Isa 55
55
Re' i QaJaaw Dios xa chi siih i ruketelaaj kiwach i tinamit
1Re' i QaJaaw Dios je' wili i xuq'or:
Chu'nchel i chiqiij kichii' chaloq kian kihaa',
chaloq kian kiwa' xa chi siih.
Chaloq kuk'ej i riis i uuva, i lecha chi ma' jino'q sentabo neenkitoj.
2¿Chib'ih reet noq inasach taq atumiin ruuk' i ma' re' ta wi'k ha'?
¿Chib'ih reet noq inasach taq i tz'aaq akamaj ruuk' i xama' nujisanik ta wo' hoq?
Chayeew taq axikin chi wib'irjiik i hin, reh chi nee taq inak'ux aweh i suq atoob',
eh nee taq inareq rusuqkiil awánima.
3Kim taq wuuk', xti kinab'iraj taq,
reh chi neenwihik taq ak'achariik.
Re' hin wilik i neenuyejaa' wach taq awuuk' reh juneliik,
reh chi neenooj eloq wach i nuq'orom cho reh i reey David noq xnuketelaaj cho wach.
4Re' hin xnukoj chi re' reh xk'uhtanik i korik keh i nimaq tinamit.
Eh xnukoj chi k'amal b'eeh, chi aj tijoom chi kixilak i tinamit.
5Eh naa taq ayuq'eem awuuk' i tinamit ma' aweht'al ta taq kiwach,
eh ma' keht'al ta taq awach,
naa kichaliik kajimam kiib' taq awuuk',
ruum re' hin, hin taq aaDios i hat taq aj Israel
i wilik nuSantohiil naa nuye'wiik taq aloq'il, inki.
6Chasik' taq i QaJaaw Dios ruum yu'naak konee ruyeew riib' chi nee taq inareq.
Chaq'oreej taq awuuk' ruum re' reh ma' najt ta wilik.
7Re' yiib' wach runa'ojb'al chukanaa' i rub'eeh.
Re' i ma' holohik taj i rukapaaj chukanaa' rub'aan.
Chasik' wo' taq chik i QaJaaw Dios, nee wo' chik i ruketelaaj taq awach,
eh neerukuy taq amahk, ruum re' reh xti wilik i kuyuuj ruuk'.
8Re' akapeb'aal taq i hat ma' je' ta rukab' i nukapeb'aal i hin,
re' i nub'eeh i hin ma' eliik ta wach ruuk' taq ab'eeh i hat,
inki QaJaaw Dios.
9Re' i taxaaj xiik' naaj tiil wilik chinaah i wach ak'al,
re' i nuna'ojb'al i hin je' re' najtiil riik'sam wach taq ana'ojb'al i hat.
Eh re' i nukapeb'aal i hin je' wo' re' najtiil rik'sam taq wach akapeb'aal i hat.
10Chakoj taq rehtaal chi re' i kowlaj jab'
ruch'ihil i mus jab' inqajik cho pan taxaaj
ma' sutinik ta reje chi ma' xtaj i rub'an,
korehtaal la' i rut'aqsaj i tik,
ruuk' i re' inki a'n kiwa' kitikwik reh.
11Je' wo' re' i nuq'oral i nelik reje panuchii'
ma' naa ta rusutiniik cho wuuk' chi ma' xtaj i naa rub'anam.
Korehtaal la' rub'an chaloq aha' wilik inwaaj i hin,
reh chi naa rub'anam aha' wilik i xnutaq'aaj reje chub'anariik.
12Re' taq i hat xasuq taq chik ak'ux noq naa taq aweliik cho ar.
Eh xasuq taq chik ak'ux noq naa ak'uliik iloq panatinamiit.
Eh noq naa taq awilom taqe yuuq',
taqe i rub'ohl yuuq' naa taq ak'erem aachii' chi tz'uuy.
Eh re' taqe i chee' naa ruq'ojib'eem riib' i kixaq ruum i rusuqkiil kik'ux.
13Eh sohchaj chik naa rupoq'iik chi jilow i k'iix,
wahut chik naa rupoq'iik chi jilow i kaq k'iix.
Eh naa ruwihiik runimaal wach i rub'ihnaal i QaJaaw Dios,
re' i rehtalil wili naa ruwihiik chi juneliik, inki i Dios.
Biblia en Poqomchí: Santo Laj Huuj © Sociedad Bíblica de Guatemala 2009.