Popular Bible Verses from Rooma 12

Share

Aabo ma titaabuʼu fikir naas al-dunya laakin khalli Allah yikhayyirku wa yantiiku agul jadiid al-beyah tagdaro timayyuzu al-cheyy al-Allah yidoorah wa taʼarfu al-cheyy al-adiil wa l-cheyy al-Allah yarda beyah wa l-cheyy al-tamaam.

Ya akhwaani, niwassiiku be sabab rahmat Allah al-ligiituuha, ayyi waahid minku yigaddim jismah le Allah dahiiye hayye wa mukhaddasa al-Allah yarda beeha. Wa di hi ibaaditku al-waajbe.

Afraho achaan induku acham fi Rabbina. Asburu fi l-taʼab wa sallu daayman bala kasal.

Ma tikhallu al-charr yinnasir foogku laakin annasuru fi l-charr be l-kheer.

Arraayado ambeenaatku misil akhwaan wa khalli ayyi waahid yichiil niiye achaan yihibb akhuuh be ihtiraam.

Hibbu ayyi naadum be mahabba sahiihe. Akraho al-charr marra waahid wa akurbu al-kheer gawi.

Jaahudu be ayyi daliil achaan tiʼiichu be salaam maʼa kulla l-naas.

Ya l-mahbuubiin, ma tichiilu al-taar. Khallu khadab Allah yichiil leeku al-taar achaan maktuub fi l-Kitaab : <Al-taar hanaayi. Ana bas al-nichiilah.> Da bas kalaam Allah.

Taabuʼu Rabbina be niiye waahide wa bala kasal. Ankarbu fi khidmit al-Rabb.

Wa be l-niʼma al-Allah antaaha leyi, niwassi ayyi waahid minku ma yistakbar. Khalli ayyi waahid ma yinkhachcha laakin yichiif nafsah hasab gudrat al-iimaan al-Allah antaah leyah.

Kan naadum sawwa foogku cheyy fasil, ma tisawwu foogah cheyy fasil. Fakkuru wa sawwu al-cheyy al-kulla l-naas yardo beyah.

Astafugu ambeenaatku wa khalli ayyi waahid ma yajʼal nafsah kabiir laakin khalli yajʼal nafsah sakhayyar. Ma tisawwu nufuusku induku irfe katiire.

Akheer kan titaabuʼu al-kalaam al-buguul : <Kan aduuk jiiʼaan, antiih yaakul. Wa kan hu atchaan, antiih yachrab. Kan tisawwi misil da, al-eeb yakurbah wa yabga misil jamur al-sabbooh fi raasah.>

Baaruku al-naas al-yitaʼʼubuuku. Aywa, baarukuuhum wa ma talʼanoohum. Afraho maʼa l-farhaaniin wa ahzano maʼa l-haznaaniin.

Saaʼudu al-saalihiin al-muhtaajiin wa dayyufu be farah al-diifaan al-yajuuku.

Chiifu, ayyi waahid minnina indah fi jismah aʼda katiiriin wa kulla udu ma yisawwi nafs al-khidme. Be misil da, aniina naas katiiriin laakin bigiina misil jisim waahid fi l-Masiih. Wa ayyi waahid minnina, hu udu fi l-jisim da wa bigi akhu le l-aakhariin kulluhum.