1 Samuwiil 16

Allah rassal Samuwiil

1Wa Allah gaal le Samuwiil : «Le mata inta tahzan le Chaawuul, al-ana abeetah battaan ma yamluk fi Israaʼiil ? Hassaʼ da, chiil garnak wa amla dihin wa taʼaal nirassilak le Yassa al-min hillit Beet Laham achaan ana azalt waahid min iyaalah le yabga malik.» 2Wa Samuwiil gaal : «Kikkeef ana namchi ? Kan Chaawuul simiʼ, ma yaktulni walla ?» Wa Allah gaal leyah : «Chiil maʼaak ijle wa guul : ‹Ana jiit nigaddim dahiiye le Allah.› 3Wa taʼazim Yassa kula fi l-dahiiye di. Wa ana niʼooriik be l-cheyy al-tisawwiih. Wa tamsah wa tidarrijah leyi al-naadum al-niwassifah leek.»

4Wa Samuwiil sawwa kulla cheyy al-gaalah leyah Allah. Wa wakit wassal fi hillit Beet Laham, kulla kubaaraat al-hille barjalo wa marago le yigaabuluuh wa gaalo : «Jaytak di aafe bas ?» 5Wa Samuwiil gaal : «Aafe bas ! Jiit le nigaddim dahiiye le Allah. Khassusu nufuusku wa taʼaalu maʼaayi fi l-dahiiye di.» Wa hu khassas Yassa wa iyaalah wa azamaahum fi l-dahiiye.

Samuwiil darrajah le Dawuud

6Wa wakit Yassa wa iyaalah jo, Samuwiil chaaf Aliyaab wa gaal fi nafsah : «Akiid ! Hu da bas al-Allah darrajah. Wa daahu gaaʼid giddaamah !» 7Wa laakin Allah gaal le Samuwiil : «Ana rafadtah. Wa khalli jamaalah wa tuulah ma yaʼajubuuk ! Achaan ana ma nichiif al-achya misil al-insaan yichiifhum. Al-insaan yichiif al-zaahir bas wa laakin ana Allah nichiif al-fi l-galib.»

8Wa baʼad da, Yassa naada Abinadaab wa jaabah giddaam Samuwiil. Wa Samuwiil gaal : «Hu da kula, Allah ma azalah.» 9Wa Yassa jaab wileedah Chamma giddaam Samuwiil wa Samuwiil gaal : «Hu da kula, Allah ma azalah.» 10Wa Yassa jaab sabʼa min iyaalah giddaam Samuwiil. Wa Samuwiil gaal le Yassa : «Dool Allah ma azalaahum.» 11Wa Samuwiil saʼalah le Yassa wa gaal : «Dool bas iyaalak walla ?» Wa Yassa radda leyah wa gaal : «La. Faddal waahid wa laakin sakhayyar. Wa gaaʼid yasrah be l-khanam.» Wa Samuwiil gaal : «Rassil leyah yaji ! Aniina ma naakulu lahaddi hu yiwassil.»

12Wa Yassa rassal leyah wa jaabah. Wa hu jamiil wa loonah sameh wa uyuunah kula samhiin. Wa Allah gaal : «Da bas hu. Gumm amsahah wa darrijah !» 13Wa khalaas, Samuwiil chaal dihin min garnah wa masah Dawuud wa darrajah giddaam akhwaanah. Wa tawwaali, Ruuh Allah nazal fi Dawuud wa min al-yoom da, hu gaaʼid foogah. Wa Samuwiil gabbal fi hillit al-Raama.

Allah khallaah le Chaawuul

14Wa Ruuh Allah khalla Chaawuul. Wa ruuh fasle jaat min Allah wa gaaʼide tiʼazzibah. 15Wa khaddaamiin Chaawuul gaalo leyah : «Daahu fi ruuh fasle hana l-ilaahaat gaaʼide tiʼazzibak. 16Wa hassaʼ da, khalli inta siidna al-malik tanti izin le khaddaamiinak wa aniina namchu nifattuchu naadum al-yaʼarif yadrub jigindiiye. Achaan kan al-ruuh al-fasle hana l-ilaahaat nazalat foogak, hu yadrub al-jigindiiye. Wa da yabga leek chiyya akheer.» 17Wa Chaawuul gaal le khaddaamiinah : «Fattuchu leyi raajil al-yaʼarif yadrub al-jigindiiye wa jiibuuh leyi.» 18Wa waahid min al-khaddaamiin gaal leyah : «Daahu ana naʼarif waahid min iyaal Yassa al-min hillit Beet Laham. Hu yaʼarif daribiin al-jigindiiye wa hu raajil faaris wa muhaarib wa yaʼarif yikallim wa hu jamiil. Wa Allah maʼaayah.»

Yassa rassal Dawuud le Chaawuul

19Wa khalaas, Chaawuul rassal naas le Yassa wa gaal : «Rassil leyi wileedak Dawuud al-gaaʼid yasrah be l-khanam.» 20Wa Yassa chaal humaar wa chadda foogah khubza wa girbe hana khamar wa sakhal wa antaah le Dawuud wileedah wa rassalah le Chaawuul. 21Wa Dawuud macha le Chaawuul wa gaaʼid yakhdim leyah. Wa Chaawuul habbaah marra waahid wa sawwaah khaddaam al-yichiil leyah silaahah. 22Wa battaan Chaawuul rassal le Yassa wa gaal : «Khalli Dawuud yagood maʼaayi achaan ana ridiit beyah marra waahid.»

23Wa wakit ruuh al-ilaahaat taji fi Chaawuul, Dawuud yichiil al-jigindiiye wa yadrubha. Wa fi l-bakaan da khalaas, Chaawuul haalah tabga leyah akheer wa yirtaah wa l-ruuh al-fasle kula tikiss minnah.

Currently Selected:

1 Samuwiil 16: ADT19

Highlight

Copy

Compare