Sal 34
34
Re' QaJaaw Dios i ruko'leej taqe i korik wach kik'ux
1Re' hin naa nuloq'em i QaJaaw Dios chi juneliik.
Eh xa eliik re' reh naa nuye'em ruloq'il ruuk' nuchii'.
2Re' hin naa rusuqb'iik nuk'ux ruuk' i QaJaaw Dios.
Eh noq naa kib'iram i xama' nimaq ta kiwach naa rusuuqb'iik kik'ux.
3Qaloq'ej taq i QaJaaw Dios awuuk',
jinaj-oq taq wach qak'ux chuye'ariik runimaal wach.
4Eh noq xnupahqaaj i rotob'il i QaJaaw Dios xirib'iraj wo' hoq.
Eh xiresaj wo' chupaam chu'nchel i yohb'aal.
5Awach inkipahqaaj i rotob'il i QaJaaw Dios insaqumb'eesjik paam i kikapeb'aal.
Eh ma' jaruuj neenk'uhtjik kik'ixb'ilaal.
6Eh noq ti' wilkiin xnuq'o'reej i QaJaaw Dios xirib'iraj wo' hoq.
Re' reh xiresaj chupaam chu'nchel i ruti'kiil nuk'ux.
7Re' i ruánjel i QaJaaw Dios wilik chi kijunsuut i kiyohlinik ree reh,
eh i ruko'leej taqe.
8Chawilow taq, chakoj taq rehtaal chi re' QaJaaw Dios xiik' naah rotob'il.
Ruum aj re' q'e' atoob' reh awach i ruuk' i QaJaaw i ruyeew i ruk'ux.
9Eh chayohleej taq i QaJaaw Dios
i hat santo laj raj nimaneel.
Ruum awach kiyohlinik wach
i reh inye'arik keh i ajwaal wach chi keh.
10Re' taqe i ma' kikojwik ta ree Dios,
inkikuy kiwa'. Je' rukab' noq
inkikuy kiwa' i kaq b'ahlam
Eh re' taqe i kisik'wik reh i Dios
inye'arik keh chu'nchel i ajwaal wach chi keh.
11Kim chab'iraj taq i hat, i wak'uun wixq'uun noq wilkaat.
Re' hin naa nuk'uhtaam taq aweh i ruyohljiik i QaJaaw Dios.
12Eh wila' re' hat inawaaj chi najt rooq ak'achariik.
Eh inawaaj awilom wach i suq laj k'acharik,
13inchol awik'raam awiib' chi manelik chee yiib' wach q'orik ju' aawaaq'.
Eh manelik chaloq i chukuj q'orik xaq aachii'.
14Chakanaa' rub'aan i yiib' wach na'ojb'al, xa re' chik i holohik cha a'n.
Eh cha sik' i wihik pansuqkiil k'uxliis maakanaa' chik rub'aan.
15Ruum re' taqe korik wach kik'ux re' QaJaaw Dios incha'jinik keh,
eh i nib'irjik i kitiij.
16Eh re' taqe i yiib' wach kib'anik i ruyeew i rujosq'iil i Dios chikinaah.
Eh i rusach kiwach chinaah i wach ak'al
reh chi ma' awach ta chik naa ruq'oriik kib'iral.
17Eh re' taqe korik wach kik'ux noq inkipahqaaj
i rotob'il i QaJaaw Dios ki-ib'irjik wo' hoq,
i resaj taqe chupaam chu'nchel i ruti'kiil kik'ux.
18Re' QaJaaw Dios xa wilik
wo' kuuk' chi kitoob'jiik i ti' wilik i kánima.
Eh i ruko'leej taqe i xama' naa ta chik
keliik chupaam i ti' k'axik noq inkik'raaj.
19Re' korik wach ruk'ux xiik' naah i ti' k'axik inchalik chinaah.
Xa re' la', re' wo' QaJaaw Dios ineesanik reh chupaam.
20Re' wo' reh naa ruko'liniik reh
chi ma' jino'q i rub'aqil naakitoqom.
21Re' yiib' wach runa'ojb'al re' wo' re' naa ruk'amwiik reh panti' k'axik.
Eh re' i ki-ixowanik wach i korik wach ruk'ux naa ruq'atariik i q'orik chikinaah.
22Re' QaJaaw Dios inko'linik riij i kik'achariik taqe rumoso.
Eh ma' naa ta kiye'ariik pantojb'al mahk, ruuk' i reh inkiyeew kik'ux.
Currently Selected:
Sal 34: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
