Isa 8
8
Xa re' wo' i Dios naa qayohleem wach
1Re' QaJaaw Dios je' wili i xuq'or weh panusaq wiriik:
Chasik' jino'q i tz'ilom nim wach, cha tz'ihb'aaj chuwach ruuk' i ma' k'ayeew ta wach q'orik i b'ihnaal Meher-salal-hasbaz.
2Eh neenayuq'eej i Urías k'amal b'eeh aj tiij, i Zacarías, rak'uun i Jeberequías, reh chi neenkilow chi xatz'ihb'aaj i b'ihnaal re' re', inki. 3Eh xnutoq'aa' k'acharik ruuk' i wehk'een, re' jalal ruq'oral i Dios, eh xkahnik wach k'acharik, x-aasjik jinaj wak'uun ruuk', je' wili i xuq'or weh i QaJaaw Dios: Maher-salal-hasbaz i rub'ihnaal naa akojom. 4Eh re' i k'isa k'un re' re', noq komajaa' inchol ruq'orariik taqe i q'orik wili: Hat nutuut, hat wajaaw re' tinamit Damasco, ruch'ihil i tinamit Samaria naa ruchopariik kinaah, eh naa relq'jiik i kib'ehomal ruum i kireey i aj Asiria, inki.
5Eh re' i QaJaaw Dios je' wo' chik wili i xuq'or weh:
6Re' taqe i tinamit, xin kiq'eb' chi riij kik'ux,
re' hin xa je' naq nukab' i ha' Siloe xa jinaj tuqlik wii'.
Re' keh ruuk' chik i reey Rezin,
ruuk' chik i rak'uun Remalias re'
i reey Peka rub'ihnaal xkiyeew kik'ux.
7Ruum aj re', re' hin naa nutaq'aam chaloq i kireey aj Asiria,
ruch'ihil taqe soldado, chi naa ruchaliik b'anroq keh i nutinamiit.
Eh yohb'aal wach i kijosq'iil noq naa kik'uliik iloq,
xa je' chik rukab' i rujosq'iil i nim ha' Éufrates noq i nelik reje chi' taq chii,
i rutz'ap naah i xa chib'ih i wilik parub'eeh.
8Re' keh xiooj xa aha',
xiooj k'oloq Judá chub'aan i ti' k'axik
re' naa reliik reje wii' i k'isa k'un Emanuel i rub'ihnaal.
Eh yohb'aal wach i kijosq'iil,
xa je' chik rukab' i rujosq'iil i elal ha'
i rutz'ap naah chu'nchel i wilik parub'eeh.
9Eh re' taq i hat tinamit,
atoob' ta neenamol taq awiib', xanaa wo' rub'aan i ti' k'axik taq aweh.
Eh chab'iraj taq i hat i tinamit inajt taq wilkaat chaloq,
atoob' ta cha yejaa' taq awiib' xanaa wo' taq rusachariik awach.
10Atoob' ta ayejaam taq wach i naa a'nam,
xama' naa ta wo' taq aweliik korik.
Re' taq i naa aq'orom xama' naa ta wo' taq a'nam,
ruum re' hoj re' i QaJaaw Dios wilik quuk'.
11Eh noq re' i QaJaaw Dios kow xiruchop ruuk' i rajaawriik, xuq'or weh chi ma' naa ta nutahqeem taqe i tinamit re' re', chub'anariik taqe i yiib' wach na'ojb'al, je' wili i xuq'or weh: 12Re' taq i hat maa a'n jinaj taq wach ak'ux kuuk' i tinamit noq inkiyejaa' wach i ma' holohik taj. Eh maayohb'isaj taq awiib' ruuk' inkiyohb'isaj wii' kiib' i keh, chakowej la' taq ak'ux. 13Je' re' noq re' taq i hat, xa re' wo' hin i jinaj chi Dios nim waJaawriik i ruk'ul chi naa taq aye'em nuSantohiil, eh chi naa taq ayohleem nuwach. 14Ruum chi re' hin wilik nuSantohiil, hin naa nuko'liniik keh i kinimanik weh. Eh chi keh i aj Judá, i aj Jerusaleem, je' hin ab'aj inkitoxk'iij wii' i kooq, kiq'ehb'ik wii' keh. Eh chi keh i aj Jerusaleem, je' hin xirob'. 15Eh ma' k'isiin i naakitoxk'iim i kooq chi nunaah, je' naa kiq'ehb'iik, eh naa rusachariik kiwach. Ma' k'isiin wo' taqe i naakichopariik ruum i xirob', inki.
16Re' hin naa numolom i k'uhb'aal wili
re' i naa nuk'uhb'aleem taqe wii' inaakitahqiniik weh.
17Eh re' i QaJaaw Dios
atoob' ta ma'rutoob'eej taqe i riih rumaam i Jacob
re' hin ch'iklik nuk'ux ruuk' chi konaa ruk'uhtaam i rotob'il.
18Re' hin ayu' wilkiin kuuk'
i wak'uun xuyeew weh i QaJaaw Dios
rehtalil chikiwach i tinamit Israel
chi wilik i rotob'il i QaJaaw Dios nim rajaawriik
eh wilik ar nah yuuq' Sión.
19Eh wila' i xkiq'or taq aweh
chi chapahqaaj taq keh i kamnaq,
keh i aj q'iij
je' taq wili i cha q'or keh:
¿Mi ma' ruuk' re' i Dios naa qapahqaam?
¿Mi neerub'an re' chi re' i k'achalkeeb' reh i kamnaq
neenkipahqaaj inkaaj? tiko'q taq keh.
20Eh ruuk' i ruk'uhb'aal i Dios chachaq'weej taqe.
Eh wila' ma' ruuk' taq i k'uhb'aal,
xatchaq'wik komajaa' taq inareq i saqum.
21Re' taqe i tinamit xak'ul chik naa kojiik
chusik'ariik kiwa' ruum i runimaal wi'jaleel naa ruchaliik.
Eh ruum i re' yohb'aal wach naa ruchaliik kijosq'iil
eh naakib'ajam i kireey, je' wo' hoq i ki Dios.
22Xa naa naq chik kitz'ehtanik reje wach ak'al,
xa re' la' ti' k'axik i naa ruchaliik chikinaah.
Eh juneliik naa rutib'iik kik'ux,
ar naa rusachariik kiwach panq'equm.
Currently Selected:
Isa 8: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
