Isa 34
34
Re' ruq'orariik rib'iral i ti' k'axik xchalik chikinaah i nimaq tinamit
1Re' taq i hat i wilkaat taq panimaq tinamit,
pankok' tinamit chamol taq chawiib'
chi rib'irjiik taqe i naa nuq'orom.
Eh chab'iraj taq i hat wach ak'al, je' wo' hoq i wilkeeb' chupaam.
2Re' i QaJaaw Dios yohb'aal wach i rujosq'iil
chikinaah i wilkeeb' panimaq tinamit,
je' wo' chinaah i ki soldado, k'ahchi' ruq'orom chi naa ruq'atam, i q'orik chikinaah,
reh i rusachariik kiwach.
3Re' i kiti'jolal xa aha' naa rukahniik chi kutulkeeb',
eh ma' k'isiin i kichuhkiil naa reliik chaloq.
Eh naa runujiik paam i rax chee' ruum i kikik'eel.
4Eh chu'nchel i wilkeeb' pan taxaaj,
naakik'uyu'jiik, re' i runimaal i taxaaj naa rub'otom riib',
je' rukab' noq imb'otarik wach i nimlaj huuj.
Chu'nchel i ch'umiil naakichuhpiik,
je' rukab' noq inchiqik i xaq i uuva, i xaq i higo.
5Re' i QaJaaw Dios, yohb'aal cho wach i rujosq'iil pan taxaaj.
Je' naa ruyejaam chik chaloq i ruq'aslaj ch'ihch'
reh chi naa rub'anam keh i aj Edom, eh naa rukansam taqe.
6Eh ruuk' q'aslaj ch'ihch' naa rukaansam taqe.
Je' rukab' noq inkanteesjik i tentzun,
inkanteesjik i kaprax chi mayiij,
i nujik chi kik', chi xeb'oh i reeh i q'aslaj ch'ihch'.
Re' i QaJaaw Dios je' naa ruye'em i ruk'atoj mayiij ar Bosra,
eh naa rub'anam i ma' k'isa kansanik ar Edom.
7Re' keh je' kikanteesjik i b'ooyax
je' kikanteesjik i k'ijol wakax,
imas wakax naa rub'an.
Re' kiye'aab' naa runujiik chik'ik', naa ruxilakiniik ruuk' pooq i kiq'ina'iil.
8Chupaam i q'iij re' re' naa ruq'ajam wach i QaJaaw Dios keh i aj Edom.
Eh chupaam i haab' re' re' naakeliik korik i aj Sión.
9Re' taqe i raasb'al ha' wilik ar Edom naa rusutiniik chi q'ool.
Re' i pooq naa rusutiniik chi asufre,
eh xa je' chik inqop q'ool noq naa ruqopiik.
10Re' i tinamit re' re' ma' jaruuj chik naa ruchuhpiik i ruq'aq'al,
chi q'iij chi aq'ab' naa reliik rusib'eel.
Eh ma' xta chik i naa ruwihiik chupaam chi jumpech,
ma' awach ta chik i naa rik'iik chupaam chi jumpech.
11Re' chik i k'uch, re' chik i xihk naa kiyejaam kisuuq' ar
je' wo' taqe i tuhkur, ruch'ihil taqe i nimaq taq tz'ok.
Re' i QaJaaw Dios naa rukananiik reh i tinamit
chi xa je' chik chiq yuuq', eh chi xan tz'irik chik paam.
12Ma' naa ta chik rokiik jino'q i reey chi taaq'anik chikinaah,
chu'nchel i k'amal kib'eeh naa rusachariik kiwach.
13Eh re' wilik wii' kipaat imb'aan wii' taaq'anik,
i paat inkiko'leej wii' kiib' k'iixmoq'ool,
kaq k'iix chik i naa rupoq'iik cho ar. Eh naa rukahniik chi kiye'aab' xojb',
chi ke'emb'al kiib' i nimaq chikop wilik kixiik'.
14Re' taqe i yaak naa kuch'ihleem kiib' kuuk' i xojb'
eh re' taqe josq'laj ixoq kaprax k'ul naa kiyuq'eem kiib' chikiwach.
Eh ar naa kiwihik taqe i chikop kiyohb'isanik chaq'ab',
ar naa kihilik.
15Eh ar wo' naa ruyejaam rusuuq' ixoq tuhkur,
ar naa rumolom wach i rumiloj,
eh naa rupoq'iik kok' rak'uun, naa rumolom kiwach reh i kicha'jaljiik.
Ar wo' naakimolom kiib' i xihk, jinaj imas, eh jinaj xq'un.
16Eh chawilow taq chupaam i ruhuuj i QaJaaw Dios.
Ar taq neenareq chi korik
chi ar naa kiwihiik taqe chikop re' re' chi imas, chi xq'un,
ruum re' reh xq'orik,
eh ruuk' i ruxlab'al naa rumolom kiwach.
17Eh re' wo' i QaJaaw Dios
naa ruyewiik keh pan kiye'aab' chi kiju'junaal.
Re' wo' reh insik'wik reh i kiye'aab',
eh ar naa kiwihiik chi juneliik.
Currently Selected:
Isa 34: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
