1 TUI 13
13
Sa tukuna na tamata ni Kalou na ka ena yaco vei Jeropoami, 1-10. Sa qai muria na vosa ni dua na parofita qase na tamata ni Kalou, ka mate kina, 11-32. Sai valavala ca ga ko Jeropoami, 33-34.
1Ka raica, sa lako e dua na tamata ni Kalou mai Juta ki Peceli, ni sa vosa vua ko Jiova: a sa wavu tu ko Jeropoami mai nai cabocabo-ni-soro, me vakama na ka boi vinaka. 2A sa kaci ko koya ki nai cabocabo-ni-soro e na vosa i Jiova, ka kaya, Nai cabocabo-ni-soro! Nai cabocabo-ni-soro! sa kaya vakaoqo ko Jiova, Raica, ena sucu e dua na gonetagane mai na mataqali i Tevita, ko Josaia na yacana; ia ena vakamatei iratou ko koya e delamu na bete ni veitikina cecere, eratou a vakama na ka boi vinaka e delamu, ka na vakamai e delamu na sui ni tamata. 3Sa solia talega nai vakadinadina e na siga ko ya, ka kaya, Sa vakaoqo nai vakadinadina sa vosataka ko Jiova; Raica, sa na kavida nai cabocabo-ni-soro, ka na tasova na dravusa sa koto e delana.
4Ia ni sa rogoca ko koya na tui na nona vosa na tamata ni Kalou, o koya ka kaci ki nai cabocabo-ni-soro mai Peceli, sa dodoka yani na ligana ko Jeropoami mai nai cabocabo-ni-soro, ka kaya, Tauri koya. A sa malai sara na ligana ka dodoka yani vua ko koya, a sa sega tale ni lokia rawa vua. 5A sa kavida nai cabocabo-ni-soro, a sa tasova na dravusa mai nai cabocabo-ni-soro, me vaka nai vakadinadina ka solia na tamata ni Kalou e na vosa i Jiova. 6A sa vosa na tui, ka kaya vua na tamata ni Kalou, Mo vakamasuti Jiova mada na nomu Kalou, ka masulaki au, ka me'u loki tale mai vei au na ligaqu. A sa vakamasuti Jiova na tamata ni Kalou, a sa lokia tale vei koya na ligana na tui, ka sa yaco me vaka eliu. 7A sa kaya na tui vua na tamata ni Kalou, Daru lako ki vale, mo vakacegu kina, ia ka'u na solia vei iko e dua na ka-ni-loloma. 8A sa kaya vua na tui ko koya na tamata ni Kalou, Kevaka ko ni na solia vei au e dua nai wase ni nomuni vale ni sa wase rua, au na sega ni curu vata kei kemuni, se kania na kakana se gunu wai e na tikina oqo: 9ni'u sa vakaroti vakakina e na vosa i Jiova, ka vaka, Mo kakua ni kania na kakana se gunu wai, se lesu tale yani e na sala ko a lako kina. 10A sa lako yani ko koya e na sala tani, ka sega ni lesu tale e na sala ka lako kina ki Peceli.
11A sa tiko mai Peceli e dua na parofita qase; a sa lako na luvena ka tukuna vua na cakacaka kecega ka cakava mai Peceli na tamata ni Kalou e na siga ko ya: kei na vosa ka vosataka ko koya vua na tui, eratou sa tukuna talega vua na tamadratou. 12A sa kaya vei iratou na tamadratou, A sala cava sa lako kina ko koya? a ratou sa raica oti ko iratou na luvena na sala ka lako kina na tamata ni Kalou, o koya ka lako mai Juta. 13Sa kaya talega vei iratou na luvena, Dou vauca mada nai vodovodo ki na asa me'u vodo kina. A ra sa vauca nai vodovodo ki na asa; a sa vodoka ko koya, 14ka la'ki muria na tamata ni Kalou, ka kunei koya ni sa tiko e na dua na ruku ni vu ni oki: a sa kaya vua, O iko beka na tamata ni Kalou ka lako mai Juta? A sa kaya ko koya, Koi au. 15A sa kaya vua, Daru lako ki noqu vale, ka kania na kakana. 16A sa kaya, E tabu me'u lesu vata kei iko, se curu vata kei iko: au na sega talega ni kania na kakana se gunu wai kei iko e na tikina oqo: 17ni sa vakaroti vei au e na vosa i Jiova, Mo kakua ni kania na kakana se gunu wai maikea, se lesu tale mo lako e na sala ko a lako mai kina. 18A sa kaya vua, Au sa parofita talega koi au me vakataki iko: a sa vosa vei au e dua na agilose e na vosa i Jiova, ka kaya, Mo vakalesui koya mai vei iko ki na nomu vale, me kania na kakana ka gunu wai. Ia sa lasu ga vua ko koya. 19Sa qai lesu vata kaya, ka kania na kakana ka gunu wai, e na nona vale.
20A sa yaco ni rau sa tiko vata mai na tepeli, sa lako mai na vosa i Jiova vua na parofita ka kauti koya mai: 21a sa kaci ko koya vua na tamata ni Kalou ka lako mai Juta, ka kaya, Sa vosa vakaoqo ko Jiova, Ni ko a talaidredre ki na vosa i Jiova, ka sega ni vakabauta nai vakaro ka vakarota vei iko ko Jiova na nomu Kalou, 22a sa lesu ga mai, ka kania na kakana ka gunu wai; ena tikina ka vakaroti kina vei iko, Mo kakua ni kania na kakana se gunu wai, ena sega ni bulu na yagomu e na nodra i bulubulu na nomu qase.
23Ia ni sa kana oti ka gunu oti ko koya, sa vauca ko koya nai vodovodo ki na asa me vodo kina na parofita ka kauta tale mai. 24Ia ni sa lako tu ko koya, sa donui koya e na sala e dua na laioni, ka vakamatei koya: a sa biu tu e na sala na yagona, a sa tu voleka kina na asa; sa tu voleka talega ki na yagona na laioni. 25Ka raica, era sa veilakoyaki na tamata, ka raica ni sa koto no e na sala na yagona, ka tu voleka ki na yagona na laioni: a ra sa la'ki tukuna e na koro sa tiko kina na parofita qase. 26Ia ni sa rogoca na parofita ka vakalesui koya mai na sala, sa kaya ko koya, Ko ya na tamata ni Kalou, o koya ka talaidredre ki na gusu i Jiova: a sa soli koya kina ko Jiova ki na laioni, o koya sa basuraki koya, ka vakamatea, me vaka na vosa i Jiova ka vosataka vua. 27Sa vosa talega vei iratou na luvena, ka kaya, Dou vauca mada nai vodovodo ki na asa. A ratou sa vauca. 28A sa lako ko koya, ka kunea na yagona sa biu no e na sala, kei na asa kei na laioni erau sa tu voleka ki na yagona: sa sega ni kania na yagona na laioni, se basuraka na asa. 29A sa laveta na yago ni tamata ni Kalou ko koya na parofita, ka vakavodoka ki na asa, ka kauta tale: a sa lesu ki na koro na parofita qase, me tagi, ka me buluti koya. 30A sa vakotora na yagona e nonai bulubulu, ka ratou sa tagicaki koya, ka vaka, Ulei, na wekaqu! 31Ia ni sa buluta oti ko koya, sa vosa vei iratou na luvena, ka kaya, Ni'u sa mate, dou buluti au e nai bulubulu sa bulu kina na tamata ni Kalou; dou vakotora vata na suiqu kei na suina: 32ni na yaco vakaidina na vosa ka kacivaka ko koya e na vosa i Jiova e na vuku ni cabocabo-ni-soro mai Peceli, kei na veivale kecega e na veitikina cecere mai na veikoro vaka-Samaria.
33Ni sa oti na ka oqo sa sega ni biuta tani ko Jeropoami na nonai valavala ca, ka sa lesia tale me ra bete ni veitikina cecere na tamata wale: o koya sa vinakata, sa bulia ko koya me bete ni veitikina cecere. 34Ia na ka oqo sa vu ni ca ki na mataqali i Jeropoami, ka me muduki tani kina, ka me vakarusai tani mai na dela i vuravura.
Currently Selected:
1 TUI 13: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
