Isa 42
42
Re' QaJaaw Dios xusik' wach i raj kamanoom
1Re' Dios je' wili xuq'or: Re' wili i waj kamanoom,
inusik'im wach, q'e' nuk'ax, eh suq nuk'ux chi riij.
Eh naa nuye'em i Wuxlab'al chinaah,
eh naa ruq'orom i rukorkiil wach nuk'ux keh chu'nchel i tinamit.
2Re' reh ma' awach tee naa ruwech'um, ma' naa ta ruk'erem chii',
eh ma' naa ta rib'irjiik i ruq'oral pantaq b'eeh
3Eh naa rutoob'eem taqe i je' paxeel kaxlan aaj,
eh je' wo' taqe i je' taqe q'aaq' xa k'isiin intzub'ik rusib'eel.
Xti korik la' chi re' reh naa ruk'amwiik chaloq i wihik parub'ehel.
4Eh ma' naa ta ruq'uhtiik, ma' naa ta rub'anam kiib' ruk'ux.
Korehtaal la' i ruyeew i k'acharik parub'ehel chinaah i wach ak'al.
Eh re' i wilkeeb' chi chii' i palaw k'ahchi'
kuy-eem chi narojiik eloq wach i re', inki.
5Re' QaJaaw Dios xyej-anik reh i taxaaj,
eh xuhe' wach, re' i xyej-anik reh i wach ak'al
ruch'ihil taqe i kik'ihik chuwach,
re' inye'wik ruxlaab' inye'wik ruk'achariik i tinamit
je' wili i xuq'or reh i raj kamanoom:
6Re' hin i Dios, xin sik'wik awach,
eh hin xiye'wik awajaawriik reh chi naa ak'amam
chaloq i k'acharik parub'ehel chinaah i wach ak'al.
Eh chi re' hat naa aq'oriik rib'iral i naa nub'anam kuuk' i tinamit,
re' hat i kisaqumaal i tinamit.
7Reh chi naa atehem inaq'kiwach i moywach
eh chi naa taqe awisam cho panti' k'axik i wilkeeb' prexo.
Eh chi naa taqe awesam chaloq pan q'equm i wilkeeb' panq'equm.
8Re' hin, Dios nim wajaawriik i nub'ihnaal,
maayeew taq inuloq'il keh i tokoom,
maayeew taq runimaal kiwach taqe i tiyoox chi nujilow i hin.
9Eh re' i xnuq'or cho pampeet xooj wo' eloq wach,
yu'naak ko ak' chik taqe i nuq'or.
Re' hin k'achi' taq nuq'orom
rib'iral aweh noq komajaa' nilarik, inki Dios.
Re' rutz'uyjiik wach i Dios ruuk' i ko'linik xub'an
10Re' taq i hat wilkaat taq chi junsuut i wach ak'al,
cha tz'uyej taq i ak' tz'uuy chi loq'oomb'al reh i QaJaaw Dios.
Eh re' taq i hat i tib'ehik taq naah palaw,
je' wo' taq i hat i wilkaat taq chupaam,
je' wo' taq i hat wilkaat taq chi chii' i palaw,
chaloq'eej taq i QaJaaw Dios.
11Re' taqe i wilkeeb' panchiq yuuq',
re' taqe i kitinamiit kik'er kichii' chi tz'uuyjik wach i QaJaaw Dios.
Je' wo' taqe i wilkeeb' Cedar,
taqe i wilkeeb' ar Sela,
kik'er kichii' chutz'uuyjiik wach i QaJaaw Dios, chinaah taqe yuuq'.
12Eh re' taqe i wilkeeb' chi chii' i palaw kiyeew runimaal wach,
kitz'uyej wach i QaJaaw Dios.
13Re' QaJaaw Dios ruuk' i rajaawriik naa rutik'am jinaj pajaj iib',
je' rukab' i rub'an i soldado,
i ruk'er reje chii' chuq'orariik chi naa rutoq'aam i q'aq'inik.
Eh korehtaal i rub'an keh chu'nchel inixowanik wach.
14Re' QaJaaw Dios je' wili i xuq'or:
Re' hin najt xwuy-eej, chi xama' xta xnuq'or.
Eh yu'naak naa nuk'erem nuchii', je' kowiil i ruk'er chii' ixoq noq ink'ulik ruk'ux.
Junsachariik kiwach naa nub'anam i ki-ixowanik nuwach.
15Re' hin naa nusacham kiwach taqe je' inajt kinaah yuuq', taqe i je' rub'ohl yuuq',
taqe i je' tik.
Eh naa nuchiqsam taqe i je' nim ha',
i je' jul ha' naa nukanaam taqe chi je' chiq yuuq'.
16Eh naa nuk'amam kib'eeh i moywach
chupaam i b'eeh ma' keht'al taj,
naa taqe nuk'amam chupaam i b'eeh ma' jank'al ta ki-ik'ik wii'.
Eh naa nusutem chi saqum i q'equm
wilkeeb' wii' re' taqe i b'eeh b'uuk'laq paam naa nukanaam chi jiik kiwach.
Re' taqe i wili naa nub'anam kuuk' i ma' naa ta taqe nukanaam chi kutkeel.
17Re' hin naa nuye'em q'ab' chi naa kik'uhtaam kik'ixb'ilaal taqe
inkiyeew i kik'ux kuuk' taqe i tiyoox,
eh je' wili inkiq'or reh:
Hat manlik qadios, inki taqe reh.
Re' taqe i aj Israel xa ko je' wo' mutz'lik inaq'kiwach
18Re' taq i hat i tz'aplik taq axikin ti ib'irinoq taq.
Re' taq i hat, moywach ti ilwoq taq.
19¿Awach i moywach? Re' taqe i nutinamiit.
¿Awach taqe i moywach i tz'aplik i kixikin?
Re' taqe i nusik'im cho kiwach
re' taqe i waaj kamanoom nutaq'aam taqe reje chuq'orariik.
20Re' keh ma' k'isiin wo' naq inkilow, xama' inkikoj ta wo' rehtaal.
Ma' k'isiin wo' naq i xkib'iraj xama' xkaaj ta wo' kib'iram, inki QaJaaw Dios.
21Re' QaJaaw Dios ruum chi re' reh aj ko'loom,
ruum aj re' xuyeew runimaal wach i ruloq'il ruk'uhb'aal xuk'utaaj.
22Xa re' la' re' rutinamiit i Dios
inkichop inkiyeew prexo inkelq'aaj i chib'ih keh.
Eh inkitz'ap pantz'ilom,
inchoparik kinaah ma' awach ta chik inq'uchwik keh,
eh noq kieljik reje ma' awach ta chik inooj q'uchwoq keh.
23Eh ¿Mi wilik taq jino'q chaxilak i hat ineerunimaj taqe wili?
¿Mi wilik taq jino'q chaxilak i hat iraaj rib'iram chib'ih jariik i naa ruk'ulariik?
24Eh ¿Awach xye'wik q'ab' chi xeljik i chib'ih keh i
riih i rumaam i Jacob?
¿Mi ma' re' re' i QaJaaw Dios xye' wik q'ab'
ruum ximahkunik chuwach? ma' xkaaj ta kik'amam i rub'eeh.
Eh ma' xkaaj ta kinimam i xitijik wii' ruum i reh.
25Ruum aj re', re' QaJaaw Dios xrik'saj i ruk'aah chikinaah,
xuyeew taqe panti' k'axik
noq xb'aan keh ruuk' i q'aq'inik.
Je' naa xi k'atarik pa runimaal q'aaq',
xa re' la' re' keh xama' xinimanik ta wo' hoq.
Currently Selected:
Isa 42: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
