Ez 37
37
Juntzan takin bak
1Max yaon oc Jehová is k'ab wiban, axa Yespíritu max ak'on wila' axca tol ayin ec' bay jun jobe bay bulan ay juntzan bak. 2Max in yikban ec' Jehová bay xolak juntzan bak tu' max wila'; nojnak el masanil bay yul jobe tu' yuj takin bakil camnak; xiwilxa bak, palta caw wal takinxa. 3Cax max yalon ayin axca ti': ¿Ach anima, chi mi je' yiquisbi aj juntzan takin bak ti' junelxa? ẍi. Cax max in tak'wi axca ti', max waloni: Mamin Jehová Wajawil, asannej ach ojtak, quin chi.
4Max yalon Jehová ayin axca ti': Alil in k'anej bay juntzan bak ti', cax chalon axca ti': Ex takin bak, abek k'anej Jehová ti'. 5Axca wal ti' yalon Jehová Cham Yajaw: Ok wak' e yi' e cak'ek' junelxa, cax ok ex iquisbok pax ajok. 6Ok e nublej pax e ba, cax ok ex wak'on noj yuj e chibejal junelxa, axa yoc pax e tz'umal e yin cax ok wak' e yion e cak'ek', axa e yiquisbi aj junelxa tu'. Axca wal tu' ok yun e yojtaknen elok tol ayin ton Jehová in, ẍi Cham, cachi, ẍi Jehová ayin. 7Ti wal max wal juntzan k'anej ti' axca wal max yun chekon Cham wala'. Yak'ban chin k'anjabi, max waben bil jun tzet yetal, ti tol quixcab max eq'ui, axca tu xin max c'oli junanen oc ba juntzan bak tu'. 8Cax max wilon xin, tol mayal junanej oc ba juntzan bak tu', ayxa oc tx'anil, yetok chibejal, c'al tz'umal yin. Asan xin, c'amto chi yi' eb cak'ek'.
9Cax max wab yalon Cham ayin axca ti': Ach anima, alil in k'anej bay cak'ek', cax chalon bay axca ti': Axca wal ti' yalon Jehová Cham Yajaw: Ach cak'ek', titan bay masanil yulyibank'inal, cax occan yin juntzan mimanilej camnakxa ti', yet chi iquisbi aj eb, ẍi Jehová, cachi, ẍi Cham ayin. 10Max wal is k'anej Cham axca max yut yalon ayin tu', axa jayoc cak'ek' yin juntzan mimanilej tu', axa yaj wan eb tu'. Caw wal xiwil eb, axcaxa yilitok junok miman bulan soldado.
11Catatu' max yalon Jehová ayin: Ach anima, a ayex conob Israel ex ti', lajan ex axca juntzan bak ti'. Che yal axca ti': Takinxa co bakil, c'amxa tzet ayoc yipok co c'ul, mayal on c'ayilok, quex chi. 12Yuj tu xin, alil in k'anej bay eb et conob axca ti': Axca wal ti' yalon Jehová: Ex in conob, ok in jak e mukbanil; ok ex wieltek bay tu', cax ok ex wak'on meltzoj bay e conobal. 13A yet ok in jakon e mukbanil tu', cax ok ex wion eltek, ok e yojtaknej el ayex in conob ex ti', tol ayin ton Jehová in. 14Ayin caw chi wala' tol ok waoc Wespíritu e yin, axa e yiquisbi ec' tu'; axa ex wak'on cajay ec' junelxa bay e tx'otx' tu'. Axca tu' ok yun e yojtaknen elok tol ayin ton Jehová in. A tzet chi wal ti' ok wak' yunej, ẍi Jehová, cachi, ẍi Cham yin tzet max yak' wil tu'.
Is junanebilal conob Israel yetok Judá
15Max k'anjab Jehová ayin max yalon axca ti': 16Ach anima, say cabok te te', cax cha tz'iben oc yin junok axca ti': Tx'oxbanil Judá, c'al eb yet israelal ajun eb yetok, cha tz'ibej. Lajwi tu', cax cha tz'iben pax oc yin junxa te', a ton te te' yet Efraín axca ti': Tx'oxbanil José, yetokc'al masanil eb yet israelal ajun eb yetok, cha tz'ibej. 17Chi lajwi tu', cax chak'on chalej ba txam te' yul a k'ab, axca tol junnej te'. 18A yet ok k'anlen eb et conob ayach axca ti': Al wal ayon tzet yelapnok jun ti', ta ẍi eb, 19cax chalon bay eb axca ti': Axca wal ti' yalon Jehová Cham Yajaw: Ok wiaj te te' yet José, te' ayoc yul is k'ab Efraín, c'al juntzanxa tribual Israel ayoc yetok, cax ok in junanen yetok te' yet Judá, cax junxanej ok wut cab te' tu' yul in k'ab, ẍi Cham, cachi bay eb. 20Satak wal eb, cax cheon aj te te' tu' cabil, a ton te' bay max ach tz'ibli oc tu'. 21Lajwi tu' cax chaloni: Axca wal ti' yalon Jehová Cham Yajaw: Ok ex wieltek ayex Israel ex ti' bay xolak juntzanxa nacionlak bay max quex apni ocok. Tzanc'al bay ay ex ec'ok ok ex in wajbajtek, cax ok ex wak'on meltzoj bay sat e tx'otx' junelxa. 22Cax junxanej nacional ok ex wut yin e tx'otx'al bay siquilal tx'otx', cax junxanej e reyal ok waocok. C'amxa yechel ok ex pojchajtok. Manxa cabok nación ok e yunej. 23Manxa ok e yetnejtok e ba yetok juntzan e comon dios tol yajbejtak tu', tamwal yetok junokxa makan yobtakilal max e yun yet yalan. Yujtol ok ex in colcan el bay e tenomtakil, ok ex in sakbanej elok. In conob ok e yuncanok, ayinxa e Diosal in. 24A ton in chekbej David ok oc e reyalok c'al e yilomalok e masanil, axa e yiken in chekbanil c'al in ley tu'. 25Axa e cajay bay jun nación max wak' bay in chekbej Jacob, a ton bay max ayji ec' eb e yichmam. A bay tu' ok ayjok eb e yuninal, c'al masanil e yinatil yin tojbalk'inal; axa in chekbej David ok occ'al e yajawilok. 26Ok wak' in trato e yetok, yet watx' ok ex ayjok ec' yin tzalojc'ulal. Yin junelnej ok in watx'nejcan jun in trato tu' e yetok. Ok wion aj can e bisil, cax yin tojbalk'inal ok ayjok ec' in templo e xol. 27Ok in cajay ec' e nan e xol, tol e Diosal in, axa ayex ti' in conob ok e yuncanok. 28Ok ayjok ec' in templo tu' e xol yin junelnej, axa masanil juntzanxa nacionlak, ok nachaj el yuj, tol sic'bil ex el wuj yet chex occan wetok, ẍi Jehová, cachi, ẍi Cham.
Currently Selected:
Ez 37: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
