Azaya 54
54
Yâwɛɛ è Eezuɛ-ŋai wɛ́lini
1Zerusâlɛŋ, íkaa nɔ́ yɛ̂ɛ kpóma nɛ̂ni.
Kɛ́lɛ wule tóo, í koi-nɛ̃ɛ kula.
Ya pá nîa-pɛlɛɛ támaa maa sɔlɔ
ƃôi é tɛ́ɛ ǹɛnîi ma da bɔ̂ŋ díkaa niî tûai.
2Íƃûui íkaa mùi, zu kɛ́tɛ í mù-seɣe-ŋai fúloŋ a zu kɛ́tɛ.
Bîlaŋ wuru-ŋai da dɔɔ wuru-ŋai kɛ́ a gbanaŋɔɔ.
3Ya pâi ílɔii ŋɔkoyaŋ-perei kulâi pôlu m̀éla kélee ma.
Ínûai da pâi seêi ǹɔii ma
nyii ǹɔii-ŋuŋ da kpɛ́ni su-ƃelai díkaa naai.
Daa-lêe-ŋai lɛ̂ɛ a pilêŋ ŋái, ǹaa láa a pâi fɛ̂ɛi a núu-kpune.
4Ífe yào, núu da fé pâi ŋɔ́nɔ ƃâa kulâi yâm
íƃɛlɛ é tóo.
Ya pâi niâi ŋ̀umɛi ma íkɛ zu ínuu-tɔɔ-laai sui.
Ŋ̀umɛi íkɛ zu ípɔɔ-nɛ̂ni-laai sui, ya pâi niâi gélee ma.
5Íkpɛtɛ-nuui a pâi kɛ̂i yɛ̂ɛ ípɔ̂ŋ.
Íkpɛtɛ-nuui kpîŋ láa ƃa Ŋ̀wála-wâla kélee Yâwɛɛ.
Eezuɛ Ŋɔɣâla Maa Waai ƃa íŋuŋ ma ƃó nuui.
Ǹyaa ƃa ŋ̀éniɛi kélee kpɛtɛ Ɣâlai.
6Eezuɛ, íkaa yɛ̂ɛ nɛnî kpela,
nyíi bɔ̂ŋ a ǹyée kúla m̀u, ǹíi toɔ́ɔ pôlu a ŋ̀ánaai.
Kɛ́lɛ Ɣâla a ítoli pôlu ǹyɛɛi,
7“Ŋá ńyee kùla ímu a tãi kpua loŋ.
Kɛ́lɛ wɛli kɛ́-maa kpânaŋ sarâi, ŋa pâi ílɛɣɛ̂i ḿâ.
8Ŋá ńii ŋwàna yâ, ŋá ŋ́ɛi lóo yâ tãi kpua yée mu,
kɛ́lɛ ŋa pâi íŋɛi malôŋ kâai ŋáwɛli kɛ́-maa kpanaŋ sarâi, wɔ́lɔ-wɔlɔ da wɔ́lɔ-wɔlɔ.”
Ńyãa Yâwɛɛ ká ƃálo-nuui ƃé mò tí.
9“Ŋá wɔ́lɔ ńgono tèe Nôa yêei
a gɛ́ɛ fé pâi ǹɔii su-karâi a yá.
M̀ɛni ma, ŋà ŋ́gono tée a gɛ́ɛ fé pâi ŋɔ́nɔ ńii ŋwânai yâ a dɔnɔ kpîŋ.
Fé pâi lônoi yâ, kpaa máŋ ŋá íkula maa kɛ́.
10Ǹyée kpaya-kpayai da bɛlɛ-pɛlɛɛi da pâi wôlo zu,
kɛ́lɛ ŋáwɔlɔ-wɔlɔ wɛli kɛ́-maai kóyaŋ fé m̀a.
Ŋákpanaŋ-wooi tɔɔ̂i nɔ́ ƃa dɔɔ̂i.”
Ńyãa Yâwɛɛ ŋámaloŋ kâai káa nɔ́ naa ímɛni ma.
Zerusâlɛŋ ninai
11Yâwɛɛ a m̀ôi ǹyɛɛi,
“Óo Zerusâlɛŋ taa-leei, yái pɔ̂ri mâa fé yɛ̂, íkɛ mɔ̃lɛi,
nyii núu da fé naa é íŋa-nɛnɛi,
ŋa pâi íkpôŋ seêi sãai kɛ̂i a kɔni sɔ̃ɔ kpanaŋɔɔ-ŋa.
12Ŋa pâi yeŋkêŋ-ŋa tɔɔ̂i a kɔni sɔ̃ɔ kpanaŋɔɔ-ŋa,
ŋá ká siɣãŋ-ŋai lá-sãai kpɛtɛ a kɔni fóloɔ yɛ̂ɛ ŋɔŋ lêŋ
ŋá kásiɣãŋ-ŋai tɔ́ɔ a kɔni sɔ̃ɔ kpanaŋɔɔ-ŋa.
13“Ńyãa kpîŋ ŋa pâi sɛŋ-lɛ̂i kálônii sinaai dîa.
Ŋa pâi gɛ̂i díƃûu ƃó, dílii seɛɛ.
14Teniŋ-ƃô da tɔ̃yâ-laa da pâi gɛ̂i ká tɔɔ̂i é kpanaŋ.
Núu da fé pâi ká lúanîi, kpaa máŋ é ká maa-yao.
Mɛni mĩli-miliɛɛ da fé pâi kulâi káŋɛi é gɛ́ ká yao.
15À kɛ̀ núu da a kɔ́ pɛ̀lɛ kâa,
gɛ̀ ní ńyee fé zu.
Ǹúui nyii kélee paî kɔ̂i kápɔi, káyee a pâi tɛɛ̂i m̀a.
16“Ńyãa ƃé kɔli-ɣale-ƃela kpɛ̀tɛ.
Da filɛ-ŋa kpɛ̀tɛ, díkɛ dífɛ̀ɛ vilɛ kêre-ŋai mu, díkɛ kɔ́ kɔ́-sãa kpɛ̀tɛ naa.
Ŋá kɔ́ kɔ́-ƃela kpɛ̀tɛ máŋ.
Dia ƃa gɔli-sãai ŋí sìɣe, díkɛ nûa pàa a dia.
17Kɛ́lɛ núu da fé pâi pɔrîi mɛni da kɛ̂i a káa a gɔ́ kɔ́-kɔli sãai ŋí da.
Núu da a lɛ́ɛ mɛni da ƃò a kálaa, ka pâi zu kula pêre kɔ́lɔnîi.
Ŋa pâi ŋátii kɛ́-ƃelai maa kɔ̃ɔ̂i,
ŋá gɛ́ díkpɔara-ƃelai da yée fa pɔ̂ri dîa.”
Ńyãa Yâwɛɛ ƃé m̀o tí.
Currently Selected:
Azaya 54: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
