1 TUI 14
14
Sa tauvi mate na luvena na tui, 1-5. Sa tukuna na cudru i Jiova vei Jeropoami ko Eaija na parofita, 6-16. Sa tui Juta ko Riopoami, ka sai valavala ca ga, 21-31.
1E na gauna ko ya sa tauvi mate ko Apaija na luve i Jeropoami. 2A sa kaya ko Jeropoami vua na watina, Mo tu cake mada, ka liayalewa tani, mo kakua ni kilai kina ni ko sa wati i Jeropoami; ka lako ki Sailo: raica, sa tiko maikea ko Eaija na parofita, o koya ka tukuna vei au ni'u na nodra tui na tamata oqo: 3ia mo kauta vata kei iko e tini nai buli madrai, ka so na madrai mamare, ka dua na tavaya oni, ka lako vua: ena tukuna vei iko ko koya na ka ena yaco vua na gone. 4A sa kitaka vakakina na wati i Jeropoami, ka cavu tu, ka lako ki Sailo, ka lako ki na vale i Eaija: ia sa sega ni rai rawa ko Eaija: ni sa buawa na matana ni sa qase mai. 5A sa kaya vei Eaija ko Jiova, Raica, sa lako mai na wati i Jeropoami me taroga vei iko se na vakaevei na luvena; ni sa tauvi mate ko koya: mo vosa vua vaka ka vaka: ia ena liayalewa tani ko koya ni sa curu mai.
6Ia ni sa rogoca na vadugu ni yavana ko Eaija, ni sa curu mai ko koya e katuba, sa kaya, Mo curu mai, na wati i Jeropoami; a cava ko sa liayalewa tani kina? ni sai tukutuku bibi ka'u sa talai kina vei iko. 7Mo lako, mo kaya vei Jeropoami, Sa vosa vakaoqo ko Jiova na nodra Kalou na Isireli, Ni ka'u a vakalevui iko cake maivei ira na tamata, ka lesi iko mo tui vei ira na noqu tamata na Isireli, 8ka kaliraka na matanitu mai na mataqali i Tevita, ka solia vei iko: ia ko sa sega ga ni vakataki Tevita na noqu i talatala, o koya ka vakabauta na noqu i vakaro, ka muri au e na yalona taucoko, me cakava ga na ka e dodonu vei au; 9ka ko sa ia nai valavala ca sa uasivia na nodra i valavala ca kecega era a bula eliu vei iko; ni ko sa la'ki cakava eso na nomu kalou tani, kei na matakau eso sa vakawaicalataki, ka me vakacudrui au, ka sa biuti au ki dakumu: 10o koya oqo, ka'u na vakayacora na ca ki na vale i Jeropoami, ka muduka laivi vei Jeropoami na tagane kecega, io ko koya sa sogolati, kei koya sa lako voli, e Isireli, ia ka'u na taviraka tani na vo ni kawa i Jeropoami, me vaka sa taviraka tani na de-ni-manumanu na tamata, ka me oti kece sara. 11O koya sa mate vei Jeropoami e na koro, ena kania na koli; kei koya sa mate e na were, ena kania na manumanu vuka: ni sa vosataka ko Jiova. 12Ia ko iko, mo ia, mo lako ki na nomu vale: ia ni sa curu ki na koro na yavamu, ena ciba na gone. 13A ra na tagicaki koya ko ira kecega na Isireli, ka buluta: ni na yaco ki nai bulubulu ko koya duaduaga mai vei Jeropoami, ni sa kune vua na ka vinaka vei Jiova, na nodra Kalou na Isireli, e na mataqali i Jeropoami. 14Ia ena vakatubura ko Jiova e dua na tui vei ira na Isireli, o koya ena muduka laivi na mataqali i Jeropoami e na siga ko ya: ka vakaevei? sa kena gauna oqo. 15Ia ena yaviti ira na Isireli ko Jiova, me vaka sa vakayavalataki na gasau e na wai; ka na cavuivuvutaki ira na Isireli mai na vanua vinaka oqo, ka solia ko koya vei ira na nodra qase eliu, ka na duibiubiuti ira ki tai kadua ni Uciwai, ni ra sa cakava na nodra veikalou-yalewa ni veikau, ka vakacudrui Jiova. 16Ia ena biuti ira tani na Isireli e na vuku ni valavala ca sa kitaka ko Jeropoami, ka ni sa vakaivalavalacataki ira kina na Isireli.
17A sa ia na wati i Jeropoami, ka lesu yani, ka yaco ki Tirisa: ia ni sa yaco ko koya ki nai lago ni katuba, sa ciba na gone; 18a ra sa buluta; a ra sa tagicaka ko ira kecega na Isireli, me vaka na vosa i Jiova, ka vosataka ko koya e na gusu ni nonai talatala ko Eaija na parofita.
19Ia na vo ni cakacaka i Jeropoami, na nonai valu, kei na nona lewa, raica, sa volai e nai vola ni veika sa caka e na nodra gauna na tui Isireli. 20Ia na gauna sa lewa kina ko Jeropoami sa ruasagavulu ka rua na yabaki: a sa moce vata kei ira na nona qase, a sa tui ko Netapi na luvena, me kenai sosomi.
21A sa tui mai Juta ko Riopoami na luve i Solomoni: sa vasagavulu ka dua na yabaki i Riopoami ni sa buli me tui, a sa tinikavitu na yabaki sa lewa kina ko koya mai Jerusalemi, na koro ka digitaka ko Jiova mai na nodra veimataqali kecega na Isireli, me vakatikora kina na yacana. Ia na yaca i tinana ko Neema, na yalewa ni Amoni.
22A ra sa daucaka ca ko ira na Juta e na mata i Jiova; a ra sa vakavuvutaki koya vakalevu e na nodra i valavala ca era sa cakava, ka vakalailai ko ira kece na nodra qase. 23Ni ra sa tara talega na nodra veitikina cecere, kei na veimatakau, kei na veikau lalai eso, e na veiulu-ni-koro cecere kecega, ka e na ruku ni kau bulabula kecega: 24A sa so na tamata talega e na vanua era sai valavala vaka-Sotoma: era sa cakacaka me vaka na nodra ka vakasisila kecega na veimatanitu ka vakaseva tani ko Jiova e matadra na Isireli.
25A sa yaco e na kenai kalima ni yabaki i Riopoami na tui, sa la'ki vala ki Jerusalemi ko Sisaki na tui Ijipita: 26A sa kauta tani nai yau mai na vale i Jiova, kei nai yau mai na nona vale na tui; sa kauta kece yani: a sa kauta kecega nai sasabai koula ka cakava ko Solomoni. 27A sa cakava ko Riopoami na tui eso nai sasabai parasa me kedrai sosomi, ka solia kivei ira na turaga ni valu i vakatawa, ko ira sa vakatawa mai na katuba ni nona vale na tui. 28Ia ni sa la'ki curu na tui ki na vale i Jiova, sa qai kauta oqori ko ira nai vakatawa, a sa qai vakasuka ki na nodra vale nai vakatawa.
29Ia na vo ni cakacaka i Riopoami, kei na ka kecega sa cakava ko koya, sa sega li ni volai e nai vola ni veika sa caka e na nodra gauna na tui Juta? 30A rau sa veivaluti tiko ko Riopoami kei Jeropoami e na nodrau gauna kecega. 31A sa moce vata kei ira na nona qase ko Riopoami, a sa bulu vata kei ira na nona qase e na koro i Tevita. Ia na yaca i tinana ko Neema, na yalewa ni Amoni. A sa tui ko Epaijami na luvena, me nonai sosomi.
Currently Selected:
1 TUI 14: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
