1 TUI 7
7
Sa tara eso na vale ko Solomoni, 1-12. Sa kau mai Taia na matai vuku ko Urami, me cakava nai yaya ni vale ni soro, 13-51.
1A sa yabaki tinikatolu sa tara tiko kina na nona vale ko Solomoni, a sa vakaotia taucoko na nona vale. 2Ni sa tara talega na vale ni veikau ni Lepanoni; na kena balavu e dua na drau na kiupiti, kei na kena raraba e limasagavulu na kiupiti, kei na kena cecere e tolusagavulu na kiupiti, e na domo ni duru sitari sa yatu va, a sa so nai coka sitari e na domo ni veiduru. 3A sa ubi e cake e na sitari e na dela ni veicoka, sa no e na domo ni duru e vasagavulu ka lima, sa tauyatinikalima e na yatu yadua. 4A sa tolu na yatu sogo cicila me rai kina, a sa veidonui na yasana me rai kina e na yatu e tolu. 5A sa takiveilevu nai sogo cicila kecega, kei na veiduru talega; a sa veidonui nai sogo cicila me rai kina e na yatu e tolu. 6A sa cakava ko koya e dua na varada e na veiduru; a kena balavu e limasagavulu na kiupiti, kei na kena raraba e tolusagavulu na kiupiti: a sa tu e matadra na varada: ka so na duru kei nai coka levu sa tu e matadra. 7A sa qai cakava e dua na varada me tu kina nai tikotiko vakaturaga me lewa maikina, io na varada ni veilewai: a sa botana e na sitari mai na yasa ni rara e dua ki na kenai karua. 8Ia na nona vale ka dautiko kina ko koya, sa dua tani na kena lomanibai, na kena bai na varada, a sa vakakina na kenai cakacaka. A sa cakava talega ko Solomoni e dua na vale me vaka na varada oqo me nona na luve i Fero, o koya ka watina.
9Sa vatu talei oqori kecega, me vaka nai vakarau ni vatu sa ta, sa lauvaro e nai varo, eloma, esau talega, io mai na kena yavu ka yaco ki na dela ni lalaga, ka mai taudaku vaka ki na lomanibai levu. 10Ia sa vatu talei na kena yavu, na vatu lelevu, na vatu e tini na kena kiupiti, kei na vatu e walu na kena kiupiti. 11Ia e delana sa so na vatu talei, me vaka nai vakarau ni vatu sa ta, ka so na sitari. 12Ia na lomanibai levu sa vakavolivolita, sa yatu tolu ni vatu sa ta; ka dua na yatu ni coka sitari, ia me bai ni rara eloma ki na vale i Jiova, kei na varada ni vale.
13A sa talaki ko Solomoni ka vakauti Urami mai Taia. 14O koya na luvena e dua na yada e na mataqali i Nafitalai, a kai Taia ko tamana, ka sa matai ni parasa: a tamata vuku sara ko koya, ka daulomakasa, ka kena matai dina ni ka parasa kecega. A sa lako mai ko koya vei Solomoni na tui, ka kitaka na nona cakacaka kecega. 15A sa cakava e rua na duru parasa, sa tauyatinikawalu na kiupiti na kedrau cecere; a sa vivia vei rau yadua e dua na dali sa tinikarua na kena kiupiti. 16A sa cakava e na parasa sa vakawaicalataki e rua na domodomo, me viri ki dela ni veiduru: a kena cecere e dua na domodomo e lima na kiupiti, ia na kena cecere na domodomo kadua e lima na kiupiti. 17Na lawa veivolavolai, kei na sinucodo sa muloci, ki na veidomodomo sa tu e dela ni veiduru: e vitu ki na dua na domodomo, ka vitu ki na domodomo kadua. 18A sa cakava na veiduru, ka sa rua na yatu me volita e taudaku ni lawa, me ubia e nai ukuuku e vaka na pomekaraneti na domodomo, ko ya sa tu e delana: a sa cakava vakakina na kenai kadua ni domodomo. 19A sa caka na domodomo sa tu e na dela ni veiduru, me vaka na se ni viavia e na varada, sa va na kena kiupiti. 20Ia na domodomo e na dela ni duru ruarua sa tu mai cake mai na tikina sa tolo levu, sa donuya na lawa; ia nai ukuuku e vaka na pomekaraneti, e rua na drau, sa yatuni ka vivia na domodomo ruarua. 21A sa vakaduria ko koya na duru e na varada ni vale ni soro: a sa vakaduria na duru i matau, ka vakatoka na yacana ko Jakini; a sa vakaduria na duru i mawi, ka vakatoka na yacana ko Poasa. 22A sa caka na domo ni duru me vaka na se ni viavia: a sa oti na cakacaka ni duru ruarua.
23A sa cakava ko koya e na parasa sa vakawaicalataki e dua na taqi levu ka mokimokiti, e tini na kiupiti mai na batina e dua ki na batina kadua: ka sa lima na kiupiti na kena cecere: ke sa voliti e na dua na wa sa na tolusagavulu na kena kiupiti. 24A sa so na vago sa volita e ruku ni batina, e tini e na dua na kiupiti, ka volita sara na taqi levu: sa vakawaicalataki na vago ka sa rua na kena yatu. 25A sa taqa e deladra na pulumokau e tinikarua, e tolu sa namata ki na tokalau, ka tolu sa namata ki ra, ka tolu sa namata ki na ceva, ka tolu sa namata ki na tu-i-cake: a sa toka e cake e na deladra na taqi levu, a sa qara ki loma na mudra kecega. 26Ia na kena vavaku, sa tauvata kei na raba ni liga, a sa caka na batina me vaka na bati ni bilo, e na se ni viavia; ka sa rauta e dua na oba ka lima na udolu na kaloni.
27A sa cakava ko koya e tini nai tutu parasa; e va na kiupiti na kena balavu e dua nai tutu, ka va na kiupiti na kena raraba, ka tolu na kiupiti na kena cecere. 28Ia sa caka vakaoqo nai tutu: sa vakatutuna, ia na veitutuna sa no e na macawa ni kau sa vakababa: 29ia e na veitutuna sa no e na macawa ni kau sa vakababa, sa so na laioni, na pulumokau, kei na jerupi: ia e cake, e na dela ni kau vakababa, sa dua na botona: ia e ruku ni laioni kei na pulumokau sa vakaikuritaki kina eso na cakacaka mamare. 30Era sa tauyava na yavadra parasa nai tutu kecega, kei na kau parasa me cawiri kina; ia sa vakaitokoni na tutuna vava: e ruku ni taqi kei na yasana kecega sa vakaikuritaki, sa so kina nai totoko sa vakawaicalataki. 31Ia na kena dreke sa tu ki loma ni domodomo, ka e cake, sa dua na kiupiti: ia sa momokiti na kena dreke, me vaka na cakacaka ni tutu, a sa dua na kiupiti, ka dua na afa kiupiti; a sa ceu na kena dreke kei na belena, a sa sega ni momokiti, sa rivirivi me va na yasa. 32Ia e ruku ni belena sa va a yavana; a sa vakamauti ki nai tutu na kau e cawiri kina na yavana; ia na kena cecere e dua na yavana sa dua na kiupiti ka dua na afa kiupiti. 33Ia na kenai cakacaka ni yavana, sa vaka na kenai cakacaka ni yavana na qiqi ni tamata; sa vakawaicalataki kecega na kau sa cawiri kina, kei na tikina sa curu kina na ka sa cawiri kina, kei na batina, kei na kenai sa. 34A sa tauyava na kenai totoko e na dua nai tutu e na tutuna vava: sa caka vata sara na veitotoko kei nai tutu. 35Ia e na dela ni tutu, sa dua na domodomo sa dua na afa kiupiti na kena cecere: ia e dela ni tutu, na kenai vakababa, kei na belena sa caka vakakina. 36A sa ceuta ko koya e na veitikina raraba e na kenai vakababa, kei na belena, eso na jerupi, na laioni, kei na balabala, a sa vakarauvatani vakavinaka kecega, kei na ka sa vakaikuritaki voli kina. 37Sa cakava vakaoqo nai tutu e tini: sa tautauvata na kedratou i tulituli, na kedratou i vakarau, na kedratou levu.
38Sa cakava talega ko koya e tini na taqi parasa: e dua na taqi sa rauta e tolu na drau na kaloni; a sa tauyava na kiupiti na taqi yadua: a sa tu yadua na taqi e nai tutu e tini. 39A sa vakatikora e lima nai tutu ki na yasa i matau ni vale, ka lima ki na yasa i mawi ni vale: a sa viritu na taqi levu e na yasa i matau ni vale vaka ki na tu-i-cake, ka donuya na ceva.
40A sa cakava na taqi ko Urami, kei nai sivi me kau tani kina na dravusa, kei na peseni me kau kina na dra me kureitaki. A sa vakaotia ko Urami na cakacaka kecega sa cakava ko koya vei Solomoni na tui, ki na vale i Jiova; 41e rua na duru, kei nai ukuuku momokiti e na domodomo sa tu e dela ni duru ruarua; ka rua na lawa, me ubia nai ukuuku momokiti e rua e na domodomo sa tu e na dela ni duru ruarua; 42kei nai ukuuku e va na drau e vaka na pomekaraneti, ki na lawa ruarua; e rua na yatu i ukuuku e vaka na pomekaraneti ki na dua na lawa, me ubia nai ukuuku momokiti e rua e na domodomo sa tu e na dela ni duru ruarua; 43kei nai tutu e tini, kei na taqi e tini e na deladratou nai tutu; 44ka dua na taqi levu, kei na pulumokau e tinikarua e ruku ni taqi levu ko ya; 45kei na kuro, kei nai sivi me kau tani kina na dravusa, kei na peseni me kau kina na dra me kureitaki: ia sa parasa solo vakavinaka nai yaya kecega sa cakava ko Urami vei Solomoni na tui, me yaga e na vale i Jiova. 46Sa cakava oqori na tui e na buca mai Joritani, e na vanua tete, e na macawa i Sukoci kei Saricani. 47A sa sega ni vakarautaka na bibi ni bilo kecega ko Solomoni, ni sa rui levu: ka sega ni kilai na bibi ni parasa sa tu kina.
48A sa cakava ko Solomoni nai yaya kecega sa tu e na vale i Jiova: nai cabocabo-ni-soro koula, kei na tepeli koula, sa dautu kina na madrai dauraici, 49kei nai tutu-ni-cina koula dina, sa caka kina na se ni kau, e lima e nai matau, ka lima e nai mawi, e na mata ni loqi ni Vosa, kei na cina kei na saga-ni-buka koula, 50kei na bilo, kei nai koti-ni-cina, kei na peseni me kau kina na dra me kureitaki, kei nai taki, kei na miqa ni ka boi vinaka, e na koula dina; kei nai ruberube ni sogo ni vale eloma, na tikina tabu sara, io mei sogo ni vale, ko ya na vale ni soro, e na koula.
51A sa caka oti na cakacaka kecega ka cakava ko Solomoni na tui ki na vale i Jiova. A sa kauta ki loma ko Solomoni na ka ka vakatabuya me nei Jiova ko Tevita na tamana: na siliva, kei na koula, kei nai yaya, sa viritu vata kei nai yau ni vale i Jiova.
Currently Selected:
1 TUI 7: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
