Isa 11
11
Re' q'orooj cho rib'iral chi naa ruk'uliik, eh naa ruk'amam chaloq i suq kiil k'uxliis
1Eh chi kixilak taqe i riih rumaam i Isaí, jinaj naa rasjiik reje,
je' rukab' noq ink'ihik johtoq i rutoxl i chee'.
2Re' reh, re' i ruxlab'al i Dios naa ruwihiik ruuk' chi juneliik.
Eh re' re' naa ruye'wiik runa'ojb'al, naa rutijiniik reh, re' naa rukuuhtaniik i rukorkiil.
Re' wo' reh naa ruye'wiik rukowiil ruk'ux,
je' wo' i ruyohljiik wach i Dios.
3Ma' naa ta ruq'atam i q'orik
chinaah i ju'jun wila' ma' chih ru mahk.
Eh ma' naa ta rub'anam i q'ataj q'orik ruuk' i xa naa rib'iram.
4Eh parub'ehel naa ruq'atam i q'orik chikinaah i neb'aa',
naa rutoob'eem taqe i ma' nimaq ta kiwach.
Ruuk' i ruq'oral naa ruye'em taqe chutojariik i kimahk i kib'anik ti' k'axik.
Eh xa ruuk' i junhuup chi ruxlaab' naa rukaansam taqe i yiib' wach kina'ojb'al.
5Re' reh xa re' i rub'ehel naa rub'anam,
xa re' i rukorkiil naa rub'anam, naa rutiq'aam riib' ruuk' taqe i re'.
6Eh re' xojb' jinaj naa kiwihiik wii' ruuk' i tentzun.
Re' i b'ahlam jinaj naa kiwihiik wii' ruuk' i rak'uun kaprax.
Eh re' i rak'uun wakax jinaj naa kianam wii' kiwa' ruuk' i kaq b'ahlam,
eh xa jinaj chi k'isa k'un naa rucha'jiniik keh.
7Eh re' ixoq wakax jinaj naa kiwihiik wii' ruuk' ixoq oso,
eh jinaj naa ruwihiik wii' i kak'uun.
Eh re' kaq b'ahlam k'im chik i naa ruk'uxum, je' rukab' i b'ooyax.
8Re' jino'q i k'isa k'un
naa rub'anam ruk'o'niik chinaah i rujuul i nimlaj aaq'.
Re' i koxukanaa' ch'uch'ik
naa ruye'em i q'ab' chinaah rusuuq' josq'laj aaq' eh ma' naa ta ruk'uxariik.
9Eh ma' xta chik jot'ooj naa rub'aan.
Ma' xta chik ti' k'axik chinaah i santo laj yuuq' Sión,
ruum naa runujiik chinaah i wach ak'al i runa'ojb'al i Dios
je' rukab' noq i nujik i palaw chinaah i wach ak'al.
10Eh na' ponoq i q'iij re' re',
re' i naa rasjiik reje chi kixilak i riih rumaam i Isaí, naa rukahniik chi jinaj ehtalil
chikiwach i tinamit. Eh re' keh naa kojiik chi rusik'ariik,
re' i ruye'aab' naa ruwihiik wii' xiik' naah holwochiil.
11Eh chupaam taqe i q'iij re' re', re' i
QaJaaw Dios naa ruketelaam kiwach i aj Israel.
Eh naa rumolom cho kiwach i wilkeeb' Asiria, i wilkeeb' Egipto,
i wilkeeb' Elam, i wilkeeb' Sinar, wilkeeb' Hamat,
i wilkeeb' chupaam taqe i tinamit wilkeeb' chi chii' i palaw.
12Re' reh jinaj ehtalil i naa rujosam chikiwach i tinamit,
chi xumol wo' chik kiwach i rutinamiit.
Re' taqe i aj Judá,
i aj Israel kitukem kiib' chi junsuut i wach ak'al.
13Re' i aj Efraín,
ma' naa ta chik kixowaam kiib' kuuk' i aj Judá.
Re' taqe i ki-ixowanik
wach taqe i aj Judá naa rusachariik kiwach.
14Re' taqe re' naa kojiik parookb'aal q'iij chi peleto kuuk' i aj filisteo.
Eh naa kiq'uchum i chib'ih keh i tinamit wilkeeb' reje pareelb'aal q'ij.
Eh je' wo' taqe i aj Edom, i aj Amón, i aj Moab
re' chik i keh naa kitaaq'anik reh taqe re'.
15Eh re' i QaJaaw Dios naa ruchiqsam i palaw ar Egipto.
Eh naa rutaq'aam reje i tz'a'laj teew chinaah i nim aha' Éufrates
ruuk' i re' naa ruchiqsam i wuquub' i q'ab'.
Reh chi re' i tinamit neenkian
ik'ik ar chi ma' naa ta kesam i kixijab'.
16Reh chi naa kireqem kib'eeh i ruqox i rutinamiit noq naa kik'iik ar,
re' taqe i ma' naa ta rusachariik kiwach chupaam i ye'aab' Asiria,
je' rukab' i xub'an i QaJaaw Dios
noq xresaj taqe chaloq i rutinamiit ar Egipto.
Currently Selected:
Isa 11: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
