Sal 116
116
Re' tiij t'iosb'al reh i rotob'il i QaJaaw Dios
1Re' hin i nuk'ax i QaJaaw Dios
ruum xuyeew weh i xnupahqaaj reh panutiij.
2Ruum chi xrib'iraj i nutiij. Re' hin juneliik i nuk'achariik naa nupahqaam,
reh chi naakiin rutoob'eem.
3Re' hin rukotem naq chik wiij i kimik, eh xa ximponik chik chii' jul noq xwik'raaj.
Xa re' naq chik i yo'jik,
i ruti'kiil k'uxliis wilik chi nunaah.
4Eh noq xwilow chi je' re' xnupahqaaj reh i QaJaaw Dios
chi chuko'leej riij i nuk'achariik.
5Re' i QaJaaw Dios ruum chi korik wach ruk'ux, chi q'e' aj keteloom wachiis.
Eh q'e' atoob' xirutoob'eej wo' hoq.
6Re' reh i ruko'leej taqe i ma' nimaq ta kiwach.
Chawil i hin noq xakimik naq chik weh xi ruko'leej wo' hoq.
7Yu'naak aj re', naa wo' chik rusuuqb'iik i nuk'achariik
ruum re' QaJaaw Dios q'e' xiruk'ax.
8Ruum re' reh xi ruko'leej chuwach i kimik,
eh xresaj weh ooq'ik
reh chi ma' xinq'ehb'ik taj.
9Ruum aj re' naa nunimam
chi kixilak i k'achareel ayu' wach ak'al.
10Eh noq xiik' naq naah ti'kiil nuk'ux,
xnunimaj chi re' QaJaaw Dios naa rutoob'iniik weh.
11Eh noq xsahchik nuna'ojb'al xnuq'or
chi chu'nchel i winaq aj chukul q'orik taqe.
12¿Nik' wach noq neenutoj riij
reh i QaJaaw Dios i rotob'il i rub'anam wuuk'?
13Re' hin naa nuk'amam cho chi numayiij i riis uuva,
t'iosb'al reh i rotob'il xub'an wuuk'.
14Eh naa nutojom reh i QaJaaw Dios i nuq'orom chi ree reh,
chikiwach taqe irutinamiitnaa nuye'em.
15Re' QaJaaw Dios ti' riik'raaj i kikimiik
taqe i rusantolaj aj nimaneel.
16QaJaaw Dios re' hin, hin awaj kamanoom.
Hin rak'uun i nutuut re' awaj kamanoom.
Re' hat xinawesaj chupaam i ti' k'axik naq wilkiin wii'.
17Re' hin naa nuk'atam i numayiij chuwach i QaJaaw Dios,
t'iosb'al reh i rotob'il xub'an wuuk'.
18Re' hin naa nutojom reh i QaJaaw Dios i nuq'orom chi ree reh,
eh chikiwach i rutinamiit naa nuye'em.
19Re' wili ar Jerusaleem naa nuye'em chuwach rupaat i QaJaaw Dios.
Loq'imaj ta naq QaJaaw Dios.
Currently Selected:
Sal 116: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
