1 TUI 8
8
A so levu ni vakacuru vale ni soro, 1-11. Sa vosavakalougatataki ira na tamata ko Solomoni, 12-21,54-61. A nona masu, 22-53. A nonai soro, 62-64. A nona so levu, 65,66.
1Sa qai vakasoqoni ira vata na nodra qase na Isireli ko Solomoni, kei ira kecega na turaga ni veimataqali, kei ira sa liu vei ira na nodra qase na Isireli, vei Solomoni na tui ki Jerusalemi, me ra kauta cake na kato ni veiyalayalati i Jiova mai na koro i Tevita, ko ya ko Saioni.
2A ra sa soqoni vata vei Solomoni na tui ko ira kecega na Isireli, ki na so levu sa ia e nai kavitu ni vula ko Icanimi. 3A ra sa lako kece mai na nodra qase na Isireli, a ra sa laveta cake na kato ko ira na bete. 4A ra sa kauta cake na kato i Jiova, kei na vale ni veitavaki, kei nai yaya tabu kecega ka tu e na Vale tabu; a ra sa kauta cake ko ira na bete kei ira na Livai. 5Ia ko Solomoni na tui, kei na nodra i soqosoqo taucoko na Isireli era soqoni vata vua, era sa tiko vata kaya e na mata ni kato, ka vakacabora tiko na sipi kei na pulumokau, sa sega ni tukuni rawa se wili rawa, e na vuku ni kedra vuqa. 6A sa kauta ko ira na bete na kato ni veiyalayalati i Jiova ki na kena tikina, ki na loqi ni Vosa e na Vale, ki na tikina tabu sara, ki ruku ni tabadrau na jerupi. 7Ni sa vakatetaba koi rau na jerupi e na tikina sa tu kina na kato; a rau sa vakaruruga na kato kei na kenai vua koi rau na jerupi. 8A ra sa ucuna nai vua me raici rawa na mua ni vua, mai na tikina tabu e na mata ni loqi ni Vosa, a sa sega ni raici e tautuba; ka sa toka maikea ka yacova na siga oqo. 9Sa sega na ka e loma ni kato, na vatu raraba ga ruarua ka viria kina ko Mosese mai Orepi, ni sa veiyalayalati ko Jiova kei ira na Isireli, ni ra sa lako tani mai na vanua ko Ijipita.
10Ia ni ra sa curu yani na bete mai na tikina tabu, sa qai vakasinaita na vale i Jiova na o, 11a ra sa sega ni tu rawa na bete me cakava na nodra i tavi, e na vuku ni o; ni sa vakasinaita na vale i Jiova nai ukuuku i Jiova.
12Sa qai kaya ko Solomoni, Sa tukuna ko Jiova ni na tiko ko koya e na butobuto loaloa. 13Au sa tara vakaidina e dua na vale mo ni tiko kina, e dua na tikina mo ni tiko kina ka sega ni mudu.
14A sa rai voli yani na tui, ka vosavakalougatataki ira kecega na nodra i soqosoqo na Isireli: a ra sa wavu tu na nodra i soqosoqo taucoko na Isireli: 15A sa kaya ko koya, Me vakavinavinakataki ko Jiova na nodra Kalou na Isireli, o koya ka vosa vei Tevita na tamaqu, a sa vakayacora e na ligana, ka vaka, 16Mai na siga ka'u a kauti ira tani kina na noqu tamata na Isireli mai Ijipita, au a sega ni digitaka e dua na koro e na nodra mataqali kecega na Isireli me tara e dua na vale, me tiko maikea na yacaqu; ia ka'u a digitaki Tevita ga me turaga vei ira na noqu tamata na Isireli. 17A sa lomana dina ko Tevita na tamaqu me tara e dua na vale ki na yaca i Jiova na nodra Kalou na Isireli. 18A sa kaya ko Jiova vei Tevita na tamaqu, Sa vinaka vei iko ni sa tu e lomamu mo tara e dua na vale ki na yacaqu: 19ia ko na sega ni tara na vale; a luvemu ga, o koya ka lako mai na tolomu, ena tara ko koya na vale ki na yacaqu. 20A sa vakataudeitaka ko Jiova na nona vosa ka vosataka ko koya, ni'u sa tubu cake me kenai sosomi kei Tevita na tamaqu, ia ka'u sa tiko e nai tikotiko vakaturaga ni Isireli, me vaka ka yalataka ko Jiova, ia ka'u sa tara oti na vale ki na yaca i Jiova na nodra Kalou na Isireli. 21Au sa cakava talega maikea na tikina me tu kina na kato, sa tu kina na veiyalayalati i Jiova, ka cakava ko koya kei ira na noda qase, ni sa kauti ira tani mai na vanua ko Ijipita.
22A sa tu ko Solomoni e na mata ni cabocabo-ni-soro i Jiova e matadra na nodra i soqosoqo taucoko na Isireli, a sa dodoka yani na ligana ruarua vaka ki lomalagi: 23a sa kaya ko koya, Kemuni Jiova na nodra Kalou na Isireli, sa sega na Kalou me tauvata kei kemuni, mai lomalagi e cake, se e vuravura era, ni kemuni sa vakabauta tiko na veiyalayalati kei na loloma kei ira na nomuni tamata era lako voli e matamuni mai na vu ni yalodra taucoko: 24o ni sa vakabauta na ka ko ni a yalataka vua na nomuni tamata ko Tevita na tamaqu: ia ko ni a vosa e na gusumuni, a sa vakayacora e na ligamuni, me vaka e na siga oqo. 25Ia oqo, kemuni Jiova na nodra Kalou na Isireli mo ni vakayacora ga vua na nomuni tamata ko Tevita na tamaqu na ka ko ni a yalataka vua, ni kemuni a kaya, Ena sega ni mudu vei iko na tamata me tiko e mataqu e nai tikotiko vakaturaga ni Isireli; kevaka era na daulewa na nodra i valavala na luvemu, me ra lako voli e mataqu me vaka ko a lako voli e mataqu. 26Ia oqo, kemuni na nodra Kalou na Isireli, me vakadinadinataki tiko na nomuni vosa, ko ni a vosataka vua na nomuni tamata ko Tevita na tamaqu.
27Ia ena tiko vakaidina li na Kalou e vuravura? raica, ko lomalagi, kei lomalagi e cake sara, sa sega ni rauti kemuni; ka sa sega dina sara na vale oqo ka'u sa qai tara. 28Ia mo ni goleva ga, kemuni Jiova na noqu Kalou, na vakamamasu ni nomuni tamata kei na nona kerekere, mo ni rogoca na tagi kei na vakamamasu, sa masu kina edaidai e matamuni na nomuni tamata: 29me rai tiko na matamuni ki na vale oqo e na bogi kei na siga, ki na tikina ko ni a kaya kina, Ena tiko maikea na yacaqu; mo ni rogoca kina na masumasu sa cabora na nomuni tamata e na tikina oqo. 30Ia mo ni rogoca na noqu kerekere na nomuni tamata, kei na nodra na nomuni tamata na Isireli, ni ra na masu e na tikina oqo: ia mo ni rogoca mai lomalagi, na yasana ko ni sa tiko kina: ia ni kemuni sa rogoca, mo ni kakua ni cudru.
31Kevaka sa caka cala e dua na tamata vua na kai nona, a sa vakabubuluitaki ko koya, a sa kau mai na nona bubului ki na mata ni nomuni cabocabo-ni-soro e na vale oqo: 32mo ni qai rogoca mai lomalagi, ka cakava, ka lewai ira na nomuni tamata, ni kemuni sa vakacalai koya na caka cala, mo ni tauca ki na uluna na nonai valavala; ka mo ni vakadonui koya sa caka dodonu, mo ni solia vua me vaka na nonai valavala dodonu.
33Ni ra sa moku na nomuni tamata na Isireli e matadra na meca, ni ra sai valavala ca vei kemuni, a ra sa saumaki tale vei kemuni, ka vakatusa na yacamuni, ka vakamamasu, ka kerekere vei kemuni e na vale oqo; 34mo ni qai rogoca mai lomalagi, ka mo ni kakua ni cudruvi ira e na vuku ni nodra i valavala ca na nomuni tamata na Isireli, ia mo ni vakalesui ira tale ki na vanua ko ni a solia vei ira na nodra qase eliu.
35Ni sa sogo ko lomalagi, ka sega kina na uca, ni ra sai valavala ca vei kemuni; kevaka era na vakamamasu ni ra rai ki na tikina oqo, ka vakatusa na yacamuni, ka biuta na nodra i valavala ca, ni kemuni sa vakararawataki ira; 36mo ni qai rogoca mai lomalagi, ka kakua ni cudruvi ira e na vuku ni nodra i valavala ca na nomuni tamata, io, na nomuni tamata na Isireli, mo ni vakavulici ira kina e na sala vinaka me ra lako kina, ka solia na uca ki na nomuni vanua, ko ni a solia vei ira na nomuni tamata mei votavota.
37Kevaka sa dausiga na vanua, kevaka sa dua na mate levu, kevaka sa ca mai nai teitei, se malai levu, se kania na vodre, se na nuve; kevaka era sa bukuya na druadrua e na vanua ni nodra veikoro ko ira na meca; kevaka sa dua na rarawa levu, se dua na mate; 38na masu kecega kei na kerekere kecega sa na ia e dua na tamata, se ko ira kecega na nomuni tamata na Isireli, ni sa kila na tamata yadua ka kena ca ni yalona, a sa dodoka yani na ligana vaka ki na vale oqo; 39mo ni qai rogoca mai lomalagi, na yasana ko ni sa tiko kina, ia mo ni kakua ni cudruvi ira, ka mo ni ia ga ka solia vua na tamata yadua me vaka na nonai valavala kecega, ni kemuni sa kila, na yalona; (ni kemuni sa kila, io koi kemuni duaduaga, na yalodra kecega na luve ni tamata;) 40me ra rerevaki kemuni e na gauna kecega era na bula tiko kina e na vanua ko ni a solia vei ira na neimami qase eliu.
41Ia e na vuku ni kai tani, o koya sa sega ni kai vata kei ira na nomuni tamata na Isireli, ni sa lako mai na vanua vakayawa e na vuku ni yacamuni; 42(ni ra na rogoca na yacamuni levu, kei na ligamuni kaukauwa, kei na ligamuni sa dodo tu;) ni ra na lako mai ka masu e na vale oqo; 43mo ni qai rogoca mai lomalagi, na yasana ko ni sa tiko kina, ka mo ni cakava me vaka na ka kecega sa masu kina vei kemuni ko ira na kai tani: me ra kila na yacamuni ko ira kecega na kai vuravura, ka me ra rerevaki kemuni, me vakataki ira na nomuni tamata na Isireli; me ra kila ni sa vakatokai e na yacamuni na vale oqo ka'u sa tara.
44Kevaka era sa lako yani ko ira na nomuni tamata me ra vala kei ira na nodra meca, e na sala kecega ko ni na talai ira kina, ka ra sa masu vei Jiova, vaka ki na koro oqo ko ni a digitaka, kei na vale ka'u sa tara oti ki na yacamuni: 45mo ni qai rogoca mai lomalagi na nodra masumasu, kei na nodra kerekere, ka totaka na ka e dodonu vei ira.
46Kevaka era sa caka cala vei kemuni, (ni sa sega na tamata e sega ni caka cala,) ka ko ni sa cudruvi ira, ka soli ira ki na meca, me ra kauti ira vakabobula ki na vanua ni meca, se yawa se voleka; 47ia kevaka era sa vakanananu e na vanua era a kau vakabobula kina, ka veivutuni, ka masuti kemuni e na nodra vanua era a vakabobulataki ira, ka kaya, Keitou sai valavala ca ka sai valavala vakatani, keitou sa caka cala; 48a ra sa lesu vei kemuni e na lomadra taucoko, kei na vu ni yalodra taucoko, e na vanua ni nodra meca, o ira ka vakabobulataki ira, ka masu vei kemuni ni ra rai vaka ki na nodra vanua ko ni a solia vei ira na nodra qase, na koro ko ni sa digitaka, kei na vale ka'u sa tara oti ki na yacamuni; 49mo ni qai rogoca mai lomalagi, na yasana ko ni sa tiko kina, na nodra masumasu, kei na nodra kerekere, ka totaka na ka e dodonu vei ira, 50ia mo ni kakua ni cudruvi ira na nomuni tamata era sai valavala ca vei kemuni, ka sa talaidredre kina vei kemuni, ia mo ni vakayalovinakataki ira era a vakabobulataki ira, ka me ra lomani ira: 51ni ra sa nomuni tamata, kei na nomuni votavota, ko ni a kauta tani mai Ijipita, mai na loma ni lovo kaukamea sa vakawaicalataki: 52me rai tu na matamuni ki na nona kerekere na nomuni tamata, kei na nodra kerekere na nomuni tamata na Isireli, mo ni rogoci ira kina e na ka kecega era sa masu kina vei kemuni. 53Ni kemuni a tawasei ira me ra nomuni, me ra nomuni votavota, maivei ira kecega na veimatanitu e vuravura, me vaka ko ni a kaya e na gusu i Mosese na nomuni talatala, i Jiova na Kalou, ni kemuni a kauti ira tani na neimami qase mai Ijipita.
54Ia ni sa vakaotia kece ko Solomoni na masumasu kei na kerekere oqo, vei Jiova, sa tu cake ko koya mai na mata ni cabocabo-ni-soro i Jiova, ka sa kua ni tekiduru tiko ka sa dodo tu na ligana ki lomalagi.
55A sa tu cake ko koya, ka vosavakalougatataki ira nai soqosoqo taucoko ni Isireli, e na domo levu, ka kaya, 56Me vakavinavinakataki ko Jiova, o koya sa solia na vakacegu vei ira na nona tamata na Isireli, me vaka na ka kecega ka yalataka ko koya: sa sega ni lutu e dua na vosa e na nona vosa ni yalayala vinaka kecega, ka vosataka ko koya e na gusu i Mosese na nonai talatala. 57Me tiko vata ga kei keda ko Jiova na noda Kalou, me vaka sa tiko vata kei ira na noda qase: me kakua ni biuti keda, se lako tani vei keda: 58ka me vagolea na lomada vei koya, me da lako kina e na nona sala kecega, ka me vakabauta na nonai vakaro, kei na nonai lesilesi, kei na nona lewa, ka vakarota ko koya vei ira na noda qase. 59Ia na noqu vosa oqo ka'u sa masu kina e na mata i Jiova, me voleka vei Jiova na noda Kalou e na siga kei na bogi, me cakava kina ko koya na ka e dodonu vei au na nona tamata, kei na ka e dodonu vei ira na nona tamata na Isireli: me vaka sa yaga e na siga yadua: 60me ra kila kina ko ira kecega na veimatanitu e vuravura, ni sa Kalou ko Jiova; ka sa sega tale e dua tani. 61Ia me dodonu na lomamuni vei Jiova na noda Kalou, mo ni muria na nonai lesilesi, ka vakabauta na nonai vakaro, me vaka e na siga oqo.
62A ra sa vakacabora nai soro e na mata i Jiova ko koya na tui, kei ira vata kaya na Isireli kecega. 63Ka sa vakacabora vei Jiova ko Solomoni nai soro ni veivinakati, e rua na oba ka rua na udolu na pulumokau, ka tinikarua na oba na sipi. A ra sa vakatabuya na vale i Jiova ko koya na tui, kei ira kecega na Isireli. 64E na siga ko ya sa vakatabuya ko koya na tui na lomanibai e na mata ni vale i Jiova, ni sa vakacabora maikea nai soro kama, kei nai madrali laukana, kei na uro ni soro ni veivinakati; ni sa lailai nai cabocabo-ni-soro parasa sa tu e na mata i Jiova, me vakacabori kina nai soro kama, kei nai madrali laukana, kei na uro ni soro ni veivinakati.
65E na gauna ko ya, sa ia na so levu ko Solomoni, kei ira vata kaya na Isireli kecega, e dua nai soqosoqo levu, sa vakatekivu mai nai curucuru ki Emaci ka yacova na uciwai ni Ijipita, e na mata i Jiova na noda Kalou, ka bogi vitu ka bogi vitu tale, io e tinikava na bogi. 66E nai kawalu ni bogi sa talai ira yani na tamata ko koya: a ra sa vosavakalougatataki koya na tui, a ra sa lako ki na nodra veivale, ka sa reki ka marau na yalodra e na vuku ni ka vinaka kecega sa cakava ko Jiova vei Tevita na nonai talatala, kei ira talega na Isireli na nona tamata.
Currently Selected:
1 TUI 8: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
