1 Samuwiil 15

Chaawuul isi Allah

1Wa Samuwiil gaal le Chaawuul : «Ana bas, Allah rassalaani masahtak wa darrajtak malik fi chaʼabah Bani Israaʼiil. Hassaʼ da, asmaʼ kalaam Allah. 2Wa daahu Allah al-Gaadir gaal : ‹Ana niʼaakhib chaʼab Amaalikh fi amalhum al-sawwooh kan daharo al-derib le Bani Israaʼiil#15:2 al-Amaalikh daharo al-derib le Bani Israaʼiil Al-taariikh da talgooh fi Khuruuj 17:8-14. wakit humman maargiin min balad Masir. 3Hassaʼ da, amchi wa haarib chaʼab Amaalikh wa dammir kulla cheyy al-induhum. Wa ma tihinn fooghum ! Aktul al-rujaal wa l-awiin wa l-iyaal wa l-atfaal wa l-bagar wa l-khanam wa l-jumaal wa l-hamiir.›» 4Wa khalaas, Chaawuul lamma al-deech fi hillit Talaayim wa ligi adadhum 200 000 askari wa 10 000 min gabiilat Yahuuza.

5Wa Chaawuul macha maʼa askarah le madiinat al-Amaalikh wa karaso fi l-waadi. 6Wa Chaawuul gaal le l-Khiiniyiin : «Amurgu min ust al-Amaalikh wa amchu ! Ma nidammirku maʼaahum achaan intu sawweetu al-kheer le Bani Israaʼiil wakit humman maargiin min balad Masir.»

Wa khalaas, al-Khiiniyiin anfarago min al-Amaalikh. 7Wa Chaawuul haarab al-Amaalikh wa annasar fooghum min hillit Hawiila lahaddi gariib le hillit Chuur al-mugaabile balad Masir. 8Wa dammar kulla chaʼab Amaalikh be l-seef wa karab malikhum Agaag. 9Wa Chaawuul wa askarah khallo ma dammaro al-malik Agaag wa kulla l-bahaayim al-samhiin wa sumaan misil al-khanam wa l-bagar wa l-humlaan. Wa kulla cheyy sameh wa indah faayde ma dammarooh wa laakin dammaro kulla cheyy al-daʼiif wa l-ma indah faayde.

10Wa Allah hajja le Samuwiil wa gaal : 11«Awwal ana darrajt Chaawuul malik. Wa laakin hassaʼ, ana nidimt achaan hu abaani wa ma taabaʼ kalaami.» Wa l-kalaam da bigi le Samuwiil gaasi bilheen wa tuul al-leel hu gaaʼid yasʼal Allah.

12Wa be fajur badri, Samuwiil gamma macha le yigaabil Chaawuul. Wa oorooh kadar Chaawuul macha fi hillit Karmal sawwa leyah timsaal wa gabbal fi hillit Gilgaal. 13Wa wakit Samuwiil wassal fi bakaan Chaawuul, Chaawuul gaal leyah : «Allah yibaarikak ! Ana sawweet al-cheyy al-Allah gaalah !» 14Wa Samuwiil gaal : «Chunu al-baki hana l-bagar wa l-khanam al-gaaʼid nasmaʼ da ?» 15Wa Chaawuul gaal : «Dool al-bagar wa l-khanam al-samhiin wa sumaan al-aniina galaʼnaahum min al-Amaalikh wa l-askar khalloohum ma dammaroohum achaan yigaddumuuhum dahiiye le Allah Ilaahak. Wa laakin al-faddalo kamaan, aniina dammarnaahum.»

16Wa Samuwiil gaal le Chaawuul : «Askut ! Khalli nikallimak be l-kalaam al-Allah gaalah leyi albaareh.» Wa Chaawuul gaal : «Kallim !» 17Wa Samuwiil gaal : «Inta taʼarif nafsak kadar inta ma tisaawi cheyy wa laakin hassaʼ bigiit kabiir fi gabaayil Bani Israaʼiil. Wa Allah bas masahak wa darrajak fooghum malik. 18Wa Allah kallafaak wa gaal leek : ‹Amchi wa dammir kulla l-Amaalikh al-muznibiin wa haaribhum lahaddi tikammilhum marra waahid.› 19Wa laakin maala inta ma simiʼt kalaam Allah ? Wagaʼat fi l-khaniime wa sawweet al-fasaala giddaam Allah.» 20Wa Chaawuul gaal le Samuwiil : «Ana simiʼt kalaam Allah. Wa sawweet al-cheyy al-hu kallafaani beyah. Dammart kulla l-Amaalikh wa karabt malikhum Agaag wa jibtah ! 21Wa l-askar chaalo al-khaniime hana l-khanam wa l-bagar al-samhiin al-waajib nidammuruuhum wa khalloohum le yigaddumuuhum dahiiye le Allah Ilaahak fi Gilgaal !»

22Wa Samuwiil gaal : «Allah yafrah be dahaaya muharragiin wa be dahaaya aakhariin walla ? Walla yafrah kan titiiʼ kalaamah ? Achaan kan titiiʼah, da afdal min al-dahaaya wa kan tasmaʼ kalaamah, da afdal min chaham al-kubaach. 23Al-isyaan, hu khata misil al-hije be ilim al-kheeb. Wa gu al-raas, hu charr misil ibaadat al-asnaam ! Wa be sabab inta abeet kalaam Allah, hu kula abaak wa maragaak min al-muluk !»

24Wa khalaas, Chaawuul gaal le Samuwiil : «Ana aznabt ! Achaan khaalaft awaamir Allah wa wasiiytak inta. Ana khuft min al-rujaal al-maʼaayi wa taabaʼt kalaamhum. 25Wa hassaʼ da, min fadlak saamihni min zanbi. Wa taʼaal, nigabbulu sawa achaan ana nasjud le Allah.» 26Wa Samuwiil gaal le Chaawuul : «La, ana ma nigabbil maʼaak achaan inta abeet kalaam Allah wa Allah kula abaak. Wa battaan ma tabga malik fi Bani Israaʼiil.»

27Wa wakit Samuwiil anlafat yidoor yamchi, Chaawuul karabah min chaarib khalagah wa l-khalag ancharat. 28Wa Samuwiil gaal leyah : «Al-yoom Allah yaglaʼ muluk Israaʼiil minnak wa yantiih le naadum aakhar al-akheer minnak. 29Wa Allah al-Daayim Ilaah Bani Israaʼiil ma yakdib wa ma yandam. Achaan hu ma misil al-insaan yandam.» 30Wa Chaawuul gaal battaan : «Ana aznabt. Hassaʼ da, Allah aleek ma tiʼayyibni giddaam chaʼabi Bani Israaʼiil wa kubaaraathum. Taʼaal nigabbulu sawa wa nasjud le Allah Ilaahak.» 31Wa Samuwiil gabbal maʼa Chaawuul wa Chaawuul sajad le Allah.

32Wa Samuwiil gaal : «Jiib leyi Agaag malik al-Amaalikh.» Wa Agaag jaayi leyah farhaan wa buguul fi galbah : «Akiid ! Ana maʼa l-moot da, fakka fakka.» 33Wa Samuwiil gaal leyah : «Misil seefak bakka awiin katiiriin, ammak inta kula al-yoom tabki !» Wa Samuwiil katalah le l-malik Agaag giddaam Allah fi Gilgaal.

34Wa Samuwiil gabbal fi hillit al-Raama wa Chaawuul kamaan gabbal beetah fi Gibeeʼa. 35Wa Samuwiil hizin bilheen min Chaawuul wa ma macha chaafah lahaddi maat. Wa Allah nidim achaan darraj Chaawuul malik fi Bani Israaʼiil.

Currently Selected:

1 Samuwiil 15: ADT19

Highlight

Copy

Compare