Isa 13
13
Re' ruq'orariik rib'iral chib'ih i naa ruk'ulum i tinamit Babilonia
1Re' Isaías rak'uun i Amoz xk'uhtjik reh parusaq wiriik ruum i Dios chib'ih i naa ruk'ulum i tinamit Babilonia.
2Chajosaj taq i rehtalil chinaah inajt naah yuuq'.
Eh cha q'or taq keh i soldado chi naa taq awokiik chupaam i kiye'aab' taqe i aj
taaq'oom chikinaah i tinamit.
3Eh re' i hin naa nusik'im kiwach nu soldado kow kiib',
reh chi narojiik b'anroq keh i aj ixowaal re' re'.
Eh naakeliik korik, ruuk' i re' naakiye'em nuloq'il, inki Dios.
4Chinaah taqe i yuuq' inib'irjik
chi k'erlik kichii' i ruk'ihaal tinamit.
Re' i choqik inki a'n
re' taqe i ruk'ihaal tinamit kianam jinaj wach kik'ux.
Re' i QaJaaw Dios i ruyeew rukowiil kik'ux
i ru soldado reh chi naa kojiik chi q'aq'inik.
5Re' taqe i re' najt naa kichaliik chi junsuut i wach ak'al,
chusachariik kiwach
chu'nchel i aj Babilonia
ik'tesb'al reh i rujosq'iil i QaJaaw Dios.
6Re' taq i hat tiib'oq taq ak'ux, ruum k'ulik iloq reh i q'iij chi naa ruye'em taq
cho cha naah i rujosq'iil i QaJaaw Dios nim rajaawriik naa rusacham taq awach.
7Eh chu'nchel i tinamit ma' k'isiin ta naa rutib'iik kik'ux,
naa kikahniik chi ma' xta chik k'isinoq kikowiil.
8Re' keh i ti' k'axik naa ruchaliik chikinaah,
naa kiyo'jiik, naa rutib'iik kik'ux.
Eh xiik' naah i ti' naakik'ulum, je' rukab' i ruti'kiil ixoq noq ink'ulik ruk'ux.
Eh k'ul naakitz'ehtaam panaq'kiwach, naa rusahchiik kik'ux,
xanaa chik rukaaqb'iik i kiwach.
9Re' i QaJaaw Dios ilook' i rureq i ruq'ijil
chi naa ruye'em taqe panti' k'axik i tinamit, naa ruye'em i rujosq'iil.
Eh naa rukanaam chi ma' xta chik wilik chupaam,
naa rusacham kiwach chu'nchel i aj mahk.
10Re' i ch'umiil ma' naa ta chik ruye'em i rusaqumaal,
eh re' i q'iij xa kore' wo' naq elik i rub'an chaloq
naa wo' chik ruq'equmriik wach.
Eh re' poh ma' naa ta chik ruye'em i rusaqumaal.
11Re' i QaJaaw Dios je' wili i xuq'or:
Re' hin naa nuye'em taqe chutojariik i kimahk i tinamit,
taqe i yiib' wach kina'ojb'al ruum i kaansanik inki a'n
naa wesam i runimaal kiwach i nimaq kiwach, taqe i kib'anik ti' k'axik.
12Re' hin xama' k'ih ta chik i winaq naa nukanaam chi k'achalkeeb'.
Xa je' chik kik'ihaal i holohik oro ar Orfir.
13Chupaam taqe i q'iij re' re' noq naa nuye'em i
nujosq'iil i hin nim wajaawriik, naa nuk'uyu'sam i taxaaj.
Eh naa nuk'uyu'sam i wach ak'al,
ik'tesb'al reh i nujosq'iil chinaah i tinamit.
14Re' taqe tokoom tinamit
naakimolom chi elik noq naa kojiik pan kitinamiit,
je' rukab' noq inkimol chi elik i keej,
je' kikab' i tentzun ma' xta cha'jen keh.
15Re' i tinamit re' re', xa aha' pa' neenkik'am
reje xanaa wo' rusachariik kiwach.
Eh ma' k'isiin taqe ruuk' q'aslaj ch'ihch' naa kikanteesjiik.
16Re' i kiha'lak'uun panaq'kiwach naakiq'ojariik wataq ab'aj,
naa relq'jiik i chib'ih keh pankipaat,
naa ruchopariik i kehk'een kuum i tokoom winaq.
17Re' hin naa nuk'amam taqe chaloq i aj Media, reh chi naa rub'aan keh.
Re' keh, ma' nee ta inkik'ul i plata i oro
chi tojb'al riij chi ma' ta neenb'aan keh.
18Re' keh ruuk' i kiflecha naa kikansam taqe i k'ijolaq,
eh ma' naa ta kiketelaam wach noq naa kikansam taqe i koxi aasjik,
je' wo' i saq nimaq chik taqe.
19Re' Babilonia q'e' naq holohik chi keh i tinamit,
eh q'e' wo' naq looq', nim i rajaawriik chi keh i aj Caldeo.
Xa re' la' re' hin i Dios, naa nusacham wach,
je' rukab' noq xnusach wach i Sodoma, i Gomorra.
20Eh ma' awach ta chik i naa rupatiniik ar chi jumpech,
ma' xta chik i naa ruwihiik ar,
eh ma' naa ta chik kiyejaam ki perpat ar taqe i aj árabe,
eh ma' naa ta wo' chik kiye'em i kichikoop ar taqe i aj cha'jen chikop.
21Naa la' rukahniik chi kiye'aab' i chikop kiwihik chupaam i ye'aab' chiq yuuq'.
Eh ar naa kiwihiik taqe tuhkur,
taqe i nimaq chikop wilik kixiik', taqe i kaprax,
xanaa chik kipisk'anik pankooq ar.
22Eh chupaam taqe i paat imb'aan wii' i taaq'anik,
re' chik taqe i josq'laj chikop naakik'erem kichii',
taqe i xojb', je' wo' chupaam inajt kinaah paat ko'lb'al iib'.
Je' re' noq xa ilook' insacharik wach i Babilonia, inki Dios.
Currently Selected:
Isa 13: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
