Azaya 52
52
Ɣâla a pâi Zerusâlɛŋ ŋuŋ ma ƃôi
1Ka káŋɛi lá ƃó, ká kámu-siɣe, kákponôi é kpanáŋ, óo Zerusâlɛŋ-ƃela.
Káai a Ɣâla ŋɔtaa-lêe maa waai su-ƃelai, ka kámaa ɣíri a káseɣe lɛ́lɛɛ-ŋai.
Ŋ̀ɔ̃ya-ŋai ká taa-lêei su kàrai, da fé pâi ŋɔ́nɔ tɛ̂i kátaai su.
2Ka kámu-siɣe m̀uluŋ su, ká kákɔɔ ŋá kpɛ́mɛŋ.
Zerusâlɛŋ-ƃela, ká tɛ́ gâloŋ see-sɛŋ ŋá.
Óo Zãiyɔŋ kɔ-soŋ-ŋa, ka ǹyɔlɔ-ŋai kúla kákɔŋ ma.
3Ŋ̀wála-wâla kélee Yâwɛɛ a m̀ôi ŋɔnûai dîa ǹyɛɛi, “Núu da fé sɛŋ da kɔ̀lɛ ní kápôlu dílɛɛ pâi liî a káa luɛ-laa su, ǹyaŋ núu da fé pâi sɛŋ da kɔlɛ̂i káŋuŋ ma ƃó mɛni ma. 4Ká lì Ize lɔii su kákɛ ƃò naa a ŋɔ̃́ya-ŋa. Asiria-ŋai dífe sɛŋ da kpɛ̀ɛ ní kámɛni ma. Ká kɛ̀ naa, díkɛ kálùaŋ. 5Kákɛ̀ kɔ-sôŋ-laai Babelɔŋ-ŋai yêei dílɔii su. Dífe sɛŋ da kpɛ̀ɛ ní kámɛni ma. Kámɛi-ƃelai da yoŋka têei, dífe ƃaa kɛ́-maa tɛɛ̂i ḿbɔ. 6Ɣele da a pâi, ŋa pâi ńaa lɛ̂i ŋɔ́nɔ, ǹyaŋ da pâi gɔ́lɔnîi a gɛ́ɛ ńyãa ƃa Ɣâla nyíi lòno dípɔi.”
7Ka gáa,
gáa a mɛni lɛ́lɛɛ a gɛɛ í lii-sêe tuŋ ƃó-nuu káa gɛ́ kùla ǹyée-ŋai su.
A pâi a lii-see maa tûŋ lɛ́lɛɛ.
A m̀ôi Zãiyɔŋ-ƃelai dîa ǹyɛɛi,
“Káɣâlai ƃa gâloŋ.”
8Daa-lêei maa kpɛ́-ƃelai da lâɣii.
Da wule toôi gîe ma a koi-nɛ̃ɛ pere.
Dia kpîŋ da Yâwɛɛ kâai a díkpɔɔi ŋɛi-gao,
gɛ́ lène pôlu Zãiyɔŋ.
9Ka koi-nɛ̃ɛ wule-ŋa too ɣelêi pere,
káai Zerusâlɛŋ bilêŋ ŋái.
Yâwɛɛ a pâi ŋɔtaa-lêei ŋuŋ ma ƃôi,
é ŋɔnûai ŋa-nɛnɛ.
10Yâwɛɛ a pâi tíi kɛ̂i a ŋɔwála-wala laa maa waai,
é ŋɔnûai ŋuŋ ma ƃó,
ŋ̀éniɛi gwaa kélee su-ƃelai dí ǹaa káa.
11Káai kélee ka Ŋ̀âla-pɛrɛ Kɛ́tɛi mu-sãai mɛi kâai,
ka ká kpîŋ maa wáa, ká kúla Babelɔŋ,
Káfe lɛ̀ɣɛ sɛŋ da ma nyii m̀aa fé wàa níi.
12Káfe pâi kulâi naa a kîrɛ lônii ma,
kpaa máŋ ká kɔ́ a gɛ́ɛ ká pú.
Káɣâlai Yâwɛɛ a pâi tɔɔ̂i kátuɛ.
Eezuɛ Ŋɔɣâlai ǹyaa kpîŋ a pâi kámɛi kâai.
M̀ɔ̃lɛ-laa yee mu-nuui
13Yâwɛɛ è m̀o ǹyɛɛi,
“Ŋá pâi gɛ̂i a gɛ́ɛ m̀ɛnii kélee ńyee mu nuui a ǹyée pìli zui, ŋ̀aa-see é kɛ́ ǹyêei a ǹɛ́lɛɛ,
ƃaa kɛ́-maa kɛ́ ƃò m̀a.
14Diai kélee gàai, díla è kɛ̀ kpɔ́.
Gɛ́ pere maa è fàleŋ, vé ƃóloŋ ní kɛ̀ núu-kpune ma.
15Ǹɔii-ŋuŋ-ŋai su-ƃelai lá è kpàla dîa a m̀aa mɛ̂ni,
kâloŋ-ŋa lá é kɛ́ nɔ́ kpɔ́ a kili ŋa pû-pere.
Da pâi kwaa kâai dí m̀ɛni-ŋai ŋá káa
nyíi-ŋai dífe kɛ́ ní a gɔ́lɔŋɔɔi.”
Currently Selected:
Azaya 52: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
