Yachuuʼ 10
10
Bani Israaʼiil annasaro fi l-Amuuriyiin
1Wa Aduuni Saadikh malik Uruchaliim simiʼ kadar Yachuuʼ chaal hillit Aay wa dammaraaha wa sawwa fi hillit Aay wa malikha misil hu sawwa fi Ariiha wa malikha. Wa simiʼ kadar sukkaan Gibʼuun sawwo salaam maʼa Bani Israaʼiil wa sakano fi usuthum. 2Wa khalaas, hu khaaf marra waahid achaan Gibʼuun hi hille kabiire misil hillaal al-muluuk wa hi kabiire min hillit Aay wa rujaalha kula fahaliin. 3Wa khalaas, Aduuni Saadikh malik Uruchaliim rassal le Huhaam malik Hibruun wa Firaam malik Yarmuut wa Yafiiʼa malik Lakiich wa Dabiir malik Agluun. Wa gaal leehum : 4«Yalla taʼaalu leyi ! Afzaʼooni wa nihaarubu Gibʼuun achaan hi sawwat salaam maʼa Yachuuʼ wa Bani Israaʼiil.» 5Wa l-muluuk al-khamsa hana l-Amuuriyiin dool wa kulla duyuuchhum macho hajamo Gibʼuun wa haarabooha. Wa humman malik Uruchaliim wa malik Hibruun wa malik Yarmuut wa malik Lakiich wa malik Agluun.
6Wa tawwaali, naas Gibʼuun rassalo le Yachuuʼ fi muʼaskar Gilgaal wa gaalo leyah : «Ma taaba musaaʼadatak le abiidak. Taʼaalu leena ajala ! Afzaʼoona wa najjuuna achaan kulla muluuk al-Amuuriyiin al-saakniin fi l-jibaal lammo wa gammo diddina.» 7Wa Yachuuʼ gamma min Gilgaal wa maʼaayah kulla l-rujaal al-muhaaribiin wa kulla l-rujaal al-furraas. 8Wa Allah gaal le Yachuuʼ : «Ma takhaaf minhum achaan ana sallamtuhum leek fi iideenak wa waahid minhum ma yagdar yagiif giddaamak.»
9Wa Yachuuʼ gamma min Gilgaal wa raakh tuul al-leel wa be khafla ja le malik al-Amuuriyiin. 10Wa Allah hazamaahum haziime kabiire giddaam Bani Israaʼiil fi Gibʼuun. Wa taradoohum ale giizaan Beet Huruun wa kataloohum lahaddi hillaal Aziikha wa Makhiida. 11Wa wakit humman muʼarridiin giddaam Bani Israaʼiil wa wassalo fi l-dilleeye hana Beet Huruun, Allah rassal fooghum barad kubaar min al-sama wa maato. Wa l-barad al-kubaar da darabaahum fi deribhum lahaddi Aziikha wa katal naas ziyaada min al-naas al-kataloohum Bani Israaʼiil be l-seef.
12Wa fi l-yoom al-foogah Allah sallam al-Amuuriyiin le Bani Israaʼiil, Yachuuʼ saʼal Allah giddaam Bani Israaʼiil wa gaal : «Ya l-harraay, agiifi saabte fi Gibʼuun ! Wa inta al-gamar, agiif saabit fi waadi Ayyaluun !» 13Wa l-harraay wagafat wa l-gamar kula wagaf lahaddi al-umma chaalat taarha fi udwaanha. Wa daahu al-maktuub fi Kitaab al-Saalih : «Al-harraay wagafat fi bakaanha fi l-sama, ma wagaʼat muddit yoom kaamil.» 14Wa l-yoom da, yoom mislah ke ma fiih wa la gablah wa la baʼadah. Wa fi l-yoom da, al-insaan saʼal wa Allah khibil suʼaalah achaan Allah gaaʼid yihaarib udwaan Bani Israaʼiil. 15Wa Yachuuʼ wa kulla Bani Israaʼiil gabbalo fi l-fariig fi Gilgaal.
16Wa l-muluuk al-khamsa al-arrado macho allabbado fi karkuur Makhiida. 17Wa naas jo gaalo le Yachuuʼ : «Al-muluuk al-khamsa anlago mullabbidiin fi karkuur hajar Makhiida.» 18Wa Yachuuʼ gaal : «Dargusu hujaar kubaar wa siddu beehum khachum al-karkuur wa khuttu naas yaharsu al-muluuk dool. 19Wa intu kamaan ma tagiifu. Aturdu udwaanku wa agtaʼo leehum al-derib. Ma tikhalluuhum yadkhulu mudunhum achaan Allah Ilaahku sallamaahum leeku fi iideeku.»
20Wa khalaas, Yachuuʼ wa Bani Israaʼiil annasaro nasur kabiir wa dammaro al-Amuuriyiin. Wa naas chiyya bas min al-Amuuriyiin gidro arrado wa nijo wa dakhalo fi mudunhum al-gawiyiin. 21Wa baʼad da, kulla l-chaʼab gabbalo le Yachuuʼ fi l-muʼaskar al-fi Makhiida be salaam. Wa naadum waahid kula min al-balad ma gidir yuguul cheyy didd Bani Israaʼiil.
22Wa baʼad da, Yachuuʼ gaal : «Fukku khachum al-karkuur wa amurgu leyi al-muluuk al-khamsa.» 23Wa be misil da, humman maragoohum le l-muluuk al-khamsa min al-karkuur wa jaaboohum giddaam Yachuuʼ. Wa humman muluuk Uruchaliim wa Hibruun wa Yarmuut wa Lakiich wa Agluun. 24Wa wakit maragoohum le l-muluuk al-khamsa wa jaaboohum giddaamah, Yachuuʼ naadaahum le kulla rujaal Bani Israaʼiil wa gaal le khuyyaad askarah al-macho maʼaayah : «Khuttu rijleeku fi rigaab al-muluuk dool.» Wa humman garrabo wa khatto rijleehum fi rigaab al-muluuk. 25Wa Yachuuʼ gaal : «Ma takhaafo wa la tinbahtu wa laakin abgo chudaad wa fahaliin. Achaan Allah yisawwi nafs al-cheyy fi kulla udwaanku al-tihaarubuuhum.»
26Wa baʼad da, Yachuuʼ katalaahum le l-muluuk al-khamsa wa allaghum fi chadar khamsa, ayyi waahid fi chadara. Wa humman gaʼado muʼallagiin lahaddi l-achiiye. 27Wa baʼad al-harraay wagaʼat, Yachuuʼ amar yinazzulu janaazaathum min al-chadar wa yazguluuhum fi l-karkuur al-awwal humman allabbado foogah. Wa saddo khachmah be hujaar kubaar wa l-hujaar dool gaaʼidiin lahaddi l-yoom.
28Wa fi l-yoom da, Yachuuʼ chaal hillit Makhiida wa katal malikha be l-seef wa dammar kulla naasha lahaddi naadum waahid minhum kula ma faddal hayy. Wa Yachuuʼ sawwa fi malik Makhiida misil sawwa fi malik Ariiha.
29Wa min Makhiida, Yachuuʼ wa kulla Bani Israaʼiil macho hillit Libna wa haarabooha. 30Wa Libna kula Allah sallamaaha hi wa malikha fi iid Bani Israaʼiil wa humman katalo malikha be l-seef wa dammaro kulla naasha lahaddi naadum waahid minhum kula ma faddal hayy. Wa Yachuuʼ sawwa fi malik Libna misil sawwa fi malik Ariiha.
31Wa min Libna, Yachuuʼ wa kulla Bani Israaʼiil macho haasaro hillit Lakiich wa haarabooha. 32Wa fi l-yoom al-taani, Lakiich kula Allah sallamaaha fi iid Bani Israaʼiil wa humman katalo kulla naasha be l-seef. Wa Yachuuʼ sawwa foogha misil sawwa fi Libna. 33Wa Huraam malik Gaazar ja fazaʼ le hillit Lakiich. Wa laakin Yachuuʼ gidir fooghum hu wa naasah wa katalaahum lahaddi naadum waahid minhum kula ma faddal hayy.
34Wa min Lakiich, Yachuuʼ wa kulla Bani Israaʼiil macho haasaro hillit Agluun wa haarabooha. 35Wa fi l-yoom da, humman chaalooha be l-seef wa dammaro kulla naasha. Wa Yachuuʼ sawwa foogha misil sawwa fi Lakiich.
36Wa min Agluun, Yachuuʼ wa kulla Bani Israaʼiil macho hillit Hibruun wa haarabooha. 37Wa humman chaalooha wa katalo malikha be l-seef wa dammaro kulla naasha wa naas al-hillaal al-taabʼiinha lahaddi naadum waahid minhum kula ma faddal hayy. Wa Yachuuʼ sawwa foogha misil sawwa fi Agluun. Dammar kulla naasha.
38Wa baʼad da, Yachuuʼ wa kulla Bani Israaʼiil gabbalo fi hillit Dabiir wa haarabooha. 39Wa humman chaalooha wa kulla l-hillaal al-taabʼiinha wa katalo malikha be l-seef wa dammaro kulla naasha lahaddi naadum waahid minhum kula ma faddal hayy. Wa Yachuuʼ sawwa fi Dabiir wa malikha misil sawwa fi Hibruun wa misil sawwa fi Libna wa malikha.
40Wa be misil da, Yachuuʼ chaal kulla l-balad yaʼni jibaalha wa junuubha wa sahalitha wa giizaanha. Hu katal muluukha lahaddi naadum waahid minhum kula ma faddal hayy. Wa dammar kulla makhluug hayy misil Allah Ilaah Bani Israaʼiil amarah beyah. 41Wa Yachuuʼ chaal kulla l-balad min Khaadich Barniiʼa wa Khazza fi l-wati lahaddi mantagat Goochan wa Gibʼuun fi l-munchaakh. 42Wa Yachuuʼ khalab kulla l-muluuk dool wa chaal buldaanhum fi wakit waahid achaan Allah Ilaah Bani Israaʼiil gaaʼid yihaarib leehum. 43Wa baʼad da, Yachuuʼ wa kulla Bani Israaʼiil gabbalo fi l-fariig fi Gilgaal.
Currently Selected:
Yachuuʼ 10: ADT19
Highlight
Copy
Compare
Share
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
