Hab 2
2
Re' i QaJaaw Dios xuchaq'weej i Habacuc
1Re' hin je' wili i xnuq'or:
Re' hin xa eliik naawuy-eem chi na'lik weh,
chi je' jino'q aj cha'joom chinaah i paat inkiko'leej wii' kiib' i tinamit.
Eh naa wilom chib'ih pa' nee kiruchaq'weej
wii' i QaJaaw Dios, ruuk' i xnupahqaaj reh.
2Eh re' i QaJaaw Dios je' wili xuq'or weh:
Chatz'ihb'aaj chuwach i tz'ilom ab'aj i naanuk'uhtaam i aweh panasaq wiriik.
Eh holohik rutz'ihb'jiik cha a'n reh chi neenkireq chiriij i nee ki-ilwik wach.
3Xa re' la' re' i naanuk'uhtaam aweh,
ma' naa ta pee ruk'ulariik chi jumehq'iil,
konaa pee awuy-eem nik'-oq najtiil,
xa re' la' ma' naa tarik'iikwach,
korehtaal ink'ularik noq naaruponiik i ruq'ijiil.
4Re' hat re' naa atz'ihb'aam re' chi re' taqe
i q'e' nimaq kiwach inki a'n kiib' naa kojiik chi re' chi ma' re'.
Re' i korik wach kik'ux ruum chi kiye'em kik'ux
chunimjiik i Dios naa kireqem i juneliik k'acharik, inki.
Re' i ti' k'axik naa ruchaliik chikinaah taqe i yiib' wach kina'ojb'al
5Re' taqe i aj Caldeo je' kikab' i xohk'reel,
xa re' jot'ooj inki a'n q'e' nimaq kiwach inki a'n kiib' ma' nelik ta korik inki a'n
Eh xama' manlojik ta wo' keh inkiq'uch reh i tinamit,
je' kikab' i nimlaj rujuul kamnaq xa uy-inik i rub'an,
je' kikab' i kimik xama' nhi'lik ta chi jumpech.
Ruum aj re' xata wo' jarub' i tinamit inkichop naah.
6Xa re' la' naaruponiik i q'iij noq naakikaqse'ljiik
kuum i tinamit,
je' wili i naa kiq'orom reh pankitz'uuy:
Re' taq i hat aj Caldeo xat b'ehomrik taq ruuk'
i ma' re' ta wo' taq aweh q'e' taq ti' i naa ak'ulum.
¿Kojaruuj i namay taq rumolariik wach
ab'ehomal ruuk' i xa naq'uch taq chaloq? inko'q taqe.
7Re' taq i hat aj Caldeo chi ma' aweht'al taq
naa kojiik k'oloq taq cha naah i xa q'uch taq chib'ih keh.
Eh naa taq ab'arb'otiik ruum ayo'jiik
naa wo' chik kiq'uchum taq aweh
i aq'uchum taq cho keh taq i hat.
8Ruum k'ih seht chi tinamit xa q'uch taq chib'ih keh taq i hat,
naakimolom cho kiib' i keh
chi q'uchariik chu'nchel i chib'ih taq aweh i hat.
Eh naa taq kaat kiye'em chutojariik
chu'nchel taq amahk,
ikaansanik xa a'n taq chupaam taqe i tinamit xa a'n taq wii' ileq'.
9Eh q'e' taq ti' i naa ak'ulum,
ruum i naa nujisaj taq apaat ruuk' i xa inawelq'aaj taq keh i tinamit.
Eh xakapaaj taq i hat chi ruuk' i re' taq naa ako'leem awiib' chuwach i ti' k'axik
10Ruuk' taq i xa a'n re' re' xak'uhtaaj taq kik'ixb'ilaal
awach taq aweh wilkeeb' panapaat.
Eh ruum chi xasach taq wach i hat i ma'
k'isa tinamit naa wo' rusachariik taq awach i hat.
11Eh wita kiq'orik taqe ab'aj ch'ikaab' reh i paat,
eh wita kiq'orik taqe i ruche'el i paat
nee wo' naq inkiq'or i keh chi wilik taq amahk, inki Dios.
12Re' taq i hat q'e' taq ti' i naa ak'ulum
ruum i na a'n taq ikaansanik, ileq',
eh ruuk' i re' inayejaa' taq aatinamiit chi korik.
13Re' i QaJaaw Dios nim rajaawriik je' wili i xuq'or:
Re' hin naanusacham wach ruuk' q'aaq' i chib'ih keh i yiib' wach kina'ojb'al,
re' i xkiq'uhtisaj cho wii' kiib', xama' xta naa rokiik wii', inki.
14Eh naaruponiik i q'iij noq naaruq'orariik i ruq'oral i Dios,
naarunujiik chinaah i wach ak'al,
je' rukab' noq i nujik i palaw ruuk' i nim ha'.
15Eh re' taq i hat inaxohk'riisaj taq i aka'jaah ak'ula't q'e' ti' i naa ak'ulum,
xa xilakeej taq i k'ah laj ha' xayeew taq keh chi uuk'jik,
reh chi xkik'uhtaaj kik'ixb'ilaal.
16Eh naa wo' kesam i runimaal taq awach i hat, naa wo' kik'uhtaam taq ak'ixb'ilaal,
ruum re' i QaJaaw Dios naa ruye'em i ti' k'axik taq cha naah,
je' naa k'ah laj ha' i naa ruye'em taq aweh chi uuk'jik.
Naa reh teesjiik taq i runimaal awach.
17Re' i yiib' wach na'ojb'al xa a'n taq Líbano naarusutiniik cho cha naah taq i hat,
i kikantesjiik taq i kichikoop taq xa a'n.
Re' taqe i re' naa taq atojom wach,
naa ruchaliik i ti' k'axik taq cha naah ruum ikaansanik taq a'nam,
ruum taqe i yiib' wach taq xa a'n chupaam i tinamit
noq xa a'n taq chaloq i leq' chupaam taqe i ju'jun chi tinamit.
18¿Chib'ih kamaj i tiyoox i xa hat taq titz'aqwik reh?
¿Mi wilik rajaawriik re' taq aadios
xa haab'isamaj xama' kiq'orik ta wo' hoq?
Re' taqe re' xa pan chukuj q'orik kik'amwik.
¿Nik' wach noq inayeew taq ak'ux chikinaah i xa winaq kitz'aqwik reh?
19¿Chib'ih reet noq inaq'or taq reh i tiyoox chee'
chi naarik'raam riib', eh naq'or taq reh i tiyoox ab'aj chi naa rupahiik johtoq?
Re' re' xama' nee ta wo' kiq'orik ruum xama' k'achalkeeb' ta wo' hoq,
atoob' ta naq iq'omamaj kiwach chi oro, chi plata.
20Eh re' i k'achlik Dios reh wilik chupaam i ruSantolaj paat,
Eh xanoq wo' intz'aplojik kichii' chuwach chu'nchel i wilkeeb' wach ak'al.
Currently Selected:
Hab 2: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.