku], ni sa kaya, Sa qai takali vei ira na Isireli na nodra i ukuuku: ni sa kovei na kato ni Kalou, e na vuku talega ni vugona kei na watina. 22Sa kaya talega ko koya, Sa takali vei ira na Isireli na ka era lagilagi kina; ni sa kovei na kato ni Kalou.
Currently Selected:
1 SAMUELA 4: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
