M̀ɛni-sâa Ƃó-ƃelai 19
19
Dí Liiva naloŋ ŋɔnɛnî-loŋ pàa
1Kâloŋ é lɛ́ɛ pâi kɛ̂i Eezuɛ lɔii mɛi, Liiva naloŋ tɔnɔ è kɛ̀ naa. Ǹalôŋ ŋí seɛ́ɛ è kɛ̀ Ifiraŋ lɔii kpiniŋ su kwaa kôyaa ma. Liiva naloŋ ŋí ŋɔnɛnî-loŋ è kùla Bɛpeleɣɛ̃ɛ taai su, Zuda lɔii kpiniŋ su. 2Kɛ́lɛ ǹɛnîi ŋí fé kɛ́ ní a deniŋ ƃóɔɔ dítûa-laai su. È ǹíi ŋ̀wana é kùla ŋɔsurɔ̂ŋ pɔ́-naa é lí ǹâŋ ŋɔpɛ́rɛi lá Bɛpeleɣɛ̃ɛ. È gɛ̀ naa a ɣáloŋ náaŋ. 3Nya ƃe ŋɔsurɔ̂ŋ è ǹyée mu nuui dɔnɔ sìɣe da wɛlɛ soo feerɛ dí láaŋ ma. È làaŋ ma a gɛ́ɛ da ǹyaa dí díloai kpɛtɛ dí lí pôlu. Ǹɛnîi kɛ́ɛ a gáai, è lì la ǹâŋ ŋɔpɛ́rɛi lá. Ǹâŋ líi è nɛ̃ɛ é ǹyée sée mu. 4Ǹɛnîi ǹâŋ è mò ma a gɛ́ɛ dí nyíi naa. Dí gɛ̀ naa a fólo saaƃa díkɛ dílaa mìi díkɛ lii-nɛ̃ɛ kùla gîe ma. 5Ŋ̀ele kûui ǹáaŋ ɣele wâla pɛpɛi, Liiva naloŋ è ŋɔsãâi sîɣe a gɛ́ɛ é lí. Kɛ́lɛ m̀ɔ̂lɔ è mò ma ǹyɛɛ, “Ye maa kpɛ̂ŋ kɛ́ dí mii-sɛŋ kpɛtɛ í mii, íkponôi é kpanaŋ ílɛɛ pâi liî.”
6Ǹalôŋ da m̀ɔ̂lɔ dí dílaa mìi gîe ma. Nyíŋi pôlu ma, m̀ɔ̂lɔ è ŋɔ́nɔ mò ma ǹyɛɛ, “Kpera yɛ̂ gbíni tɔnɔi ŋí kɛ́ ƃɛ́ sâa í ínîa kɛ́.”
7Ǹalôŋ è mù sìɣe a gɛ́ɛ é lí. Kɛ́lɛ m̀ɔ̂lɔ fé faa ní. È ŋɔ́nɔ kpíni tɔnɔ kɛ̀ naa. 8Ŋ̀ele kûui ǹɔ́ɔlu ɣele wâla pɛpɛi, è mu sìɣe a gɛ́ɛ lí bɔ́-taai. Kɛ́lɛ m̀ɔ̂lɔ è ŋɔ́nɔ mò ma a gɛ́ɛ é lɛ́ɛ naa da ǹyaa dí mii-sɛŋ mii gîe ma, vóloi a pène é lɛ́ɛ pâi liî. Dí ŋɔ́nɔ dílaa mìi gîe ma.
9Vóloi kɛ́ɛ a penei, Liiva naloŋ, ŋɔnɛnîi-loŋ da ǹyée mu nuui dí nâa dímu sìɣe a gɛ́ɛ dí lí. Nya ƃe m̀ɔ̂lɔ è mò dîa ǹyɛɛ, “Vóloi aâ gbâa lí. M̀ɛni ma kwaa nyíi ƃɛ́ ká kánîa kɛ́. Ka pâi tínaa liî a ɣele wâla pɛpɛ.”
10-11Kɛ́lɛ Liiva naloŋ fé fáa ní. È ŋɔwɛlɛ soo feerɛi pôlu sãai pɛ̀lɛ dípôlu, dí sée dímɛi dí lí a Zerusâlɛŋ perei. Dí seriɛɛ́ Zɛbu taa leei (bere ƃé da kâa Zerusâlɛŋ taa leei tôli la) kɔlɛ ma, Liiva naloŋ yée mu nuui è mò ma ǹyɛɛ, “Kwaa nyíi sâa Zɛbu taa leei ŋí su, kpɛ́ni fêi, vóloi aâ lí.”
12-13Kɛ́lɛ ǹalôŋ è mò ǹyée mu nuui ma ǹyɛɛ, “Kpa. Ǹûai ŋí dífe a kúai a Eezuɛ nuu suui kúta. M̀ɛni ma, fé nyiî dítaai da su. Vóloi kɛ̂tɛi niî. Kwa pɔ̂ri liî Giƃia kpaa máŋ Lama kú nyíi naa.” 14Nya ƃe dí tɛ̀ɛ naa. Dí seriɛ́ɛ Giƃiai, vólo káoi è nâa yèŋ lɔɔ pôlu. Giƃia taai è kɛ̀ Bɛŋsima lɔii kpiniŋ su. 15Dí kùla bere lêei ma dí lí Giƃia taai su. Dí lì dí sée daa kêre kɛ́tɛi mu. Kɛ́lɛ núu da fé dílâai kula ní.
16Díkɛɛ naai, siɛ-pɔ́lɔ tɔnɔ è kùla ŋɔtíi kɛ́ɛi su a ŋ̀ele wûlii é pá é díkaa. Ziɛ-pɔlɔi ŋí è kɛ̀ a ǹyée lɔii su, Ifiraŋ lɔii kpiniŋ su-nuu. Kɛ́lɛ zeɛ́ɛ è kɛ̀ Giƃia taai su. (Diai kɛ̀ Giƃia díkɛ̀ a Bɛŋsima suui su-ƃela.) 17Ziɛ-pɔlɔi ŋí è Liiva naloŋ ni kàa daa kêrei mu. È lì naa é dímarê kɛ́ ǹyɛɛ, “Ká kùla mí? Ka liî mí?”
18Ǹalôŋ ǹyɛɛ m̀ai, “Kwa kulâi naa kàa kɛ̂i Bɛpeleɣɛ̃ɛ, Zuda lɔii kpiniŋ su. Kwa kɛ́ lenêi pôlu kúpɔ-taai ǹyée lɔii su, Ifiraŋ lɔii kpiniŋ su. Kɛ́lɛ núu da fé niî kútoli ní a gɛ́ɛ é Kúlâai kula. 19Kú pà a mii-sãa kútaa tulɛ-ŋai mɛ̂ni ma. Kú pà a kpólo da ŋwã̂ai kúa kpîŋ kúmɛni ma. Kɛ́lɛ berei máŋ zãâi ŋí káa la kúyêei, núu da fé niî kúlâai kùla ní.”
20Nya ƃe ziɛ-pɔlɔi è mò dîa ǹyɛɛ, “Kwaa lí ŋápɛrɛi lá ká nyíi naa. Ŋa pâi zɛŋ kélee tɛɛ̂i kápɔ ka ŋ̀wɛ̂lii. Kɛ́lɛ káfe nyìi daa kêrei ŋí mu.” 21Nya ƃe è lí a dia ŋɔpɛ́rɛi lá. È yá tɛ̀ɛ dípɔ dí díkɔɔ ma wáa, é mii-sɛŋ tɛɛ dípɔ. È mii-sãa tɛ̀ɛ díwɛlɛ-sôo-ŋai pɔ́ máŋ.
22Ŋ̀ele wûlii tí, ziɛ-pɔlɔi da Liiva naloŋ ni dí kɛ̀ seeni bɛ́rɛi mu díkɛ lii-nɛ̃ɛ kùla gîe ma. Ŋwana lɔɔ-sinaa díkɛ̀ daai ŋí su. A naa maa félaa zinâai ŋí dí pà dí tínaŋ bɛ́rɛi ma. Dí pɛ̀lɛ gbôŋ tuáa ma díkɛ làɣi dîyɛɛ ziɛ-pɔlɔi mai, “Ǹalôŋ tí pà ípɛrɛi mui, kula la ŋ̀énei ŋá í dɛɛ kúpɔ, kú nyíi la.”
23Nya ƃe ziɛ-pɔlɔi è kùla ǹyɛɛ dîai, “Ée ńâwoi ni, káfe m̀ɛni sîi nyɔ́mɔɔi ŋí kɛ̀. Ǹalôŋ ŋí káa a ŋáŋɔ̃ya. Káfe m̀ƃaa kula maa sîi ŋí kɛ̀ la. 24Ńoŋ nɛnii káa a nɛnî-kpela. Ka lí la da ǹalôŋ kpîŋ ŋɔnɛnî-loŋ ká nyíi a dia. M̀ɛnii kélee ka ŋ̀wɛ̂lii ká gɛ́ a dîai kà gɛ́. Kɛ́lɛ káfe m̀ƃaa kula maa tuai ŋí kɛ̀ a ǹalôŋ ŋí.” 25Kɛ́lɛ zinâai ŋí dífe díwoli tɔɔ ní ziɛ-pɔlɔi ŋí ma. Nya ƃe Liiva nalôŋ è ŋɔnɛnî-loŋ tùaŋ dîa. Dí nyìi la a ƃaa kûla-maa pere. Dí lɛ̀ɛ ma é lɛ́ɛ la zu ɣele kɛ́ pà ƃɔ̂i. Ɣele kɛ́ɛ pâi ƃɔ̂i, dí ǹɛɛ naa é lí.
26Ǹɛnîi è nâa lène pôlu a bôlu ma ɣele ƃɔi, é lí bɛ́rɛi lá bɔ̂ŋ è nyìi mui. Kɛ́lɛ pɔri mâa fé kɛ́ ní mì a gɛ́ɛ é lɔ́ bɛ́rɛi mu. È tòo gbôŋ lá é lɛ́ɛ naa kwaa é pono. 27Ɣele ƃɔ́ɔi, bɔ̂ŋ è bɛ́rɛi lá ƃò nɔ́ a gɛ́ɛ é lí, é gáa lâani bɛ́rɛi lá. Ǹɛnîi è ǹyée zãa gbôŋ ma pere a gɛ́ɛ é zóŋ. 28Ŋɔsurɔ̂ŋ è mò ma ǹyɛɛ, “Ímu siɣe kú lí.” Kɛ́lɛ vé ŋ̀óo su too ni, kpɛ́ni fêi, è nâa sàa. Ǹalôŋ è boma sîɣe é gbɛyâŋ ŋ̀wɛlɛ-sôoi mɛi é lí la bɔ́-taai. 29Zeriɛ́ɛ la bɔ́-taai, è ƃóa sìɣe é ŋɔnɛnîi su tée a gbua-kpua puu káo feerɛ. È gbua tɔnɔ-tɔnɔ tɛ̀ɛ Eezuɛ-nuu suu puu káo feerɛi pɔ́ a tɛɛ-ŋa. 30Diai kélee gàai, dí mò dîyɛɛi, “É síɣe tãi ma Eezuɛ-ŋai dí kùla la Ize lɔii sui, m̀ɛni sîi ŋí da fé tá kɛ́ ní. M̀ɛni ma fɛ̂ɛ kú mɛni da kɛ́ é pîlaŋ ma! Ka zìɣe a gbanaŋɔɔ! Ka m̀ɛnii ƃó kûa nyíi kwa pɔ̂ri gɛ̂i!”
Currently Selected:
M̀ɛni-sâa Ƃó-ƃelai 19: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
