Sal 65
65
Xa re' wo' QaJaaw Dios i ruk'ul chi naaqaye'em ruloq'il
1QaJaaw Dios, re' hat i ruk'ul chi naa qaye'em aloq'il ar Sión.
Eh chi naaqa'nam i qaq'orom aweh chi naaqa'nam.
2Re' hat inab'iraj i qatiij.
Eh chu'nchel i tinamit aweh i hat inkipahqaaj chib'ih inkaaj.
3Wilik noq xa re' chik taqe i yiib' wach na'ojb'al inqa'an chawach.
Xa re' la', re' hat q'e' naakuy taqe qamahk.
4Atoob' keh inasik' kiwach
reh chi naa kaat kiloq'em chupaam aapaat.
Eh nee ta naq insuuqb'ik qak'ux chi manlik
ruuk' i qatiij neenqa a'n chupaam asantolaj paat.
5QaJaaw Dios, hat qaj ko'loom,
re' hat ruuk' nimaq wach na'ojb'al,
ruuk' korik i nayeew qeh inqapahqaaj aweh.
Chu'nchel i tinamit sut i wach ak'al awuuk' i hat inkich'ikaa' kik'ux,
je' wo' taqe i wilkeeb' kochi juntar i palaw.
6Re' wo' hat xatyej-anik reh i yuuq',
eh aye'em taqe pan kiye'aab' ruuk' i runimaal awajaawriik.
7Re' hat tipaab'anik reh i rub'ohl i palaw.
Eh re' hat tikojwik keh panotob'il
i tinamit noq inkitukej kiib'.
8Ruum aj re', re' taqe i tinamit sut i wach ak'al nsahchik kik'ux
ruum taqe i nimaq wach sahchb'al k'uxliis i na a'n.
Eh awuum i hat inkik'er kichii' ruum rusuqkiil kik'ux chi q'iij chi aq'ab'.
9Re' wo' hat tik'uxlanik reh i wach ak'al,
i nayeew i jab' chinaah.
Eh i nayeew taqe i rooq i ha' tz'aqtesb'al reh,
ruuk' i re' i naak'isaj taqe johtoq i tik, eh kiwachinik.
10Re' hat i nat'aqsaj chaloq chi lohk'aal i tik,
i nayeew i ha' pantaq xilak.
Eh ruuk' i jab' i nayeew inakanaa' chi ma' kow ta chik i aak'al,
inakuxisaj i kiwach taqe tik.
11Re' hat xti xayeew aawotob'il chinaah qatik chupaam i haab' wili.
Re' taqe aasuutz' ti xkiyeew chaloq i jab' chi manlik.
12Eh inqajik cho chikinaah taqe ch'ahn wilkeeb'
panchiq yuuq' xa rax chik kiwach,
xayohb'aal chik wach kiholwochiil kik'utinik reje.
13Ma' k'isiin taqe i chikop wi'k inki a'n chinaah.
Eh wataq k'ixkaab' nujinaq taqe chi tik,
eh re' taqe ehchan reh xa nkik'er chik kichii' chi tz'uuy.
Currently Selected:
Sal 65: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
