1 TUI 9
9
Sa rairai vei Solomoni ko Jiova, ka vosa vua, 1-9. Sa cata ko Airami na veikoro ka soli vua, 10-14. O ira na tamata cakacaka i Solomoni, 15-23. Ai soro sa daucabori, 25. A waqa nei Solomoni, 26-28.
1Ia sa yaco ni sa tara vakaoti ko Solomoni na vale i Jiova, kei na vale ni tui, kei na ka kecega ka gadreva ko Solomoni ka via cakava, 2sa qai rairai tale vei Solomoni ko Jiova, me vaka na nona rairai vua mai Kipioni.
3A sa kaya vua ko Jiova, Au sa rogoca oti na nomu masumasu, kei na nomu kerekere, ko a masu kina vei au: au sa vakatabuya na vale oqo, ko sa tara oti, me tiko kina na yacaqu ka tawa mudu; ia ena tiko maikea na mataqu kei na lomaqu e na veisiga kecega. 4Ia kevaka ko na lako voli e mataqu, me vaka ka lako ko Tevita na tamamu, e na yalodina, kei nai valavala dodonu, mo cakava na ka kecega ka'u a vakarota vei iko, ka vakabauta na ka ka'u sa lesia kei na ka ka'u sa lewa: 5au na qai vakataudeitaka nai tikotiko vakaturaga ni nomu matanitu, mo lewa kina vei ira na Isireli ka sega ni mudu; me vaka ka'u a yalataka vei Tevita na tamamu, ka kaya, Ena sega ni mudu vei iko na tamata me tiko e na nodra i tikotiko vakaturaga na Isireli. 6Ia kevaka dou na vuki tani mo dou kua ni muri au, oi kemudou se ko ira na luvemudou, ka sega ni vakabauta na noqu i vakaro kei na noqu i lesilesi ka'u sa tauca vei kemudou, ia dou sa lako tani ka qarava na kalou tani, ka cuva vei ira; 7au na qai muduki ira tani na Isireli mai na vanua ka'u a solia vei ira; ia na vale oqo ka'u sa vakatabuya ki na yacaqu, au na biuta tani e mataqu; ena daucavuti talega e nai bole ko ira na Isireli, ka na vosabecitaki vei ira na veimatanitu kecega: 8ia e na vuku ni vale oqo, sa cecere tu, era na kurabui ko ira kece sa lako voli kina, ka vakaisaisa; a ra na kaya, E na vuku ni cava beka sa cakacaka kina vakaoqo ko Jiova ki na vanua oqo kei na vale oqo? 9Ia ena kainaki, Ni ra sa biuti Jiova na nodra Kalou, o koya ka kauti ira na nodra qase mai na vanua ko Ijipita, a ra sa bauta eso na kalou tani, ka cuva vei ira, ka qaravi ira: o koya oqo sa vakayacora kina vei ira ko Jiova na ka ca kecega oqo.
10Ia ni sa oti na yabaki e ruasagavulu sa tara tiko kina ko Solomoni na vale ruarua, na vale i Jiova, kei na vale ni tui, 11(sa kauta vei Solomoni ko Airami na tui Taia na sitari kei na damanu, kei na koula, me vaka na ka kecega sa vinakata ko koya,) sa qai solia vei Airami ko Solomoni na tui e ruasagavulu na koro e na vanua ko Kalili. 12A sa lako yani ko Airami mai Taia me la'ki raica na veikoro ka solia vua ko Solomoni; a sa sega ni vinakata ko koya. 13A sa kaya ko koya, A veikoro cava oqo ko sa solia mai vei au, na wekaqu? A sa vakatoka na yacadra ko koya, Na vanua ko Kepuli ka yacova na siga oqo. 14A sa vakauta ko Airami vei koya na tui e dua na drau ka ruasagavulu na taledi koula.
15Ia oqo nai vakacavacava sa vakarota me ia ko Solomoni na tui, me tara kina na vale i Jiova, kei na nona vale, kei Milo, kei na bai kei Jerusalemi, kei Asori, kei Mikito, kei Keseri: 16Sa lako cake eliu ko Fero na tui Ijipita, ka kabai Keseri, ka vakama, ka vakamatei ira na kai Kenani era a tiko e na koro, ka solia me ka-ni-loloma vua na luvena, na wati i Solomoni: 17a sa tarai Keseri ko Solomoni, kei Peci-oroni mai ra, 18kei Pealaci, kei Tatimoa mai na veikau, e na vanua, 19kei na veikoro kecega ni yau nei Solomoni, kei na veikoro ni qiqi-ni-valu, kei na nodra veikoro na tamata dauvodo ose, kei na ka kecega sa via tara ko Solomoni mai Jerusalemi, kei Lepanoni, kei na vanua kece ni nona matanitu: 20Ia na tamata kecega sa vo maivei ira na Amoraiti, kei ira na Itaiti, kei ira na Perisaiti, kei ira na Aivaiti, kei ira na Jepusaiti, era sega ni kawa vata kei ira na Isireli, 21ia na luvedra sa vo me taravi ira e na vanua, ko ira era a sega ni vakarusa rawa ko ira na Isireli, io, vei ira sa lesia ko Solomoni nai vakacavacava ni bobula, ka yacova na siga oqo. 22Ia ka sega ni vakabobulataka e dua maivei ira na Isireli ko Solomoni; ia era sa tamata i valu ga, kei na nona tamata, kei na nona tamata turaga, kei na turaga ni nonai valu, kei na turaga ni nona qiqi-ni-valu, kei na nona tamata dauvodo ose. 23O ira oqo sa turaga vei ira sa lewa na cakacaka i Solomoni, era sa lewe lima na drau ka limasagavulu, era sa lewai ira na tamata era sa kitaka tiko na cakacaka.
24Ia sa lako cake na marama na luve i Fero mai na koro i Tevita, ki na vale sa tara ko Solomoni me nona: sa qai tarai Milo ko koya.
25A sa vakacabora vakatolu e na veiyabaki ko Solomoni nai soro kama, kei nai soro ni veivinakati, e nai cabocabo-ni-soro ka cakava ko koya e na vale i Jiova, a sa vakama kina na ka boi vinaka e nai cabocabo-ni-soro sa tu e na mata i Jiova; a sa vakaotia na vale ko koya.
26A sa cakava ko Solomoni na tui eso na waqa mai Esi-oni-keperi, voleka ki Eloci, mai na matasawa ni Wasa Damudamu, e na vanua ko Itomi. 27A sa talai ira na nona tamata e na veiwaqa ko Airami, ko ira era kai wai, ka daukila na wasawasa me ra lako vata kei ira na tamata i Solomoni. 28A ra sa lako ki Oferi, ka kauta maikea na koula, e va na drau ka ruasagavulu na taledi kivei Solomoni na tui.
Currently Selected:
1 TUI 9: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
