1 TUI 15
15
Sa tui Juta ko Epaijami, 1-8. Sa tui Juta ko Esa, 9-24. Sa tui Isireli ko Netapi, 25-32; a sa tarava ko Pasa, 33,34.
1E na kenai katinikawalu ni yabaki i Jeropoami na tui, na luve i Nipati, sa tekivu me lewa vei ira na Juta ko Epaijami. 2Sa tui tiko mai Jerusalemi ka yabaki tolu. Ia na yaca i tinana ko Meeka, na luve i Apisalomi. 3A sa muria ko koya nai valavala ca kecega i tamana, o koya ka kitaka ni sa bula eliu vua; a sa sega ni dodonu na lomana vei Jiova na nona Kalou, me vaka na loma i Tevita na nona qase. 4Ia e na vuku i Tevita ga sa solia vei koya ko Jiova na nona Kalou e dua na cina mai Jerusalemi, ni sa vakatubura na luvena me taravi koya, ka me vakataudeitaki Jerusalemi: 5ni sa cakava ko Tevita na ka e dodonu e na mata i Jiova, ka sega ni lesu tani mai na dua na ka sa vakaroti vua, e na veisiga kecega ni nona bula, na ka ga i Uraia na Itaiti. 6A rau sa veivaluti ko Riopoami kei Jeropoami e na gauna kece ni nona bula.
7Ia na vo ni cakacaka i Epaijami, kei na ka kecega ka cakava ko koya, sa sega li ni volai e nai vola ni veika sa caka e na nodra gauna na tui Juta? A rau sa veivaluti tiko ko Epaijami kei Jeropoami. 8A sa moce vata kei ira na nona qase ko Epaijami; a sa bulu ko koya e na koro i Tevita; a sa tui ko Esa na luvena, me kenai sosomi.
9Ia e na kenai karuasagavulu ni yabaki i Jeropoami na tui Isireli, sa tekivu me lewa vei ira na Juta ko Esa. 10A sa tui tiko ko koya mai Jerusalemi ka yabaki vasagavulu ka dua. Ia na yaca i tinana ko Meeka, na luve i Apisalomi. 11A sa caka dodonu ko Esa e na mata i Jiova, me vakataki Tevita na nona qase: 12a sa vakasevi ira tani mai na vanua era sai valavala vaka-Sotoma, ka biuta tani na matakau kecega ka cakava ko ira na nona qase: 13ia ko Meeka talega na tinana, sa vakasivoya ko koya me kakua ni ranadi tiko, ni sa cakava e dua na matakau ki na kalouyalewa ni veikau; a sa vakacacana na nona matakau ko Esa, ka vakama mai na uciwai ko Kitironi. 14Ia sa sega ni biu na veitikina cecere: ka sa dodonu ga vei Jiova na loma i Esa e na nona gauna kecega. 15A sa kauta ki na vale i Jiova na veika ka vakatabuya ko tamana me nei Jiova, kei na veika ka vakatabuya ko koya me nei Jiova, na siliva, kei na koula, kei nai yaya.
16A rau sa veivaluti tiko ko Esa kei Pasa na tui Isireli e na nodrau gauna kecega. 17A sa lako cake ko Pasa na tui Isireli me veivala kei ira na Juta, a sa tarai Rama, ka me dredre vua e dua me lako tani se lako mai vei Esa na tui Juta.
18A sa qai kauta ko Esa na siliva kei na koula kecega sa vo tu e nai yau ni vale i Jiova, kei nai yau ni vale ni tui, ka solia ki na ligadra na nona tamata: a sa vakauta ko Esa na tui kivei Peni-etati na luve i Tapirimoni, na luve i Esioni, na tui Siria, o koya sa tiko mai Tamasiko, ka kaya, 19Sa dua na nodaru veiyalayalati, ka dua vei rau na tamaqu kei na tamamu: raica, ka'u sa vakauta vei iko e dua na ka-ni-loloma, na siliva kei na koula: mo lako mai, mo tinia na nomudrau veiyalayalati kei Pasa na tui Isireli, ka me lako tani vei au ko koya. 20A sa vakarorogo vei Esa na tui ko Peni-etati, ka talai ira na kapiteni ni nona mataivalu me veivala kei na nodra veikoro na Isireli, a sa samuti Aijoni, kei Tani, kei Epeli-peci-meeka, kei Kineroci taucoko, kei na vanua taucoko ko Nafitalai. 21Ia ni sa rogoca ko Pasa, sa kua so ni tarai Rama ko koya, a sa la'ki tiko mai Tirisa. 22A sa kacivi ira kecega na Juta ko Esa na tui; sa sega ni vo e dua: a ra sa kauta tani na veivatu mai Rama, kei na kena kau, ka tarai Rama kina ko Pasa; a sa tarai Kipa kina ka nei Penijamini, kei Misipa, ko Esa na tui.
23Ia na vo ni cakacaka kecega i Esa, kei na nona kaukauwa kecega, kei na ka kecega ka cakava ko koya, kei na veikoro ka tara ko koya, sa sega li ni volai e nai vola ni veika sa caka e na nodra gauna na tui Juta? Ia e na gauna sa qase kina sa tauvi mate na yavana. 24A sa moce vata kei ira na nona qase ko Esa, a sa bulu vata kei ira na nona qase e na koro i Tevita na nona qase: a sa tui ko Jiosafati na luvena, me nonai sosomi.
25A sa tekivu me lewa vei ira na Isireli ko Netapi, na luve i Jeropoami, e na kenai karua ni yabaki i Esa na tui Juta, a sa tui vei ira na Isireli ka yabaki rua. 26A sa daucaka ca ko koya e na mata i Jiova, ka muria nai tovo i tamana, kei na nonai valavala ca ka vakaivalavalacataki ira kina na Isireli.
27A sa buki kena vere ko Pasa na luve i Eaija, e na mataqali i Isakari; a sa mokuti koya ko Pasa mai Kipiconi, sa nodra na kai Filisitia; ni ra sa tiko vakaivalu ki Kipiconi ko Netapi kei ira kecega na Isireli. 28Ia sa vakamatei koya ko Pasa, e na kenai katolu ni yabaki i Esa na tui Juta; a sa tui ko koya me nonai sosomi. 29Ia ni sa tui ko koya, sa mokuti ira kecega na kawa i Jeropoami; sa sega ni vakabula vei Jeropoami e dua sa cegu rawa, ka sa vakarusai koya oti, me vaka na vosa i Jiova, ka vosataka ko koya e na gusu ni nonai talatala ko Eaija na kai Sailo: 30e na vuku ni valavala ca i Jeropoami ka kitaka ko koya, ka sa vakaivalavalacataki ira kina na Isireli, e na nonai valavala ka vakacudrui Jiova kina na nodra Kalou ni Isireli.
31Ia na kena vo ni cakacaka i Netapi, kei na ka kecega ka cakava ko koya, sa sega li ni volai e nai vola ni veika sa caka e na nodra gauna na tui Isireli? 32A rau sa veivaluti ko Esa kei Pasa na tui Isireli e na nodrau gauna kecega.
33E na kenai katolu ni yabaki i Esa na tui Juta, sa tekivu me lewa ko Pasa, na luve i Eaija, vei ira kecega na Isireli mai Tirisa, ka sa lewa yabaki ruasagavulu ka va. 34A sa daucaka ca ko koya e na mata i Jiova, ka muria nai tovo i Jeropoami, kei na nonai valavala ca sa vakaivalavalacataki ira kina na Isireli.
Currently Selected:
1 TUI 15: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
