Sal 68
68
Re' tz'uuy xkian i aj Israel noq xkiq'at wach i aj ixowaal
1Noq i ruk'uhtaaj i rajaawriik i Dios
chi naa rub'anam keh i ki-ixowanik wach,
re' keh inkitukej kiib'.
Eh inkimol chi elik chuwach ruum kiyo'jiik.
2Eh naa rojiik sahchoq kiwach
je' rukab' noq inooj sahchoq wach i sib' panteew.
Re' taqe yiib' wach kina'ojb'al chuwach i Dios
naa rojiik sahchoq kiwach
je' rukab' noq inhaab'ik i kantela ruum i q'aaq'.
3Eh re' taqe i korik wach kik'ux keh,
naa rusuuqb'iik kik'ux chuwach i Dios,
naakipisk'aniik pankooq.
4Re' taq i hat cha tz'uyej taq wach i Dios.
Cha a'n taq atz'uuy parub'ihnaal,
chaloq'ej taq i wilik cho nah suutz'.
Eh suuqb'oq taq ak'ux ruuk' i QaJaaw.
Suuqb'oq taq ak'ux chuwach.
5Re' QaJaaw Dios wilik pan rusantolaj ye'aab',
kajaaw taqe i ma' xta kituut kajaaw.
Eh toob'en keh taqe ixoq kamnaq kib'ahiil.
6Re' QaJaaw Dios i ruyeew kipaat i ma' xta kipaat.
Eh i resaj taqe panti' k'axik i wilkeeb'
panti' k'axik, i ruyeew rusuqkiil kik'ux.
Eh re' taqe i ma' kinimanik taj,
naakikanab'jiik chupaam i ye'aab' chiq yuuq'.
7QaJaaw Dios, noq hat cho peet chikiwach
taqe aatinamiit chupaam taqe ye'aab' chiq yuuq',
8re' ak'al xk'uyu'jik ruum awajaawriik.
Eh xub'an wo' chaloq i jab', re' i ye'aab' Sinaí xk'uyu'jik
ruum i runimaal awajaawriik i hat Dios,
re' i qaDios i hoj, hoj Israel.
9QaJaaw Dios, re' hat xti xayeew chaloq
i jab' chi korik re' xawaaj i hat chi xayeew cho ransil,
eh xat'aqsaj taqe i ye'aab' chiq yuuq'.
10Re' taqe aatinamiit xakoj taqe chi patinik ar.
QaJaaw Dios xa ruuk' aak'axb'al
xayeew keh i neb'aa' i ajwaal wach chi keh.
11Eh xa ruuk' i ruq'oral i QaJaaw Dios xiyo'jik taqe i aj ixowaal.
Eh ma' k'isiin taqe ixoq xiq'orik rib'iral
chib'ih i xk'ularik je' wili xkiq'or:
12Re' taqe reey, taqe i ki soldado
xkimol chi elik, inki taqe.
Eh re' taqe ixoq k'ahchi' kich'aqam
chikiwach pankipaat ixq'ucharik keh i aj ixowaal.
13Re' taq i hat ma' re' ta nkiwii'
chi xakeb'aa' taq awiib' pampaat
xa tiq'aa' taq awiib' chi korik.
Je' taq akab' i paloma xa nworwotik chik i ruxiik',
xa je' chik rukab' i plata.
Eh re' riij xa je' chik rukab' i manlik oro.
14Re' QaJaaw Dios ruuk' i rajaawriik
xukaaj taqe reje i reey ki-ixowanik wach i rutinamiit,
je' rukab' noq i ruyeew chaloq i suutz' chinaah i yuuq' Salmón.
15Re' taqe yuuq' wilkeeb' chupaam i ye'aab' Basán,
xiik' naah najtiil kinaah q'e' holohaq.
16Eh re' taq i hat i wilkaat taq chinaah i yuuq' najt naah
¿Chib'ih reet noq ma' suq ta taq rilariik
i na a'n i yuuq' xuyejaa' wii' i rupaat i QaJaaw Dios?
Xanaah re' ar naa ruwihiik i QaJaaw Dios chi juneliik.
17Re' QaJaaw Dios xiik' naah i rajaawriik
yohb'aal wach k'ihaal i rukareta
reh i q'aq'inik ruch'ihil noq xelik
cho chupaam i ye'aab' Sinaí,
noq xchalik chupaam i ye'aab' Sión.
18Jaaw re' hat xatjohtik chupaam aa ye'aab'.
Wilik taqe i panti' k'axik wilkeeb' xak'am taqe johtoq chawiij,
eh xkiyeew aloq'il taqe i winaq.
Wilik wo' taqe i ma' kinimanik
ta naq aweh xkiloch' kiib' chawach i hat.
19Loq'imaj ta naq i QaJaaw Dios, re' i qaj Ko'loom.
Re' reh eqal eqal qohrutoob'eej ruuk' i qak'axkiil.
20Re' QaJaaw Dios jinaj Dios aj ko'loom,
eh nee wo' qoh ruko'leej chuwach i kimik.
21Re' QaJaaw Dios naa rusacham
kiwach taqe i ki-ixowanik wach,
naa rupaxem kinaah, reh i rusachariik
kiwach ruum ma' nkikanaa' ta rub'aan i mahk.
22Re' QaJaaw je' wili xuq'or: Naa wo' chik
taq kaat wesam reje Basán,
naa wo' chik taq kaat wik'sam reje chupaam i palaw.
23Re' hin naa nusacham,
kiwach i ki-ixowanik taq awach.
Eh naa taq awilom i kikik'eel
chi wilik taq cha junsuut,
eh re' taqe aatz'ii' naa rureqwiik reh, inki.
24QaJaaw Dios, hat nuDios,
hat nureey, xk'utinik noq xakilok'ik chik aatinamiit
noq xkik'am i koq chupaam aapaat
i holohik laj kaxa molik wii' taqe aak'uhb'aal.
25Re' taqe aj tz'uuy wilik taqe i peet b'eeh,
wilik taqe i xam b'eeh,
eh panyejaal wilkeeb' i kok' q'ahxoq
k'ahchi' kiq'ojem i kiq'ooj intzalajinik.
26Hat taq tinamit aj Israel chawunchelaal
taq chayeew ruloq'il i QaJaaw Dios.
Chayeew wo' taq ruloq'il noq amolom taq awiib'.
27Eh peet chikiwach taqe re' i aj Benjamín,
eh ma' k'isiin taqe k'amal kib'eeh aj Judá.
Re' wo' taqe haa' i ikik'amwik
kib'eeh i aj Zabulón,
je' wo' taqe i k'amal kib'eeh i aj Neftalí.
28WaJaaw nuDios, cha k'uhtaaj cho qeh awajaawriik,
cha a'n cho quuk' i a'nam cho quuk' noq xub'an.
29Re' taqe reey wilkeeb' chi taaq'anik,
naa kik'amam chaloq i kimayiij
chawach chupaam aapaat ar Jerusaleem.
30QaJaaw Dios chaq'il taqe i aj Egipto
kimolom kiib' yohb'aal wach i kijosq'iil,
je' taqe josq'laj chikop, je' taqe josq'laj wakax.
Chawesaj i kajaawriik,
korehtaal inkiq'asaj aweh i kib'ehomal.
Jaaw chatukej kiwach i tinamit
xa re' i Q'aq'inik imponik chikiwach.
31Wilik taqe i k'amal kib'eeh i aj Egipto,
wilik taqe k'amal kib'eeh i aj Etiopía
naa ruchaliik kipahqaam kitoob'jiik aweh.
32Re' taq i hat i wilkaat taq chi taaq'anik
chikinaah i tinamit,
cha tz'uyej taq wach i QaJaaw Dios.
33Re' wilik cho pan taxaaj, xa wilik wo' chaloq najtir q'iij.
Chab'iraj taq xti ko ar naa ruq'oriik
cho chi kow ruuk' i runimaal rajaawriik.
34Chayeew taq rajaawriik i QaJaaw Dios,
re' wilik rajaawriik taq cha naah i hat, wuch aj Israel,
xiik' naah i rajaawriik imponik kopan taxaaj.
35QaJaaw Dios re' hat sahchb'al
k'uxliis i na a'n pan asantolaj ye'aab'
ruum i nayeew rukowiil kik'ux aatinamiit Israel.
Loq'imaj ta naq ab'ihnaal chi juneliik.
Currently Selected:
Sal 68: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
