Sal 41
41
Re' reey David xupahqaaj parutiij reh i Dios chi naa ruk'achreesjiik ruuk' i ti' wilik wii'
1Atoob' reh awach intoob'inik reh i ma' kow ta ruk'ux i ti' wilik,
ruum re' i QaJaaw Dios naa ruko'liniik reh panti' k'axik.
2Re' QaJaaw Dios naa rutoob'iniik reh,
naa ruye'ariik ruk'achariik, naa ruye'ariik i rusuqkiil ruk'ux.
Ma' naa ta ruye'em q'ab' i QaJaaw chi naa rub'aan reh kuum i aj ixowaal.
3Re' QaJaaw Dios naa ruye'wiik rukowiil ruk'ux noq naa ruwihiik pan yokaab'.
Eh naa ruk'achreesjiik ruuk' i ruyab'ilaal.
4Re' hin je' wili xnuq'or:
QaJaaw Dios, chaketelaaj nuwach,
atoob' ta ximahkunik chawach kina k'achrisaj ruuk' i nuti'kiil, kinki.
5Eh re' taqe ki-ixowanik nuwach je' wili inkiq'or chi wiij:
¿Jaruuj inkimik? ¿Xti jaruuj insahchik wach i rub'ihnaal? inki taqe.
6Noq kik'ulik chi wula'jiik, xakojol wehtaal kik'ulik.
Eh noq kielik reje wuuk'
xa re' chik inuk'utjiik inki a'n pamb'eeh.
7Re' taqe i ki-ixowanik nuwach inkimol kiib' chi nub'ajariik,
inkikapaaj i keh chi ruum numahk k'ahchi' nuk'ulum i ti' k'axik.
8Eh je' wili inkiq'or chi wiij:
Re' ruyab'ilaal re' aj yahm inye'wik chinaah.
Je' re' noq xqajik pan yokaab', ma' jaruuj chik naa ruktiik inki taqe.
9Eh re' naq i naah wamigo i ch'iklik naq wii' nuk'ux,
re' i jinaj naq inqa a'n wii' qawa'
ruuk' xsutinik chi ixowan nuwach.
10Eh re' hin QaJaaw Dios, aweh i hat i nupahqaaj
chi chaketelaaj nuwach kinak'achrisaj johtoq,
reh chi neenuyeew chutojariik i ru mahk.
11Eh neenunab'eej chimponik chawach i nuna'ojb'al,
reh chi re' inixowanik nuwach ma' xta neekiruchej,
ma' nee ta ruq'at nuwach,
12QaJaaw Dios, re' hat aweht'al chi ma' xtaj
i yiib' wach k'ahchi' kiin chawach,
re' hat naa atoob'iniik weh naa awihiik wuuk' chi juneliik.
13Nee ta naq inye'arik ruloq'il chi juneliik i QaJaaw,
re' i qaDios i hoj, hoj aj Israel
je' ta wo' naq re'.
Currently Selected:
Sal 41: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
