Sal 83
83
Re' reey David xupahqaaj ree Dios chi chusach kiwach i aj ixowaal
1QaJaaw Dios, maakanaa' chi je' re' i k'ahchi'kooj.
Maacanaa' chi ma' xtaj i naa a'nam.
2Chawil taqe ma' nkaaj ta awach,
re' taqe i ma' kinimanik taa weh k'achi' keeb' chi tukinik wachiis.
3Pan komonil xkiyejaa' wach i yiib' wach na'ojb'al, reh chi naa kia'nam reh aatinamiit.
Eh chi naa kia'nam reh taqe asik'im cho kiwach.
4Inkaaj ruchaliik kisacham qawach pan qatinamiit,
reh chi ma' nee ta chik inq'orarik rib'iral i qatinamiit Israel.
5Jinaj i xkiyejaa' wach chawiij i hat,
eh xkian jinaj wach kik'ux chi kunchelaal.
6Kuuk' taqe i patim Edom, kuuk' i aj Ismael.
Eh kuuk' rak'uun rixq'uun i agar, kuuk' i aj Moab.
7Eh kuuk' aj Gebal, kuuk' i aj Amón, kuuk' i aj Amalec,
kuuk' i aj filisteo, kuuk' aj Tiro.
8Eh xkian wo' jinaj wach kik'ux kuuk' i aj Asiria.
Re' taqe re' xti q'e' taqe kow chi kixilak i rak'uun rixq'uun i Lot.
9Chasach kiwach taqe re', je' rukab' i xa a'n keh i aj Madián, i
aj Sísara, aj i Jabín, re' i wilik wii' i nim ha' Cisón.
10Xasach cho kiwach chupaam i ye'aab' Endor.
Ar xiq'ahik, chi ruraxiil ak'al.
11Chasach kiwach i nimaq kiwach, je' rukab' i xa a'n keh i Oreb, i Zeeb.
Cha a'n kuuk' i k'amal kib'eeh, je' rukab' noq xasach wach i Zeba, i Zalmuna.
12Re' hat xasach kiwach ruum je' wili xkiq'or:
Naa qehchaam i rutinamiit i Dios, inki taqe.
13WaJaaw nuDios, chasach kiwach,
xa je'-oq kik'amarik reje chiqiij laj xaq chee' ruum i kowlaj teew cha a'n keh.
14Je' rukab' noq kichaajrik ruum q'aaq' i rax chee'.
Eh je' rukab' noq ink'ahtik ruum q'aaq' i kok' ch'ahn.
15Chayeew i k'axik chikinaah ruuk' awajaawriik.
Eh chayohb'isaj taqe ruuk' aajosq'iil.
16QaJaaw Dios, chayeew q'ab' chi neenkik'uhtaaj kik'ixb'ilaal,
reh chi nee tikisik'.
17Ma' ta naq nee kielik korik ruuk' inkikapaaj.
Reh chi neenkik'uhtaaj kik'ixb'ilaal, eh nee kikimiik.
18Reh chi nee nkinab'eej
chi xa re' wo' hat i Dios, xa re' wo' hat i nim
awajaawriik chinaah chu'nchel i wach ak'al.
Currently Selected:
Sal 83: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
