Azaya 55
55
Ɣâla ŋɔmaloŋ kâai
1Yâwɛɛ a m̀ôi ǹyɛɛi,
“Ka pá, káai kélee kpele-wɛ̂li káa kâai.
Yá káa ƃɛ́ kámɛni ma!
Ka pá káai kélee sɛŋ-kao fé káyêei,
ka pá ká mii-sãa yá ká m̀ii.
Ka pá ká ŋwã̂ai da niŋa ŋíni-ya yá.
Káfe pâi seŋ kâo kpɛɛ̂i dímɛni ma.
2Lé ƃe kà káyêei sɛŋ-kao kɔlɛ̂i la sãâ pôlu, m̀aa sãai dífa kálii laai?
Lé ƃe kà mɔ̃lɛ̂i la mii-sã̂a mɛni ma m̀aa mii-sãai dífa kápelai?
Ka káwoli tɔ́ɔ ḿâ, ká m̀ɛnii mɛ́ni ŋa pâi m̀ôi kâai.
Kà gɛ̀ tí, ka pâi kɛ̂i mii-sã̂a lɛ́lɛɛ-ŋa ŋ̀aa nɛ̃̂ɛ kulâi.
3“Ŋánûa, ka káwoli tɔ́ɔ ḿâ, ká pá ḿbɔ.
Kà pà ḿbɔ, ka pâi lɛɛ̂i ɣele ma.
Ŋa pâi wɔ́lɔ-wɔlɔ da wɔ́lɔ-wɔlɔ kpanaŋ-woo kɛ̂i káyêei.
Ŋa pâi lûwa lâai kâa yɛ̂ɛ berei ŋá wɔ́lɔ ŋ́gono tèe la Deeƃé yêei,
a ŋáwɔlɔ-wɔlɔ da wɔ́lɔ-wɔlɔ wɛli kɛ́-maai.
4Ŋá gɛ̀ a sêre ǹɔii-ŋûŋ-ŋai mɛni ma,
ŋá gɛ́ a nûa láa túɛ-nuu gɛ́ díteniŋ tɔ̀ɔ.
5Ŋa pâi gɛ̂i ǹɔii-ŋuŋ da kpɛ́ni-ŋai
zu-ƃela dífe kɛ́ ní a íkɔlɔŋɔɔ̂i,
dí pá ípɔ a kîrɛ.
Ńyãa Yâwɛɛ, Eezuɛ Ɣala Maa Waai,
ŋa pâi gɛ̂i é kɛ́ tí.
Ŋa pâi gɛ̂i ímu é wuyɛ, ƃaa kɛ́-maa támaa kɛ́ ƃò yâ.”
6Ka tínaŋ a Yâwɛɛ pɔ́ naa pere ká kɛ́ vɛ̀li a ɣele kélee.
Ka dóli tãi ǹɛɣɛ̂i la a káai.
7Ŋwana-lɔ̂ɔ-ƃela, ka kátûa-pere maa fáleŋ.
Káai káfe a teniŋ ƃô-ƃelai, ka kákili ŋá sîai nyɔ́mɔɔ-ŋai maa fáleŋ.
Ka tínaŋ Yâwɛɛ pɔ-naa pere.
Kà gɛ̀ tí, a pâi kámalôŋ kâai, é kásu-mɛ̂ni lɛɛ.
Kwaa tínaŋ Yâwɛɛ Kúɣâlai pɔ́naa pêre.
8Yâwɛɛ è m̀o ǹyɛɛi, “Ŋákili ŋa-sia-ŋai fé yɛ̂ɛ káwɔ̂-ŋai,
kpaa máŋ ńdûa-pere-ŋai kɛ́ ƃò yɛ̂ɛ káwɔ̂-ŋai.
9Berei nɔ́ ŋ̀ele-kɔ̂lɔŋ káa la ǹɔii mɛi-pere póŋ-poŋ,
bere nɔ́ ƃé ŋákili ŋa-sîa-ŋai da ŋámɛni ŋá káai káa la káwɔ̂-ŋai mɛi-pere.
10“Ŋ́oo káa yɛ̂ɛ lúu da tuna.
Lúu kpaa máŋ tuna a pù lɔii ma, a ǹɔii yɔ̀ɔ.
À gɛ̀ sí-sãa dí kpɛ̀tɛ,
mii-sã̂a támaa kɛ̀ ƃò naa mìi mɛ̂ni ma.
11Bere ƃé a pâi kɛ̂i la a ŋ̀óoi ŋá mòi.
M̀ɛnii kélee ŋá gbɛ̀tɛi, da fa fɛ̂ɣɛ.
Ŋ́oo fé pâi pâi pôlu ḿbɔ kpɛ́ni, fɛ̂ɛ é m̀ɛnii kɛ́ ŋá dɛ̀ɛ a gɛɛ é gɛi.
12“Ka pâi kulâi Babelɔŋ a lii-nɛ̃ɛ,
ka lí lii-sêe su.
Ǹyée kpaya-kpayai da bɛlɛ-pɛlɛɛi da pâi kɛ̂i wule-ŋa toôi.
Ŋ̀úru-ŋai dia máŋ da pâi kɛ̂i díyee ŋá lôkwai a lii-nɛ̃̂ɛ pere.
13Ƃɛ́i-ŋai ɣalêŋ kpɔlɔ-ŋa díkɛ̀ naai, sapɔlɔ-wúru kpanaŋ lɛ́lɛɛ-ŋa da pâi kpɛtɛ̂i naa.
Ƃɛ́i-ŋai kala nyɔ́mɔɔ-ŋa da kâa kpɛ̀tɛ naai, matɔ-wuru-ŋa da pâi kpɛtɛ̂i naa.
Da pâi kɛ̂i naa a wɔ́lɔ-wɔ́lɔ da wɔ́lɔ-wɔlɔ ŋɛi-kɛ-maa.
Da pâi kɛ̂i naa a ńyãa Yâwɛɛ ŋá gɛi, ḿaa kili too-ŋa.”
Currently Selected:
Azaya 55: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
