Popular Bible Verses from Azaya 55

Share

Yâwɛɛ è m̀o ǹyɛɛi, “Ŋákili ŋa-sia-ŋai fé yɛ̂ɛ káwɔ̂-ŋai, kpaa máŋ ńdûa-pere-ŋai kɛ́ ƃò yɛ̂ɛ káwɔ̂-ŋai.

Berei nɔ́ ŋ̀ele-kɔ̂lɔŋ káa la ǹɔii mɛi-pere póŋ-poŋ, bere nɔ́ ƃé ŋákili ŋa-sîa-ŋai da ŋámɛni ŋá káai káa la káwɔ̂-ŋai mɛi-pere.

Ka tínaŋ a Yâwɛɛ pɔ́ naa pere ká kɛ́ vɛ̀li a ɣele kélee. Ka dóli tãi ǹɛɣɛ̂i la a káai.

Ŋwana-lɔ̂ɔ-ƃela, ka kátûa-pere maa fáleŋ. Káai káfe a teniŋ ƃô-ƃelai, ka kákili ŋá sîai nyɔ́mɔɔ-ŋai maa fáleŋ. Ka tínaŋ Yâwɛɛ pɔ-naa pere. Kà gɛ̀ tí, a pâi kámalôŋ kâai, é kásu-mɛ̂ni lɛɛ. Kwaa tínaŋ Yâwɛɛ Kúɣâlai pɔ́naa pêre.

Yâwɛɛ a m̀ôi ǹyɛɛi, “Ka pá, káai kélee kpele-wɛ̂li káa kâai. Yá káa ƃɛ́ kámɛni ma! Ka pá káai kélee sɛŋ-kao fé káyêei, ka pá ká mii-sãa yá ká m̀ii. Ka pá ká ŋwã̂ai da niŋa ŋíni-ya yá. Káfe pâi seŋ kâo kpɛɛ̂i dímɛni ma.

“Ŋ́oo káa yɛ̂ɛ lúu da tuna. Lúu kpaa máŋ tuna a pù lɔii ma, a ǹɔii yɔ̀ɔ. À gɛ̀ sí-sãa dí kpɛ̀tɛ, mii-sã̂a támaa kɛ̀ ƃò naa mìi mɛ̂ni ma. Bere ƃé a pâi kɛ̂i la a ŋ̀óoi ŋá mòi. M̀ɛnii kélee ŋá gbɛ̀tɛi, da fa fɛ̂ɣɛ. Ŋ́oo fé pâi pâi pôlu ḿbɔ kpɛ́ni, fɛ̂ɛ é m̀ɛnii kɛ́ ŋá dɛ̀ɛ a gɛɛ é gɛi.

“Ka pâi kulâi Babelɔŋ a lii-nɛ̃ɛ, ka lí lii-sêe su. Ǹyée kpaya-kpayai da bɛlɛ-pɛlɛɛi da pâi kɛ̂i wule-ŋa toôi. Ŋ̀úru-ŋai dia máŋ da pâi kɛ̂i díyee ŋá lôkwai a lii-nɛ̃̂ɛ pere.

“Ŋánûa, ka káwoli tɔ́ɔ ḿâ, ká pá ḿbɔ. Kà pà ḿbɔ, ka pâi lɛɛ̂i ɣele ma. Ŋa pâi wɔ́lɔ-wɔlɔ da wɔ́lɔ-wɔlɔ kpanaŋ-woo kɛ̂i káyêei. Ŋa pâi lûwa lâai kâa yɛ̂ɛ berei ŋá wɔ́lɔ ŋ́gono tèe la Deeƃé yêei, a ŋáwɔlɔ-wɔlɔ da wɔ́lɔ-wɔlɔ wɛli kɛ́-maai.