Sal 33
33
Re' rutz'uyjiik wach i QaJaaw Dios chi t'iosb'al reh i rotob'il
1Re' taq i hat korik wach ak'ux,
suuqb'oq taq ak'ux ruuk' i QaJaaw Dios cha tz'uyej taq wach.
2Chatz'uyej taq wach ruuk' arpa i QaJaaw Dios.
Chatz'uyej taq wach ruuk' chee' q'ooj wilik ruk'ahamil wach.
3Chatz'uyej taq wach ruuk' ak' tz'uuy.
Chaq'ojej taq aq'ooj chi loq'oomb'al reh i QaJaaw Dios.
4Ruum re' i ruq'oral i QaJaaw Dios xti korik,
re' chu'nchel i ruyejaam ink'uhtanik reh chi korik wach ruk'ux.
5Re' QaJaaw Dios xtimponik chuwach i korik, ruch'ihil i rub'ehel.
Eh re' ruk'axb'al wilik chi junsuut i wach ak'al.
6Re' i QaJaaw Dios xa ruuk' i ransil i ruq'oral xuyejaa' i taxaaj,
je' wo' chu'nchel chib'ih jariik i wilkeeb' chupaam.
7Re' wo' reh i molwik kiwach taqe ha' i rumol kiwach pantaq chaamlaj jul,
eh i ruyejaa' taqe chii' palaw.
8Chayohleej taq wach i QaJaaw Dios i hat i wilkaat taq wach ak'al.
Je' wo' taq i hat i k'acharik taq i na a'n chinaah i wach ak'al chayohleej taq i Dios.
9Eh ruuk' wo' ransil i ruq'oral i Dios xkorjik chu'nchel i chib'ih jariik i wilik.
Noq xuq'or i reh chi naa rukorjiik xkorjik wo' hoq.
10Re' QaJaaw Dios i rusach wach chi jumpech
inkiyejaa' wach rub'aan chu'nchel i ma' kinimanik ta reh.
11Raaj i rukapaaj rub'aan i QaJaaw Dios reh,
eh i ruyejaa' cho wach paránima, ma' jaruuj naa rusahchiik wach.
12Atoob' reh i tinamit i re' k'achlik Dios i rukoj chi ruDios,
re' wo' re' rusik'im cho wach chi rutinamiit.
13Re' QaJaaw Dios kopan taxaaj i rilow chaloq i tinamit wach ak'al,
eh ko ar wo' rilow chaloq i kina'ojb'al.
14Ko ar chupaam i ruye'aab' i rilow chaloq
nik' wach i kik'achariik i tinamit wach ak'al.
15Re' wo' QaJaaw Dios xyej-anik reh i kánima,
ruum aj re', reht'al wo' chu'nchel chib'ih jariik i k'ahchi' keeb'.
16Ma' jino'q i reey neenko'ljik xa ruum i ruk'ihaal soldado.
Eh re' kow i rub'an riib' ma' nee ta ruko'leej riib' xa ruum chi ma' k'isiin i ransil.
17Atoob' ta ruuk' kawáyu neerutik'aa' q'aq'inik jino'q xama' nee ta wo' ruko'leej riib'.
Eh nik' ta naq kowiil neerub'an riib' xama' nee ta wo' ruko'leej riib'.
18Raaj taqe i kiye'wik runimaal wach,
je' wo' taqe i kiye'em kik'ux ruuk' i QaJaaw Dios re' wo' reh incha'jinik keh.
19Eh nee wo' inko'ljik i kánima ruum i qajaaw chuwach i kimik,
eh ma' nee ta ruyeew q'ab' chi nee kikimik ruum wi'jaleel.
20Re' hoj ruuk' QaJaaw Dios qaye'em qak'ux,
ruum re' reh intoob'inik qeh, eh i ruko'leej i qánima.
21Eh ma' k'isiin ta nsuuqb'ik i qánima ruuk' i QaJaaw Dios
ruum chi ch'iklik qak'ux ruuk' i rusantolaj b'ihnaal.
22QaJaaw Dios, nee ta tiinaketelaaj qawach,
je' rukab' inqaaj chi neena a'n quuk'.
Currently Selected:
Sal 33: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
