Zia-ƃelai Kɛ́-mɛni-ŋai 16

Temete, Pɔ̂ɔ da Salɛ ni dí lì

1Pɔ̂ɔ è tɛ̀ɛ a Dɛƃi da Lesitɔra pere. Kôrai-nuu tɔnɔ è kɛ̀ naa, ǹáa ƃé kɛ̀ a Temete. È kɛ̀ a Zûu nɛni tɔnɔ ǹóŋ. Laa-la è kɛ̀ ǹyêei kɛ́lɛ, ǹâŋ è kɛ̀ a Gurii-nuu. 2Temete ŋí, m̀arâai nyíi-ŋai kɛ̀ Lesitɔra da Akonia, dí lòno a ǹɛ́lɛɛ é pîlaŋ ma. 3Pɔ̂ɔ è kɛ̀ ŋ̀wɛ̂lii é Temete siɣe da ǹyaa dí li. È ziɣe é gbɛtɛ, kpɛ́ni fêi, Zûu-ŋai kɛ̀ ǹɔii tí su, ǹyaŋ dí kɛ̀ a gɔ́lɔŋɔɔ a gɛ́ɛ Temete ǹâŋ è kɛ̀ a Gurii-nuu. 4Pɔ̂ɔ-ni kɛ́ɛ kɛ̀ tɛɛ̂i daa-ŋai sui, dí gɔlɔi lɛ̀ díƃarâai dîa, nyíi zia-ƃelai da ǹúu pɔlɔ-ŋai kɛ̀ Zerusâlɛŋ dí bɔ̃yɛɛ̂i. Dí dɛɛ dípɔ a gɛ́ɛ mɛnii kɛ̀ zui, dí maa tûa kɛ́. 5Nya ƃe Kôrai-toli-kpɔŋ-ŋai su è kpanaŋ laa-la su. Zu-ƃelai dí kɛ̀ tâmai a ɣele kélee.

Pɔ̂ɔ è Masadonia-naloŋ kâa ŋɔzĩ̂ai su

6Dí tɛ̀ɛ Fagia da Galesia kpiniŋ su-pere. M̀ɔlêŋ Maa Waai è díkɛ a gɛ́ɛ dífe Ɣâla ŋɔwóoi ƃo Eesia. 7Dí seriɛɛ Maisiai, dí kɛ̀ ŋ̀wɛ̂lii dí lí Bɛtinia, kɛ́lɛ, Zîsɛ Ŋɔmɔ̂leŋ fé fáa ní mà. 8Dí tɛ̀ɛ Maisia kɔlɛ ma dí pá Toroɛ. 9Naa ƃé zĩ̂a è tɛ̀ɛ naa a Pɔ̂ɔ a gbínii: Masadonia naloŋ tɔnɔ è kɛ̀ tɔ̂ɔni ŋ̀ɛ́i gɛ́ vɛ̀li, ǹyɛɛ mai, “Pá Masadonia í kpɔ́ŋ kûa.” 10Pɔ̂ɔ ŋɔzĩ̂ai pôlu ma, kú kúmu sìɣe kpɔ́ a maa félaa a gɛ́ɛ kú lí Masadonia. Kú gàa a gɛ́ɛ Ɣâla a kútoli a gɛ́ɛ kú Duŋ Lɛ́lɛɛi ƃo naa ǹûai dîa.

Ledia líi maa e fàleŋ

11M̀ɛni ma kú yá ŋá-keleŋ siɣe Toroɛ kú berei siɣe nɔ́ a zu sã́a kú lí Samotulesi. Bôlu ma ɣele ƃóɔɔi kú lì Neapoli. 12Ku kúlaa naai, ku lì Felepâ, nyíi gáa a Masadonia taa-leei gɛ́tɛi, nyíi kɛ̀ Lomaŋ-ŋai yée mui. Ku kɛ̀ naa a ɣele kûu da-ŋa; 13tãi è kɛ̀ la a Vii-tɔɔ-ɣelei, ku kùla daai su ku li ya-lee da kɔlɛ, ƃɛi ku kɛ̀ gâai a gɛ́ɛ nàa è kɛ̀ a Ɣâla fɛlîi; ku see naa ku lóno nɛni-ŋai pɔ, nyíi-ŋai díŋa tɛ gîe mai. 14Nɛnî tɔnɔ è kùla Tayatira-taai su, ǹáa ƃé kɛ̀ a Ledia. È kɛ̀ a gãla-seɣe kɔlɛ-nuu, gɛ ƃo a Ɣâla fɛli-nuu. Nya ƃe Kúnuu-namui e ǹíi láa ƃò a gɛ́ɛ é ǹyée see mɛni-ŋai mu Pɔ̂ɔ e mòi. 15Gɛ́ɛ a batâi sɔlɔ ƃo da ŋɔpɛ́rɛi mu-ƃelai, e kúkpera fe, ǹyɛɛi, “À kɛ̀ ká gɔ́lɔŋ a gɛ́ɛ laa-la káa ńyêei Kúnuu-namui mɛni ma, gɛ̀ ní ka pa ŋápɛrɛi lá ká kɛ́ naa.” È kɛ̀ kpɔ́ ŋ̀wɛ̂lii a gɛ́ɛ ku li ŋɔpɛ́rɛi lá.

Dí Pɔ̂ɔ da Salɛ pìli kpini-pɛrɛ mu Felepâ

16Kúkɛɛ liî Ŋ̀âla-fɛli-kwaai mai, ku luɛ-nɛni-lo tɔnɔ kàa, nyíi nyinaŋ nyɔ́mɔɔ è kɛ̀ bôlui. E pà a sɛŋ-kao támaa mɛi-ƃelai pɔ. Kpɛ́ni fêi, è kɛ̀ a tuɛ-mɛni ƃo-nuu. 17Nɛnî-lo tɔnɔi ti è pìlaŋ kúpôlu kwa Pɔ̂ɔ-ni, gɛ laɣi, ǹyɛɛi, “Ǹûai ŋí díkaa a Ŋ̀âla Gɛ́tɛi yée-mu-ƃela. Ǹûai ŋí da m̀álo-laa-perei lɛ̂ kâa.” 18Nɛni-loi e mɛnii ŋí kɛ̀ a ɣele kûu támaa. Kɛ́lɛ, Pɔ̂ɔ líi e ŋwàna é tínaŋ bɔ naa-pere é m̀ó nyînaŋ nyɔ́mɔɔi ma, ǹyɛɛi, “Ŋa íkɛ Zîsɛ Kôrai láai su a gɛ́ɛ í kúla bôlu.” Nya ƃe è kùla kpɔ nɔ́ bôlu a maa-aƃai ti.

19Kɛ́lɛ, tãi mɛi-ƃelai dí gàa la a gɛ́ɛ dísɛŋ sɔlɔ ƃo-perei su a karai, dí Pɔ̂ɔ soŋ da Salɛ dí li a dia ǹɔ́ɔ-kpalaŋ ŋá dí dítɛɛ nuu-tuɛ-ƃelai pɔ; 20nya ƃe díaŋ dí lì a dia dímɛi-pere-ƃelai pɔ, dîyɛɛ diai, “Ǹûai ŋí díkaa a Zûu-ŋa. Díkaa laa-saa kɛ̂i kútaa-leei su. 21Díkaa tua-pere-ŋa lɛ̂i, nyíi-ŋai ve a sɛŋ a gɛ́ɛ kúai a Lomaŋ-ŋai ku kúyee sée dímu, kpaa máŋ ku dímaa kɔri.” 22Nya ƃe gbɔŋ kélee e sìɣe e tɔ́ɔ a dia. Nuu-tuɛ-ƃelai mɛi-ƃelai dí díseɣe-ŋai fàla dí m̀o a gɛ́ɛ dí dílokwa a wúru gbua. 23Díkɛɛ da dílokwa a ŋánaai, dí dípili kpini-pɛrɛ mu. Dí mò gbini-pɛrɛ lá-nuui ma a gɛ́ɛ e dímɛi káa a ǹɛ́lɛɛ. 24Mɛnii ŋí ƃoɔ gbini-pɛrɛ lá-nuui mai, e Pɔ̂ɔ-ni tòo kpɔnɔ ŋá e dílɔ gbini-pɛrɛi mu-pere-loŋpoi su.

25Kɛ́lɛ, gbínii seriɛ zamai, Pɔ̂ɔ da Salɛ dí kɛ̀ Ɣâla fɛlîi díkɛ wule too ma. Pelesinɛ kpeli-ŋai dí díwoli tɔ́ɔ dîa. 26È kɛ̀ nɔ́ ti ǹɔii gwaa kélee e kpɛ̃liŋ. Gbini-pɛrɛi gwaa kélee e kpɛ̃liŋ; ǹá é ƃó gwaa kélee a maa félaa, pelesinɛ-ŋai kélee dí fùloŋ. 27Nya ƃe gbini-pɛrɛi lá-nuui e ŋ̀ɛ́i lá ƃò e bɛ́rɛi káa ǹá ƃoɔ gwaa kélee. E ŋɔƃóa-sɔkpɔ̂i sìɣe a gɛ́ɛ e gbîŋ paa, kpɛ́ni fêi, è kɛ̀ gâai pelesinɛ-ŋai da pú. 28Kɛ́lɛ, Pɔ̂ɔ e làɣi kpɔ́ a ŋ̀óo su kɛ́tɛ, ǹyɛɛi, “Ífe mɛni pɛlɛ íkpîŋ ma. Kpɛ́ni fêi, kúkelee kúkaa ƃɛ.” 29Nya ƃe e ŋɔŋ-toli ƃò e pá bɛ́rɛi mu, gɛ kpɛ̃liŋ é tóo Pɔ̂ɔ kɔ́ɔ mu da Salɛ. 30E kùla a dia loŋpoi su, ǹyɛɛ diai, “Ŋánûa, le ƃe ŋa pɔ̂ri gɛ̂i ŋá ƃálo?” 31Nya ƃe dí mò mai, “Láa a Kúnuu-namui Zîsɛ, gɛ̀ ní, ya pâi ƃálôi ka ípɛrɛi-mu-ƃelai.” 32Nya ƃe dí Kúnuu-namui ŋɔwóoi ƃò ma da ŋɔpɛ́rɛi mu-ƃelai kélee. 33E dísìɣe a maa-aƃa tɔnɔi ti gbínii su e dípala-ŋai ŋá wáa. Nya ƃe dí ŋɔbatâi kɛ̀ naa ŋ̀á ma da ŋɔpɛ́rɛi mu-ƃelai kélee. 34Nya ƃe è lì a dia ŋɔpɛ́rɛi mu e mii-sɛŋ tɛɛ dípɔ; ǹyaŋ da ŋɔpɛ́rɛi mu-ƃelai kélee dí lii-nɛ̃ɛ kùla a gɛ́ɛ a nâa láa a Ɣâla.

35Kɛ́lɛ, tãi ɣele e ƃɔ̀ lai, nuu-tuɛ-ƃelai mɛi-ƃelai dí kɔkuluƃa-ŋai tɛ̀ɛ a gɛ́ɛ dí m̀ó gbini-pɛrɛi lá-nuui ma, dîyɛɛi, “Ǹûai lɛ́ɛ naa dí lí.” 36Nya ƃe gbini-pɛrɛi lá-nuui e ŋorɛ-wooi ŋí ƃò Pɔ̂ɔ ma, ǹyɛɛi, “Nuu-tuɛ-ƃelai mɛi-ƃelai dîyɛɛ ŋá m̀ó kâa ká li; maa mɛni ma ka kula ká li lii-sêe su.” 37Kɛ́lɛ, Pɔ̂ɔ e mò dîa, ǹyɛɛi, “Da ku-lókwa nûa ŋɛi nyíi dífe kúsɔŋ káa ni zui, ǹyaŋ ku ƃo a Lomaŋ-ŋa, da kúpili kpini-pɛrɛ mu; à kɛ̀ ti da pɔ̂ri kúkulâi a gɛ́ɛ ku li loo-pere su? Ve ti! Tɔɔ dîa kpîŋ dí pá dí kúkula.” 38Nya ƃe ǹɔii maa kpɛ́-ƃelai dí mɛnii ŋí ƃò nuu-tuɛ-ƃelai mɛi-ƃelai dîa. Nuu-tuɛ-ƃelai mɛi-ƃelai dí yào tãi dí mɛni la a gɛ́ɛ Pɔ̂ɔ-ni dí kɛ̀ a Lomaŋ-ŋai; 39nya ƃe dí pà dí díkpera fe. Dí díkùla dí m̀o dîa a gɛ́ɛ dí kúla daai su dí li. 40Dí kùla gbini-pɛrɛi mu dí lɔ Ledia ŋɔpɛ́rɛi mu; dí díƃarâai kâa naa dí díŋa nɛnɛ dí li.

Currently Selected:

Zia-ƃelai Kɛ́-mɛni-ŋai 16: KWB

Highlight

Copy