1 Samuwiil 14

Fahaaliiyit Yuunataan

1Wa yoom waahid, Yuunataan wileed Chaawuul gaal le l-sabi al-chaayil leyah silaahah : «Taʼaal, namchu le l-muʼaskar hana l-Filistiyiin al-gaaʼid fi l-nuss al-hinaak.» Wa laakin Yuunataan ma khabbar abuuh. 2Wa Chaawuul gaaʼid fi taraf hillit Gibeeʼa fi gaʼar chadarat al-rummaan fi turaab Migruun wa maʼaayah hawaale 600 raajil.

3Wa fiyah raajil waahid usmah Akhiiya wileed Akhituub akhu Ikabuud wileed Fiinhaas wileed Ali al-hu raajil al-diin hana Allah fi hillit Chiilooh. Wa Akhiiya da, hu bas kabiir rujaal al-diin wa laabis al-farmala. Wa kulla l-askar ma irfo kadar Yuunataan ma fiih.

4Wa l-derib al-Yuunataan yidoor yamchi beyah wa yahjim muʼaskar al-Filistiyiin indah hujaar itneen. Al-waahid be hini usmah Busiis wa l-aakhar be hinaak usmah Sanna. 5Wa l-hajar al-waahid gaaʼid be munchaakh mugaabil Mikmaach wa l-hajar al-aakhar kamaan gaaʼid wati mugaabil Gabaʼ. 6Wa Yuunataan gaal le l-sabi al-chaayil leyah silaahah : «Taʼaal ! Namchu le l-muʼaskar hana l-naas al-ma mutahhariin dool. Akuun Allah yisaaʼidna wa ninnasru fooghum achaan Allah gaadir, yanti al-nasur le naas katiiriin aw le naas chiyya kula.» 7Wa khaddaamah gaal leyah : «Sawwi kulla cheyy al-tidoorah ! Amchi wa ana waraak !» 8Wa Yuunataan gaal : «Yalla ! Khalli namchu leehum lahaddi yichiifuuna. 9Wa kan yuguulu leena : ‹Agiifu fi bakaanku lahaddi najuuku›, khalaas nagiifu wa ma natlaʼo leehum. 10Wa laakin kan yuguulu leena : ‹Atlaʼo›, natlaʼo leehum. Achaan di bas alaamat al-nasur wa Allah yansurna fooghum.»

11Wa khalaas, al-Filistiyiin chaafoohum tineenithum wa gaalo : «Chiifu ! Al-Ibraaniyiin maargiin min al-nugaar al-humman allabbado fooghum !» 12Wa l-hurraas gaalo le Yuunataan wa khaddaamah : «Atlaʼo leena jaay ! Niʼooruuku kalaam waahid !» Wa Yuunataan gaal le khaddaamah : «Atlaʼ waraayi achaan al-yoom Allah dassaahum fi iideen Bani Israaʼiil !» 13Wa Yuunataan talaʼ fi l-hajar wa khaddaamah talaʼ waraayah. Wa hu katal al-Filistiyiin. Wa khalaas, al-Filistiyiin anhazamo giddaam Yuunataan. Wa khaddaamah kula gaaʼid yaktulhum waraayah. 14Wa fi l-duwaas al-awwal da, Yuunataan wa khaddaamah katalo hawaale 20 raajil fi masaafa gariibe bas.

15Wa khalaas, khoof chadiid wagaʼ fi kulla deech al-Filistiyiin wa fi kulla sukkaan al-mantaga wa l-gaaʼidiin fi l-muʼaskar. Wa l-hurraas wa l-mukharribiin kulluhum barjalo. Wa l-ard kula rajafat achaan al-Rabb bas nazzal fooghum al-barjaal da.

16Wa hurraas Chaawuul al-gaaʼidiin fi Gibeeʼa ard Banyaamiin gaaʼidiin bichiifu al-Filistiyiin barjalo wa jaariyiin fi ayyi bakaan. 17Wa Chaawuul gaal le l-rujaal al-maʼaayah : «Ajala ahsubu al-naas al-gaaʼidiin wa chiifu yaatu al-ma fiih !» Wa humman hasabo al-naas wa ligo Yuunataan wa khaddaamah ma fiihum.

18Wa Chaawuul gaal le Akhiiya : «Jiib sanduug Allah !» Achaan fi l-wakit daak, sanduug al-Rabb gaaʼid fi bakaan Bani Israaʼiil. 19Wa wakit Chaawuul gaaʼid yikallim maʼa Akhiiya raajil al-diin, al-korooraak gaaʼid yiziid fi muʼaskar al-Filistiyiin wa tawwaali Chaawuul gaal le raajil al-diin : «Agiif ! Khalaas khalliih !»

20Wa Chaawuul lamma kulla l-rujaal al-maʼaayah wa dakhalo fi l-harib. Wa humman ligo al-Filistiyiin gaaʼidiin yilkaatalo ambeenaathum. Wa l-barjala di bigat chadiide. 21Wa fi Ibraaniyiin waahidiin tawwalo maʼa l-Filistiyiin wa gaaʼidiin yihaarubu maʼaahum. Wa fi l-yoom da, humman lammo maʼa akhwaanhum Bani Israaʼiil al-taabʼiin le Chaawuul wa Yuunataan. 22Wa wakit simʼo al-Filistiyiin arrado, kulla rujaal Bani Israaʼiil al-mullabbidiin fi jibaal Afraayim, humman kula dakhalo fi l-harib le yitaarudu al-Filistiyiin. 23Wa fi l-yoom da, Allah najja Bani Israaʼiil. Wa l-harib lihig lahaddi khaadi le hillit Beet Awan.

24Wa rujaal Bani Israaʼiil tiʼibo fi l-yoom da achaan Chaawuul hallafaahum wa gaal : «Malʼuun al-naadum al-yaakul gubbaal al-achiiye, gabul ma ninnasir fi aduuyi !» Wa fi l-yoom da, kulla rujaal Bani Israaʼiil ma akalo cheyy. 25Wa kulla l-deech dakhal fi l-khaaba wa hinaak fiyah asal gaaʼid yisiil fi l-ard. 26Wa wakit dakhalo fi l-khaaba, chaafo al-asal al-gaaʼid yisiil fi l-ard laakin naadum ma akal minnah achaan khaafo min al-haliife.

27Wa Yuunataan ma simiʼ kadar abuuh hallaf al-askar wa gamma madda asaatah al-fi iidah wa chakka raasha fi l-asal wa akalah. Wa tawwaali ke, jildah bigi nachiit. 28Wa waahid min al-askar gaal leyah : «Abuuk hallaf al-askar wa gaal : ‹Malʼuun al-naadum al-yaakul fi l-yoom da.› Wa achaan da bas, kulla l-deech bigi ayyaan.» 29Wa Yuunataan gaal : «Abuuyi sabbab barjaal le kulla l-askar. Chiifuuni ana, kikkeef bigiit nachiit wakit dukht al-asal da. 30Wa kan al-yoom al-askar akalo min al-khaniime al-chaalooha min aduuhum di, akiid haziimat al-Filistiyiin tabga akbar min da.»

31Wa fi l-yoom da, Bani Israaʼiil annasaro fi l-Filistiyiin wa kataloohum min Mikmaach lahaddi hillit Ayyaluun. Wa askar Bani Israaʼiil iyo marra waahid. 32Wa wagaʼo fi l-khaniime wa chaalo al-khanam wa l-bagar wa l-ajjaal wa kataloohum wa akalo al-laham be dammah fi nafs al-bakaan. 33Wa naas waahidiin jo khabbaro Chaawuul kadar al-askar aznabo wa iso Allah achaan akalo al-laham be dammah. Wa Chaawuul gaal : «Intu khaayniin. Hassaʼ da, dargusu hajar kabiir wa jiibuuh leyi hini.» 34Wa Chaawuul gaal : «Amchu ambeen al-askar wa guulu leehum : ‹Khalli ayyi waahid yijiib leyi khanamaaytah aw toorah wa yadbahoohum hini wa yaakuluuhum. Achaan ma taakulu laham be dammah wa tisawwu zanib wa taʼaso Allah.›»

Wa khalaas fi l-leele di, ayyi waahid min al-askar jaab toorah wa dabahah fi l-bakaan da. 35Wa Chaawuul bana madbah le Allah wa da awwal madbah al-hu bana le Allah. 36Wa Chaawuul gaal : «Khalli al-leele di namchu wara l-Filistiyiin wa naglaʼo khumaamhum lahaddi l-fajur. Wa ma nikhallu waahid kula minhum yifaddil.» Wa l-askar raddo leyah wa gaalo : «Sawwi kulla cheyy al-tidoorah.»

Wa laakin raajil al-diin gaal : «Khalli hini bas nasʼalo al-Rabb.» 37Wa Chaawuul saʼal al-Rabb wa gaal : «Namchi wara l-Filistiyiin walla ? Tisallimhum fi iideen Bani Israaʼiil walla ?» Wa laakin al-Rabb ma radda leyah fi l-yoom da. 38Wa Chaawuul gaal le kulla kubaaraat al-deech : «Limmu wa taʼaalu. Khalli al-yoom nichiifu wa naʼarfu chunu al-sabab hana l-zanib da. 39Wa nahlif be Allah al-Hayy al-najja Bani Israaʼiil, al-naadum al-sawwa al-khata da kan wileedi Yuunataan kula, al-yoom yumuut.» Wa naadum min al-deech radda leyah ma fiih.

40Wa hu gaal le kulla Bani Israaʼiil : «Agiifu intu be hinaak wa ana wa wileedi Yuunataan nagiifu be hini.» Wa l-askar gaalo le Chaawuul : «Sawwi kulla cheyy al-tidoorah.»

41Wa Chaawuul gaal le Allah Ilaah Bani Israaʼiil : «Wassifna al-hagg !» Wa sawwo amʼiyeedaat. Wa khalaas, wagaʼat fi raas Yuunataan wa Chaawuul wa l-askar bigo bariyiin. 42Wa Chaawuul gaal : «Sawwu amʼiyeedaat beeni wa been wileedi Yuunataan !» Wa khalaas, wagaʼat fi Yuunataan.

43Wa Chaawuul gaal le Yuunataan : «Ooriini al-cheyy al-inta sawweetah.» Wa Yuunataan hajja leyah wa gaal : «Ana dukht al-asal be raas al-asa al-fi iidi. Wa daahuuni le l-moot.» 44Wa Chaawuul gaal : «Khalli al-Rabb yiʼaakhibni ikhaab chadiid kan inta ma mutt, ya Yuunataan !»

45Wa l-askar gaalo le Chaawuul : «Yuunataan al-jaab al-nasur al-kabiir le Israaʼiil da, yumuut ? Da ma sahiih ! Nahalfu be Allah al-Hayy, suufaay waahide kula min raasah ma tagaʼ fi l-ard ! Achaan fi l-yoom da, hu najja Bani Israaʼiil be gudrat Allah. La ! Yuunataan ma yumuut.»

Wa be da, al-askar najjo Yuunataan min al-moot. 46Wa baʼad Chaawuul khalla mutaaradathum, al-Filistiyiin gabbalo fi baladhum.

Chaawuul annasar fi udwaan aakhariin

47Wa wakit Chaawuul chaal al-muluk fi Israaʼiil, hu haarab kulla udwaanah al-mujaawiriinah misil naas Muwaab wa Bani Ammuun wa naas Adoom wa muluk Suuba wa l-Filistiyiin. Wa fi ayyi bakaan yiwajjih, hu yinnasir. 48Wa hu wassaf faraasiiytah wakit hazam al-Amaalikh wa najja Bani Israaʼiil min al-naas al-yanhaboohum.

49Wa awlaad Chaawuul humman Yuunataan wa Yichwi wa Malkichuuʼ. Wa banaatah kamaan itneen al-kabiire usumha Miirab wa l-sakhayre usumha Mikaal. 50Wa marit Chaawuul usumha Akhinuuʼam bineeyit Akhimaaʼas. Wa khaayid askarah usmah Abniir wileed Niir. Wa Niir da, hu immah le Chaawuul. 51Niir abu Abniir wa Khiich abu Chaawuul, humman kulluhum iyaal Abiyiil. 52Fi wakit Chaawuul, al-harib didd al-Filistiyiin bigi chadiid bilheen. Wa Chaawuul gaaʼid yijannid kulla l-rujaal al-fahaliin wa l-gaadriin.

Currently Selected:

1 Samuwiil 14: ADT19

Highlight

Copy

Compare