Rooma 13

Al-muʼminiin wa l-hakuuma

1Khalli ayyi naadum yasmaʼ kalaam al-hakuuma achaan ma fi hakuuma illa be izin Allah wa ayyi hakuuma al-gaaʼide, Allah assasaaha. 2Achaan da, ayyi naadum al-yikhaalif al-hakuuma, yikhaalif al-cheyy al-Allah assasah. Wa l-naadum al-yikhaalif, hukum Allah yanzil foogah. 3Achaan al-naadum al-haalah adiile ma yakhaaf min al-hukkaam illa l-naadum al-haalah fasle, hu yakhaaf minhum. Kan tidoor ma takhaaf min al-haakim, khalaas sawwi al-kheer wa l-haakim yachkurak. 4Al-haakim hu khaddaam Allah le kheerak. Laakin kan inta mujrim, laabudda takhaaf minnah achaan al-haakim indah al-seef wa ma yichiilah saakit. Hu khaddaam Allah achaan yinazzil khadab Allah fi l-mujrim. 5Fi chaan da, waajib tasmaʼo kalaam al-hakuuma. Wa da ma le takhaafo min khadab Allah bas laakin le talgo niiye mukhlisa.

6Wa achaan da, waajib tikaffu al-miiri kula. Al-hukkaam humman khaddaamiin Allah wa yichtakhulu be l-khidme al-antaaha leehum di. 7Antu ayyi naadum al-cheyy al-waajib leyah. Wa l-naadum al-waajib leyah tikaffu al-miiri, kaffuuh leyah. Wa l-naadum al-waajib leyah tikaffu jamaarik, kaffuuh leyah. Wa l-naadum al-waajib leyah ihtiraam, ahtarumuuh. Wa l-naadum al-waajib leyah al-ikraam, karrumuuh.

Al-mahabba hi waajbe

8Ma tikhallu al-deen yagood foogku. Deen waahid bas gaaʼid foogku wa hu al-mahabba ambeenaatku. Wa l-naadum al-yihibb akhuuh, hu tabbag churuut al-Tawraat khalaas. 9Achaan al-wasaaya buguulu : <Ma tazna wa ma taktul dimme wa ma tasrig wa ma tatmaʼ>#13:9 Al-kalaam da talgooh fi Khuruuj 20:13-17 wa Tasniya 5:17-19. wa wasaaya aakhariin kula. Wa kulla l-wasaaya dool, zibdithum hi al-wasiiye al-tuguul : <Hibb akhuuk misil tihibb nafsak.>#13:9 Al-kalaam da talgooh fi Laawiyiin 19:18. 10Al-naadum al-yihibb akhuuh abadan ma yisawwi leyah cheyy fasil. Wa be misil da, al-naadum al-yihibb al-naas yitabbig churuut al-Tawraat be sahiih.

11Wa khalaas, taʼarfu al-wakit al-aniina gaaʼidiin foogah. Al-wakit tamma khalaas. Wa hassaʼ, waajib tugummu min noomku achaan yoom al-naja gariib leena min wakit aniina aamanna. 12Al-leel gariib yikammil wa l-nahaar jaayi gariib. Khalaas, waajib nikhallu minnina kulla fiʼil al-dalaam wa nijahhuzu nufuusna achaan niʼiichu fi l-nuur. 13Khalli haalna tukuun haal hana iyaal al-nuur. Wa khalli ma namchu fi l-safaaha wa l-sakar, wa la fi l-zina wa l-fasaad, wa la fi l-duwaas wa l-husud. 14Wa fi badal al-zunuub dool, arbutu sulubku wa khuttu fi uguulku intu khaddaamiin le Rabbina Isa al-Masiih. Wa aabo ma tichtakhulu be chahwaat al-insaan.

Currently Selected:

Rooma 13: ADT19

Highlight

Copy