Isa 40
40
Re' QaJaaw Dios i ruyeew rusuqkiil kik'ux i aj Sión
1Re' QaJaaw Dios je' wili i xuq'or: Chayeew taq rusuqkiil kik'ux,
eh chayeew taq rusuqkiil kik'ux i nutinamiit.
2Chaq'or taq keh ruuk' q'unil, i aj Jerusaleem chi manlik chik i ti' k'axik xkik'ul,
eh naa wo' chik keliik reje i wilkeeb' wii'.
Re' hin ma' k'isiin chik i tojb'al kimahk xnuyeew
ruum i kiyiib' wach na'ojb'al.
Eh xnukuy chik i kimahk, inki.
3Eh jinaj i k'erik chii' chuq'orariik chi je' wili chupaam i ye'aab' chiq yuuq':
Chayejaa' taq chi korik awánima chuk'ulariik i QaJaaw Dios.
Eh cha yejaa' taq i rub'eeh,
je' rukab' noq inyejeb'jik i rub'eeh i wilik chi ajaab'esil.
4Chu'nchel i ye'aab' juulaq paam,
taqe inajt naah yuuq', naa rub'aan k'ixkaab' reh.
Eh re' taqe i b'eeh b'uuk'laq paam naa rub'aan chijiik wach keh,
re' taqe i b'eeh yok yok wach naakiye'ariik chi korik.
5Eh re' i QaJaaw Dios naa ruk'uhtaam i ruloq'il,
chu'nchel i tinamit naaki-ilwik wach pankomonil.
Re' wili korik, ruum re' i QaJaaw Dios inq'orik reh, inki.
6Eh je' wo' chik wili i xq'orarik cho weh: Chak'er aachii', inki.
¿Chib'ih jariik i naa nuq'orom? kinki reh.
Re' naa aq'orom re' chi re' i kik'achariik i tinamit xa je' rukab' i rax ch'ahn,
eh re' runimaal kiwach je' rukab' i rixmak'al
i ch'ahn inpuhlujik wataq yuuq' k'ixkaab'.
7Korik wo' hoq chi re' i rax ch'ahn xa re' yu' inchiqik.
Re' i uhtz'ub' xa re' yu' inchiqik ruum i tz'a'laj teew i ruyeew chee QaJaaw Dios,
je' re' noq insahchik wach i kik'achariik i tinamit.
8Re' i ch'ahn inchiqik, eh re' i uhtz'ub' inchiqik wo' hoq.
Eh re' i ruq'oral i QaJaaw Dios, ma' jaruuj naa rik'iik wach, inki cho weh.
9Re' hat johteen chinaah i yuuq', cha q'or
keh i aj Sión i q'orik holohik rib'irjiik.
Eh cha q'or keh i aj Jerusaleem,
chi naa rik'iik i kiyo'jiik.
Nee wo' naq'or keh i aj Judá chi je' wili:
Chalik taq reh aaWaJaaw aaDios chako'ljiik.
10Re' QaJaaw Dios naa ruk'uliik iloq ruuk' i rajaawriik,
re' chik i reh naa rub'aniik taaq'anik.
Eh xuk'am chaloq i kitojb'aal
nik' nimaal i xuko'leej taqe chaloq.
11Re' wo' reh naa rucha'jiniik reh i rutinamiit chi,
je' rukab' i rub'an i cha'jen tentzun,
i ruyeew taqe i koq chi' ruk'ux.
Eh ruuk' q'unil i rub'esaj taqe ixoq tentzun ko kok' taq i kak'uun.
Re' i runimaal rajaawriik i Dios ma' ha' ta chi je'
12¿Mi wilik i neerub'an rupajariik
i palaw ruuk' i paam i q'ab',
eh neerub'an rupajariik paam i taxaaj ruuk' taqe ju' q'ab'?
¿Mi wilik i neerub'an rupajariik i runimaal i wach ak'al,
eh neerub'an rupajariik inajt kinaah yuuq' ruuk' jino'q i pajb'al?
13¿Mi wilik inq'orik reh i QaJaaw Dios ruuk' chib'ih taqe i rub'an?
¿Mi wilik ixtijinik reh i QaJaaw?
14¿Mi wilik xkojwik runa'ojb'al i QaJaaw Dios?
¿Mi wilik xq'orik reh chi parub'ehel naa ruq'atam i q'orik,
eh xk'uhtanik reh i nimaq wach na'ojb'al,
ixtijinik reh ruuk' taqe i runa'ojb'al?
15Chuwach i QaJaaw Dios
re' taqe i nimaq tinamit,
xama' xta kiokik wii', xa je' taqe junt'uur chi ha'.
Eh xa je' taqe kikab' i pooq inye'arik pan pexu.
Re' taqe i tinamit kotimaj kiij chi ha',
xa je' rukab' noq insahchik wach i pooq.
16Eh re' taqe i chikop wilkeeb' Líbano, ma' nee ta naq kimanlojik chi mayiij.
Ni xata naq neemanlojik i chee' wilkeeb' ar chi k'atb'al reh i mayiij.
17Chu'nchel i nimaq tinamit,
xama' xta kiokik wii' chuwach i QaJaaw Dios.
Xti korik chi ma' xta kitz'aaq chuwach i reh.
18¿Awach taq aj uuk' naa apajam i runimaal wach i QaJaaw Dios?
¿Mi nee taq inapaj ruuk' jino'q xatz'aqoj tiyoox?
19Re' aj ch'eyel ch'ihch' i ruyejaa' i tiyoox,
eh re' aj ch'eyool i ruyulej i oro chi riij,
eh i ruyejaa' rukarena chi plata, eh i rulekaa' chi ralaq.
20Re' neb'aa' reh
i rusik' i chee' ma' moohrik taj i ruyeew reh i aj sehk,
eh ruuk' i re' inyejeb'jik i rutiyoox,
re' aj sehk xa holohik chik i ruyejeb'jiik i rub'an
xa re' la' xama' ink'uyu'jik ta wo' hoq.
21¿Mi ma' aweht'al mi ma' ab'iram taq re' hat?
¿Mi ma' q'orooj taq cho rib'iral aweh pampeet re'?
¿Mi ma' aweht'al taq re' hat i xa re' wo' rutz'uhkriik chee wach ak'al?
22Chi re' QaJaaw Dios ko ar wilik
cho kochinaah i taxaaj, imb'urwik naah i wach ak'al.
Eh re' i tinamit wilkeeb' wach ak'al xa je' taqe kok' chili'l noq i rilow.
Eh re' i taxaaj, xa je' inteharik wach itz'ihy i rub'an, re' ruuk' inokik chi perpat.
23Re' QaJaaw Dios i rusutej taqe chi xama' xta
kiokik wii' i winaq nimaq kiwach inki a'n kiib'.
Eh i rusach kiwach taqe i k'amal kib'eeh i tinamit.
24Re' keh naakik'ulum keh
je' rukab' i ruk'ul i tik koha'lakuun koxtikarik panak'al,
komajaa' i ruk'am raa' chi korik.
Eh noq re' i QaJaaw Dios i ruyeew chaloq i teew chinaah inchiqik.
Eh noq i ruyeew chaloq i kaq suut teew jab'
ink'amarik reje chi xa je' ma' ahl ta laj sohk'.
25Eh re' i santo laj Dios i rupahqaaj chi je' wili:
¿Awach taq aj uuk' nee kinapaj, awach i nee rureq chi je' nukab' i hin? inki.
26Re' taq i hat ti tz'ehtanoq taq johtoq pan taxaaj,
Eh ¿Awach inyej-anik taqe re' noq inaq'or taq i hat?
re' i QaJaaw Dios nim rajaawriik xyej-anik keh.
Re' reh xye'wik reh pan kiye'aab',
eh xukoj rub'ihnaal.
Eh ma' xta jino'q i ma' ta xuyeew paruye'aab'.
27Eh re' taq i hat aj Israel i hat taq riih rumaam i Jacob.
Chib'ih reet noq inaq'or taq chi je' wili:
¿Chib'ih reet noq re' Dios xama' qohrutoob'eej ta wo' hoq
ruuk' i ti' k'axik inqak'ul, tiki taq?
28¿Mi ma' aweht'al, mi ma' ab'iram taq re' hat
chi re' i QaJaaw Dios xa wilik wo' chaloq najtir,
eh chi re' reh xyej-anik reh chu'nchel i wilik wach ak'al?
Re' reh ma' q'uhtik taj,
ma' k'uhlik taj i raansil, re' runa'ojb'al ma' aha' ta chi je'.
29Re' reh i ruyeew ruman raansil i q'uhteel.
Eh i ruyeew ransil i ma' xta k'isinoq ransil.
30Re' taqe k'ijool kiq'uhtik,
re' taqe i kow kiib' ink'uhlik i kaansil, eh kiq'ehb'ik wo' hoq.
31Eh re' taqe i kiye'em kik'ux ruuk' i QaJaaw Dios
xa eliik naa ru aak'b'iik i kaansil. Eh
naakixik'iniik chi
je' rukab' taqe i xihk,
xama' naa ta wo' kiq'uhtik, naakib'eeh xama' naa ta wo' ruk'uhliik i kaansil.
Currently Selected:
Isa 40: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
