Isa 57
57
Re' taqe i aj Israel xiye'arik chutojariik i kimahk ruum i kilooq'jiik i tiyoox
1Re' korik wach kik'ux kikimik ma' ti' taki-ik'aarjik.
Eh noq kikimik i atoob' wach kik'ux
ma' insik'arik ta chi riij chib'ih reet noq xuk'ul,
eh chi ruuk' i re' kielik chupaam i ti' k'axik.
2Awach wilkeeb' parub'eeh i Dios
kiokik pansuqkiil k'uxliis.
Eh noq kikimik reje kiooj chi hi'lik pankijuul.
3Kim taq i hat i je' taq akab' i kak'uun i aj war,
eh je' taq akab' i kak'uun i k'oyoom laj ixoq ch'aq kaxáro.
4¿Awach taq inab'aj
awach taq inakaqse'laaj noq inaq'or?
¿Awach taq inawehtz'aaj?
Eh ¿Wila' je' re' taq i na a'n mi ma' hat taq kak'uun kixq'uun
re' i ma' xinimanik taj, chuk'ul q'orik taqe?
5¿Mi ma' re' taq re' hat tib'anik k'oyomal chi ri'sil taqe i nimaq chee'?
¿Mi ma' nayeew taq chi amayiij re' aha'lak'uun chupaam taqe i ruhopil ab'aj,
eh chupaam taqe yuuq' kixkaab'?
6Re' taq i hat inamol taq
i ch'ub'ik kiwach ab'aj inaloq'ej taq.
Eh i nayeew taq i vino, i trigo chi amayiij chikiwach.
¿Mi ma' rik'ul re' chi nee taq tinuyeew
chi tojariik amahk chi riij taq i na a'n re' re'?
7Re' taq i hat tiooj taq chinaah taqe inajt kinaah yuuq'
ar taq tiooj woroq chub'anariik taqe yiib' kiwach chi b'anarik.
Eh ar taq tiooj chuye'ariik taq amayiij.
8Eh i nayeew taq aatiyoox
chi chii' taq i ru puertahiil aapaat,
re' chik taq ayiib' wach tiyoox xaloq'ej,
xinsahchik taq panak'ux i hin.
Eh xasonaa' taq awiib', xahe' taq wach anim wach yokaab',
xat yohkik kuuk' taqe i winaq awach uuk' xawaaj taq i hat.
9Eh tiooj taq ruuk' i tiyoox Melec rub'ihnaal, ma' k'isiin
ink'ohnik laj iq'oom i nak'am taq reje.
Xataq'aaj taq awaj taqareel chi najt yuuq',
xiqajik chupaam i rujuleel kamnaq.
10Re' taq i hat xaq'uhtisaj taq awiib' chub'anariik taq imponik chawach.
Eh ma' xakapaaj ta taq riij
chi ma' xta ruk'am chaloq taq i na a'n,
eh inareq taq rukowiil ak'ux chub'aan i ma' ruq'or korik.
11Eh ¿Chib'ih kianam i tiyoox
nayohleej taq kiwach, i nayeew taq kiloq'il?
Eh re' hin ma' kink'ulik ta chik k'isinoq taq panak'ux,
ma' kinaloq'ej ta taq chik.
Re' hin xama' xta wo' nuq'or chi je' taq re' i na a'n weh.
12Re' hin naa nuq'orom chi ma' holohik ta taq i na a'n,
eh chi xama' xta ruk'am chaloq.
13Eh noq naa taq apahqaam atoob'jiik reh i tiyoox
xama' naa ta wo' taq kaat resam panti' k'axik.
Xa chi jumehq'iil kik'amariik reje ruum i kowlaj teew, insachwik kiwach.
Eh re' i ruyeew ruk'ux wuuk' i hin naa nuye'em reh chi rukooch, i ye'aab',
eh naa wo' nuye'em reh i santo laj ye'aab'.
14Eh naa wo' rib'irjiik noq naa nuq'orom chi je' wili:
Re' hin inwaaj chi nee wo' chik kisutiniik chaloq i nutinamiit,
cha yejaa' taq chi korik i kib'eeh cha teh chi korik i kib'eeh, kinko'q.
15Ruum re' i QaJaaw Dios nim rajaawriik wilik pan taxaaj,
k'achlik chi juneliik re' i Santo laj Dios rub'ihnaal je' wili i ruq'or:
Re' hin pan taxaaj k'acharik i nub'an
chupaam i nuSantolaj ye'aab', ar wilkiin.
Xa re' la' wilkiin wo' chi kitoob'jiik
taqe i xama' nimaq ta kiwach,
je' wo' chi kitoob'jiik i ti' kik'ux i nuyeew rukowiil kik'ux.
16Eh ma' chi juneliik ta naa wik'sam
pankinaah i kimahk i nutinamiit,
ma' juneliik ta naa nuye'em i nujosq'iil chikinaah.
Ruum re' hin ma' inwaaj ta chi neenyoj kik'ux wuuk' i tinamit nutz'uhkrisam chaloq.
17Re' hin xa ruum wo' kimahk xkian xchalik nujosq'iil,
xnuyeew taqe chi tojariik i kimahk.
Re' hin xnukanaa' kitoob'jiik, ruum re' keh xinkija' wachej,
re' chik xkian aha' wilik i xkaaj i keh.
18Korik re' hin inwilow chi yiib' wach i kina'ojb'al,
xa re' la' re' hin naa wiq'omaam taqe,
naa nuye'em rusuqkiil kik'ux reh juneliik.
19Re' hin je' wili i naa nuq'orom:
Naa nuye'em rusuqkiil kik'ux taqe i wilkeeb' cho chi najt chi ma' najt, kinko'q.
Re' hin naa nuk'achrisaniik keh i nutinamiit.
20Eh re' taqe i yiib' wach kina'ojb'al keh ma' naa ta ruch'iklojiik kik'ux,
naa kikahniik chi je' kikab' i palaw k'ul inooj i rub'ohl
i rukut taqe reje i sohk' chi chii'.
21Xti korik noq ma' naa ta ruwihiik rusuqkiil k'uxliis
chi keh i yiib' wach kina'ojb'al, inki i Dios.
Biblia en Poqomchí: Santo Laj Huuj © Sociedad Bíblica de Guatemala 2009.