Sal 115
115
Re' i k'achlik Dios wilik rajaawriik, re' taqe i tiyoox ma' xta kajaawriik
1QaJaaw Dios,
re' la' hat naa ruye'ariik aloq'il ma' re' tee hoj.
Ruum xa re' wo' hat tiketelinik qawach, eh xa re' wo' hat i korik.
2Eh ¿Chib'ih reet noq inkiq'or i tinamit chi je' wili?
¿Aha' wilik i ki Dios re'? inki taqe chiqiij.
3Xanaah re', re' i qaDios i hoj pan taxaaj wilik,
chu'nchel i xraaj ruyejaam i reh xuyejaa' wo' chaloq.
4Eh re' ki dios i tinamit re' re',
xa plata, xa oro kiyej-aal, eh xa kiyej-anik winaq.
5Wilik kichii', xama' kiq'orik ta wo' hoq.
Wilik naq' kiwach, xama' ki-ilwik ta wo' hoq.
6Wilik kixikin, xama' ki-ib'irinik ta wo' hoq.
Wilik kiju', xama' kiuhtz'inik ta wo' hoq.
7Wilik kiq'ab', xama' kitz'a'inik ta wo' hoq. Wilik kooq,
xama' kib'ehik ta wo' hoq.
Eh ma' xta jino'q q'orik i nelik cho pan kalaq.
8Re' taqe i tiyoox re' re' ma' xta k'isinoq kajaawriik,
eliik wach kimemil ruuk' inyej-anik keh,
eh je' wo' taqe inimanik keh.
9Hat taq aj Israel ruuk' i QaJaaw Dios chayeew taq ak'ux.
Ruum xa re' wo' reh intoob'inik inko'linik taq aweh.
10Hat taq riih i Aarón i ruuk' i QaJaaw Dios taq chayeew ak'ux.
Ruum xa re' wo' reh intoob'inik, inko'linik taq aweh.
11Re' taq i hat inayohleej taq wach i QaJaaw Dios. Inayeew taq ak'ux ruuk'.
Re' wo' reh intoob'inik, inko'linik taq aweh.
12Re' QaJaaw Dios xojk'ulik cho paruk'ux,
naakooj rukuxisam i hoj, hoj aj Israel.
Eh naa wo' rukuxisam taqe i riih Aarón.
13Eh re' QaJaaw Dios naa wo' rukuxisam taqe chaloq
chu'nchel i kiyohlinik reh chi nimaq chi kok' taq.
14Re' QaJaaw Dios naa ruye'em taq cha naah i hat i rotob'il.
Eh naa wo' ruye'em i rotob'il chikinaah taq awak'uun awixq'uun.
15Re' ta naq i QaJaaw Dios xyej-anik cho reh i taxaaj ruch'ihil i wach ak'al
neentoob'inik taq aweh i hat.
16Re' i taxaaj ruye'aab' i QaJaaw Dios ruum ar wilik chaloq,
eh re' i wach ak'al xukanaa' chi kiye'aab' i tinamit.
17Re' taqe kamnaq ma' nee ta chik inki a'n rulooq'jiik i QaJaaw Dios,
ruum ma' xta chik kuxlaab'.
18Re' la' hoj i naa qaye'wiik ruloq'il i QaJaaw Dios,
je' yu'naak, je' chi juneliik.
Loq'imaj ta naq i QaJaaw Dios.
Currently Selected:
Sal 115: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
