Rooma 12

Al-ibaada al-waajbe

1Ya akhwaani, niwassiiku be sabab rahmat Allah al-ligiituuha, ayyi waahid minku yigaddim jismah le Allah dahiiye hayye wa mukhaddasa al-Allah yarda beeha. Wa di hi ibaaditku al-waajbe. 2Aabo ma titaabuʼu fikir naas al-dunya laakin khalli Allah yikhayyirku wa yantiiku agul jadiid al-beyah tagdaro timayyuzu al-cheyy al-Allah yidoorah wa taʼarfu al-cheyy al-adiil wa l-cheyy al-Allah yarda beyah wa l-cheyy al-tamaam.

3Wa be l-niʼma al-Allah antaaha leyi, niwassi ayyi waahid minku ma yistakbar. Khalli ayyi waahid ma yinkhachcha laakin yichiif nafsah hasab gudrat al-iimaan al-Allah antaah leyah. 4Chiifu, ayyi waahid minnina indah fi jismah aʼda katiiriin wa kulla udu ma yisawwi nafs al-khidme. 5Be misil da, aniina naas katiiriin laakin bigiina misil jisim waahid fi l-Masiih. Wa ayyi waahid minnina, hu udu fi l-jisim da wa bigi akhu le l-aakhariin kulluhum.

6Indina ataaya chig chig hasab niʼmat Allah. Wa kan Allah anta naadum gudra le yihajji kalaam naazil min Allah, khalli yihajji hasab al-iimaan. 7Wa kan Allah anta naadum gudra le yakhdim fi ust al-akhwaan, khalli yakhdim. Wa kan Allah anta naadum gudra le yiʼallim al-naas, khalli yiʼallimhum. 8Wa kan Allah anta naadum gudra le yichajjiʼ al-akhwaan, khalli yichajjiʼhum. Wa kan Allah anta naadum gudra le yanti, khalli yanti be juud. Wa kan Allah anta naadum gudra le yuguud akhwaanah, khalli yukhutt baalah wa yuguudhum adiil. Wa kan Allah anta naadum gudra le yihinn fi l-naas, khalli yihinn fooghum be farah.

9Hibbu ayyi naadum be mahabba sahiihe. Akraho al-charr marra waahid wa akurbu al-kheer gawi. 10Arraayado ambeenaatku misil akhwaan wa khalli ayyi waahid yichiil niiye achaan yihibb akhuuh be ihtiraam. 11Taabuʼu Rabbina be niiye waahide wa bala kasal. Ankarbu fi khidmit al-Rabb. 12Afraho achaan induku acham fi Rabbina. Asburu fi l-taʼab wa sallu daayman bala kasal. 13Saaʼudu al-saalihiin al-muhtaajiin wa dayyufu be farah al-diifaan al-yajuuku.

14Baaruku al-naas al-yitaʼʼubuuku. Aywa, baarukuuhum wa ma talʼanoohum. 15Afraho maʼa l-farhaaniin wa ahzano maʼa l-haznaaniin. 16Astafugu ambeenaatku wa khalli ayyi waahid ma yajʼal nafsah kabiir laakin khalli yajʼal nafsah sakhayyar. Ma tisawwu nufuusku induku irfe katiire.

17Kan naadum sawwa foogku cheyy fasil, ma tisawwu foogah cheyy fasil. Fakkuru wa sawwu al-cheyy al-kulla l-naas yardo beyah. 18Jaahudu be ayyi daliil achaan tiʼiichu be salaam maʼa kulla l-naas.

19Ya l-mahbuubiin, ma tichiilu al-taar. Khallu khadab Allah yichiil leeku al-taar achaan maktuub fi l-Kitaab : <Al-taar hanaayi. Ana bas al-nichiilah.>#12:19 Al-kalaam da talgooh fi Tasniya 32:35. Da bas kalaam Allah. 20Akheer kan titaabuʼu al-kalaam al-buguul : <Kan aduuk jiiʼaan, antiih yaakul. Wa kan hu atchaan, antiih yachrab. Kan tisawwi misil da, al-eeb yakurbah wa yabga misil jamur al-sabbooh fi raasah.>#12:20 Al-kalaam da talgooh fi Amsaal 25:21-22. 21Ma tikhallu al-charr yinnasir foogku laakin annasuru fi l-charr be l-kheer.

Currently Selected:

Rooma 12: ADT19

Highlight

Copy