Prov 8
8
Re' ruq'orariik chib'ih i ruk'am chaloq i holohik laj na'ojb'al
1Re' holohik laj na'ojb'al kow k'ahchi' ruq'orariik.
Re' holohik chi naab'jik kow wo' k'ahchi' ruq'orariik.
2Eh k'ahchi' ruq'orariik rib'iral chinaah taqe i nimaq taq yuuq',
je' wo' hoq i ruk'ul taqe wii' riib' i b'eeh.
3Eh i nib'irjik wo' rib'iral pantaq ookb'al,
je' wo' chi chii' taqe i ru puertahiil i tinamit.
4Eh re' i wilik runa'ojb'al je' wili i xuq'or:
Hat taq tinamit, aweh taq i hat i nuq'or taqe q'orik wili.
5Re' taq i hat k'ijolaq ma' xta taq ana'ojb'al, kow taq aanaah.
Wih-oq taq ana'ojb'al, chareq taq chi riij i naa a'nam.
6Kinab'iraj taq, ruum re' taqe naa nuq'orom q'e' looq'.
Eh re' taqe i korik naa nuq'orom.
7Re' taqe naa nuq'orom, re' i korik,
ruum re' hin ma' nuk'ax ta wach i chukuj q'orik.
8Chu'nchel taqe nuq'or,
re' i rukorkiil ma' xta k'isinoq i ma' re' ta rukorkiil chi xilak.
9Re' taqe nuq'oral xti korik chi reh awach i rureq chi riij.
Eh q'e' chihooj chi keh i wilik kina'ojb'al.
10Chanimaj taq i ti nutijej wii'.
Eh cha sik' taq i holohik chi naab'jik,
ruum re' taqe re' k'ih tz'aaq chuwach i plata,
chuwach i manlik oro,
11ruum re' i holohik laj na'ojb'al xiik' naah k'ihaal tz'aaq
chuwach i holohaq ab'aj, re' ruuk' inokik chi karena.
Eh ma' xata je' rukab' i xa chib'ih jariik ink'axarik wach.
12Re' hin i nunimaj i holohik laj na'ojb'al, ruum inureq chi riij.
Eh ruuk' re' inureq taqe i holohaq chi naab'jik.
13Re' ruyohljiik i QaJaaw Dios re' rukanab'jiik rub'aan i yiib' wach na'ojb'al.
Re' hin nukanaam rub'aan i niimb'isanik wachiis,
je' wo' chukuj q'orik ruch'ihil i ma' holohik ta laj b'eeh.
14Re' hin kink'uhtanik reh i holohik chi b'anarik.
Eh re' hin kink'uhtanik reh i holohik chi naab'jik, eh wilik wajaawriik chub'aan.
15Xa wuum i hin inkikoj i kik'uhb'aal taqe reey,
eh inki a'n i q'ataj q'orik taqe i wilkeeb' chi ajaab'esil.
16Xa wuum i hin inki a'n i taaq'anik i ajaab'ees.
Je' wo' taqe ajaab'ees kiq'atwik q'orik chikinaah i tinamit.
17Re' hin i nuk'ax taqe awach i kik'axwik weh,
eh awach taqe i kisik'wik weh chi noq kinkireq wo' hoq.
18Re' hin i nuyeew kib'ehomal, i nuyeew kiloq'il,
eh re' b'ehomal re' re' ma' naa ta rik'iik wach, je' wo' hoq i rub'ehel chi b'anarik.
19Re' i nuyeew i hin xiik' naah chihojal chuwach i manlik oro xa ch'ub'ik chik wach.
Re' i nuq'or xiik' naah chihojal chuwach i manlik plata.
20Re' hin chupaam i korik laj b'eeh ojik i nub'an.
Eh chupaam rub'eeh i holohik chi b'anarik ojik i nub'an,
21reh chi re' taqe i kik'axwik weh naa nuye'em kiye'aab'.
Eh naa nuye'em keh chu'nchel i ajwaal wach chi keh.
22Re' QaJaaw Dios xanoq wo' hin rutz'uhkrisam chaloq,
noq komajaa' chih i rutz'uhkrisaj chaloq ruuk' i rukamaj.
23Xa noq wo' hin ruyejaam chaloq noq komajaa' chih i wilik,
re' noq komajaa' i rutz'uhkrisaj chaloq i wach ak'al.
24Eh xa hin wo' chik ruyejaam noq komajaa' chih taqe i palaw.
Re' noq komajaa' kitz'uhkrik, komajaa' kiwihik taqe raasb'al ha'.
25Re' noq komajaa' i ruyejaa' taqe i yuuq' noq komajaa' i ruyejaa' taqe i ye'aab',
re' hin xa hin wo' chik ruyejaam chaloq i QaJaaw Dios.
26Noq komajaa' i ruyejaa' chaloq i ak'al i QaJaaw Dios je' wo' taqe i ye'aab',
eh noq komajaa' i ruyejaa' chaloq i rupoqil i wach ak'al.
27Eh noq xuyejaa' i taxaaj chinaah i runimaal ha'
ar wo' wilkiin i hin ruuk' i reh.
28Noq xuyeew taqe suutz' pan taxaaj,
eh noq xuyeew taqe palaw paruye'aab',
29re' noq xuq'or reh i ruha'iil i palaw
chi ma' naa ta chik reliik reje chi chii'.
Eh noq xukoj taqe ch'ikaab' reh i wach ak'al.
30Ar wo' wilkiin i koq i hin ruuk' i QaJaaw Dios,
eh eliik i nuyeew i koq rusuqkiil ruk'ux.
Eh xa eliik se'eel i koq nuwach ruuk'.
31Re' hin xa se'eel chik nuwach chupaam
i wach ak'al noq kore' k'ahchi' ruyejaam.
Eh xasuq chik nuk'ux kuuk' i tinamit noq
kore' k'ahchi' rutz'uhkrisam inki.
32Hat wak'uun noq wilkaat, yu'naak chab'iraj
i naa nuq'orom aweh, chak'am naah i nub'an i hin.
Chi je' re', neen wihik rusuqkiil ak'ux.
33Chanimaj atijiik i nub'an,
maawixowaaj wach i holohik laj na'ojb'al.
34Atoob' reh inib'irinik reh taqe i nuq'or.
Eh xaraaj chik rureqem chi riij,
rajlaal q'iij k'ahchi' cho kirusik'im ruuk' nupaat,
35ruum awach inreqwik weh i hin i rureq i suq laj k'acharik.
Eh i rureq wo' i holohik laj na'ojb'al iraaj i QaJaaw Dios.
36Eh awach i xq'eb'wik weh, i ruyeew panyohb'aal i ruk'achariik,
awach inixowanik nuwach, re' kimik naa ruchaliik chinaah.
Currently Selected:
Prov 8: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
