Hab 3
3
Re' i rutiij xub'an i Habacuc
1Re' wili i rutiij xub'an i Habacuc jalal ruq'oral i Dios:
2QaJaaw Dios noq xb'iraj rib'iral nik' nimaal taqe i
a'nam chaloq xanoq wo' xnuyohleej awach.
Re' hin i nupahqaaj otob'il aweh chi cha a'n
tii quuk' i hoj yu'naak taqe i a'nam chaloq re' re'.
Chaketelaaj tii qawach atoob' ta k'achi' aajosq'iil chi qanaah.
3Re' hin xwilow panusaq wiriik chi chalik i rub'an i
QaJaaw Dios wilik ruSantohiil chupaam i ye'aab'
Temán, chalik i rub'an chinaah i yuuq', Parán.
Eh re' i ruloq'il xk'utinik pan taxaaj,
je' wo' chinaah i wach ak'al.
4Eh sutimaj riij chi saqum,
xa wilik chik i ruch'aab' i saqum i nelik chaloq chupaam kab'chel i q'ab'.
Re' taqe re' ink'uhtanik reh chi wilik rajaawriik.
5Xa re' la' noq komajaa' ink'uloq i QaJaaw peet xik'ik i runimaal yab'ilaal.
Eh noq ik'inaq chik i QaJaaw Dios jinaj chik inchel i runimaal kaq tz'a' xik'ik.
6Eh re' i QaJaaw Dios i rupab'aa' riib' chi rilariik reje i wach ak'al,
re' i nimaq tinamit, inchalik kib'arb'otiik chuwach.
Re' taqe i rax chee' kitoqib'ik chuwach.
Eh re' taqe i yuuq', jumehq'iil i rusach kiwach.
Raaj i ruk'uhb'aal i Dios reh xa wilik wo' chi juneliik.
7Re' hin xwilow noq xkik'ul i ti' k'axik taqe i wilkeeb' ar Cusan.
Eh xwilow noq xakib'arb'otik chik
ruum kiyo'jiik taqe i aj Madián.
8QaJaaw Dios ¿Mi k'ahchi' re' aajosq'iil chinaah taqe i nim ha'?
¿Mi k'ahchi' re' aajosq'iil chinaah taqe i palaw noq xapab'aa'?
Re' hat xa a'n taqe i re',
reh chi xi ik'ik aatinamiit panha' chiriij i kikawayu,
chupaam i kikareta, reh chi ma' xta xi uchjik.
9Re' hat je' naa ruuk' flecha xako'leej taqe.
Eh aq'orom wo' chaloq i korik chi naa ako'leem aatinamiit xako'leej wo' taqe,
xa teh wo' kiik'b'aal panyejaal taqe i nim ha'.
10Eh kiyo'jik chawach taqe i yuuq',
re' hat ti ye'wik chaloq i runimaal jab',
ruuk' i re' xnujik i ha' wach ak'al.
Re' i palaw xan telelinik chik ruum rujosq'iil,
i nelik reje i rub'ohl.
11Eh xwilow chi wilik b'ila' chik panaq'ab' i flecha,
je' wo' i ch'ihch' k'ulq'as xa saqrepik chik i reeh.
Re' i q'iij, i poh xama' kik'uyu'jik ta chik pan kiye'aab' noq xkilow awach.
12Re' hat xayeew aajosq'iil chinaah chu'nchel i wach ak'al,
eh xa yeq'eeb'eej panawooq taqe i tinamit ruum aajosq'iil.
13Re' hat xat chalik chi kiko'ljiik aatinamiit,
chi ruko'ljiik i reey asik'im wach,
ruum i re' xasach kiwach i k'amal kib'eeh i yiib' wach kina'ojb'al,
je' rukab' noq insacharik wach jino'q i paat inyojib'ik haa' i ch'ikaab' reh.
14Eh xayeew q'ab' chi xa ruuk' i flecha xi kanteesjik taqe
i k'amal kib'eeh i soldado.
Re' taqe i wilkeeb' chiriij taqe i kawáyu xkikut kiib' chinaah taqe i tinamit
ma' awach ta inko'linik keh, re' inkaaj i keh
chi naa kisacham wach chi ma' eht'alimaj.
15Re' i hat xayeew q'ab' chi xkiq'at wach i palaw aatinamiit,
chiriij taqe i kawáyu, atoob' ta
xayohb'aal wo' naq chik wach i ha', je' wo' i rupuuh.
16Eh noq xwilow panusaq wiriik taqe re' xinyo'jik,
xama' kinchol ta chik q'orik, xa kib'arb'otiik chik i pan waa'
xama' xta naq chik k'isinoq nukowiil.
Atoob' ta je' re' i k'ahchi' nuk'ulum,
kok'ahchi' wuy-eem ruuk' q'unil chi re' i QaJaaw Dios
naa taqe ruye'em panti' k'axik i ki-ixowinik qawach.
17Eh re' hin ma' k'isiin ta naa rusuuqb'iik nuk'ux ruuk' i QaJaaw Dios,
atoob' ta ma' neenixmak'inik i higo, atoob' ta ma' nee tan wachinik i uuva,
atoob' ta ma' neenwachinik i olivo,
atoob' ta ma' xta chik taqe i tentzun, i wakax pankoraal.
Re' hin xama' naa ta wo' rutib'iik nuk'ux.
18Ma' k'isiin la' naa rusuuqb'iik nuk'ux ruuk' i QaJaaw Dios,
naa rusuuqb'iik nuk'ux ruuk' ruum re' reh waj ko'loom.
19Eh re' i QaJaaw Dios inye'wik rukowiil nuk'ux,
re' reh inye'wik rukowiil taqe i wach nuch'ehk,
reh chi kow kimb'ehik, je' kowiil imb'ehik i keej,
Eh kiruyeew chupaam i ye'aab' aha' ma' xta neenuk'ul.
Currently Selected:
Hab 3: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
