Yachuuʼ 11

Al-harib fi een Miruum

1Wa wakit Yaabiin malik Haasuur simiʼ be l-khabar da, rassal naas le yikhabburu muluuk aakhariin wa humman

Yubaab malik Maduun

wa l-malik hana Chimruun

wa l-malik hana Akchaaf

2wa muluuk jibaal al-munchaakh

wa muluuk waadi al-Urdun

junuub bahar al-Jaliil

wa muluuk sahalat Chafiila

wa muluuk giizaan Duur fi l-kharib

3wa l-Kanʼaaniyiin

al-gaaʼidiin sabaah wa kharib

wa l-Amuuriyiin

wa l-Hittiyiin

wa l-Firizziyiin

wa l-Yabuusiyiin

al-gaaʼidiin fi l-jibaal

wa l-Hiwwiyiin

al-gaaʼidiin fi gaʼar jabal Harmuun fi ard Misfa.

4Wa kulluhum marago be duyuuchhum. Wa humman katiiriin misil ramla hana khachum al-bahar be kheel katiiriin wa arabaat hana harib. 5Wa kulla l-muluuk dool lammo wa jo nazalo sawa jamb een Miruum le yihaarubu Bani Israaʼiil.

6Wa Allah gaal le Yachuuʼ : «Ma takhaaf minhum achaan ambaakir fi nafs al-wakit, ana nisallim al-muluuk dool wa askarhum kulluhum maytiin le Bani Israaʼiil. Wa inta tigattiʼ araagiib kheelhum wa titichch arabaathum hana l-harib.» 7Wa Yachuuʼ wa kulla l-rujaal al-muhaaribiin macho hajamoohum be khafla jamb een Miruum. 8Wa Allah sallamaahum le Bani Israaʼiil. Wa humman hajamoohum wa taaradoohum lahaddi Seeda al-kabiire wa lahaddi Misrafuut Maayim wa lahaddi waadi Misfa ale l-sabaah. Wa humman kataloohum lahaddi naadum waahid minhum kula ma faddal hayy. 9Wa Yachuuʼ sawwa fooghum misil Allah amarah beyah. Hu gattaʼ araagiib kheelhum wa tachcha arabaathum hana l-harib.

Yachuuʼ chaal madiinat Haasuur

10Wa fi nafs al-wakit, Yachuuʼ gabbal wa chaal madiinat Haasuur wa katal malikha be l-seef. Wa Haasuur di, hi bas zamaan aasima hana kulla l-mamaalik dool. 11Wa Yachuuʼ katal kulla naas Haasuur be l-seef wa dammaraahum lahaddi ma faddal minhum makhluug hayy. Wa baʼad da, harrag al-madiina di.

12Wa Yachuuʼ chaal kulla l-mudun dool wa katal muluukhum be l-seef. Wa hu dammaraahum misil Muusa abd Allah amarah beyah. 13Wa laakin kulla l-mudun al-gaaʼidiin fi l-jibaal, Bani Israaʼiil ma harragoohum. Illa madiinat Haasuur bas Yachuuʼ harragaaha. 14Wa kulla l-khumaam hana l-mudun dool wa l-bahaayim, Bani Israaʼiil kasaboohum misil khaniime. Wa laakin katalo kulla naashum be l-seef lahaddi ma faddal minhum makhluug hayy. 15Wa da misil Allah gaalah le abdah Muusa wa Muusa kamaan amar beyah Yachuuʼ wa da bas al-cheyy al-sawwaah Yachuuʼ. Hu tabbag kulla kalaam al-Allah amar beyah Muusa.

Yachuuʼ chaal kulla balad Kanʼaan

16Wa be misil da, Yachuuʼ chaal kulla l-balad di yaʼni jibaalha wa saharat Nagab wa kulla turaab Goochan wa sahalat Chafiila wa waadi al-Urdun wa jibaal Israaʼiil wa sahale hana khachum al-bahar. 17Wa min al-jabal al-amlas al-gaaʼid jamb Saʼiir fi l-wati lahaddi Baʼal Gaad fi waadi Lubnaan fi gaʼar jabal Harmuun fi l-munchaakh, hu karab kulla muluukhum wa katalaahum. 18Wa muddit ayyaam katiiriin, Yachuuʼ gaaʼid yihaarib fi l-muluuk dool. 19Wa hille waahide kula ma sawwat salaam maʼa Bani Israaʼiil illa l-Hiwwiyiin al-gaaʼidiin fi Gibʼuun. Wa kulla l-hillaal al-aakhariin, humman chaaloohum fi l-harib. 20Wa Allah bas gawwa guluubhum le yihaarubu Bani Israaʼiil. Wa be da, waajib Bani Israaʼiil yidammuruuhum wa ma yihinnu minhum naadum. Wa yikammuluuhum kulluhum misil Allah amar beyah Muusa.

21Wa fi l-wakit da, Yachuuʼ macha marag Bani Anakh min al-jibaal wa min Hibruun wa min Dabiir wa min Anaab wa min kulla jibaal Yahuuza wa min kulla jibaal Israaʼiil. Hu katalaahum kulluhum wa dammar hillaalhum. 22Wa min Bani Anakh waahid kula ma faddal fi balad Bani Israaʼiil. Wa laakin waahidiin minhum faddalo fi Khazza wa Gaat wa Achduud.

23Wa Yachuuʼ chaal kulla l-balad wa da hasab kalaam Allah al-gaalah le Muusa. Wa l-balad di, Yachuuʼ antaaha le Bani Israaʼiil warasa le yigassumuuha ambeenaat gabaayilhum. Wa khalaas, al-harib wagaf wa l-balad ligat al-raaha.

Currently Selected:

Yachuuʼ 11: ADT19

Highlight

Copy

Compare