Ez 36
36
A conob Israel ok aj can yet yajtok tu'
1Ach anima, alcan el in k'anej yin siquilal tx'otx' yul yet Israel. Al axca ti': Yabokab is k'anej Jehová. 2Ayin wal Jehová Yajaw in chi wala': Max na' eb ajc'ul oc yin Israel, tol yet-xac'al eb masanil juntzan payxail witz tu'. 3Yuj tu xin, alil in k'anej ti': Axca wal ti' yalon Jehová Cham Yajaw: A yet max yion juntzan tx'ok nacional juntzan siquilal tx'otx' bay yul yet Israel, cax max yelk'anentok eb tzetak yetal ay bay tu', max buchwaj eb yin Israel. 4Yuj tu xin, abek wal is k'anej Jehová Cham Yajaw yin siquilal tx'otx' yin tzalanlak, c'al yin jobelak, yetok yin conoblak uchbilxa ayok, tol tz'ininixac'al yayjican bay Israel, a ton juntzan conoblak elk'anebiltok tzet yetal ay bay, c'al buchbejal yayji yuj eb conoblak ay bay is cawilal. 5Yuj tu', axca ti' chi yun waloni, yuj yowal in c'ul yin juntzanxa conoblak, mawal axca yin conob Edom: Yinxac'al tzalojc'ulal max yun e yoc yin in conob, yetokxac'al e chichonc'ulal max e yioncan tx'otx' tx'otx' bay lobal is jobbejal no' eb, ẍi Jehová, cachi.
6Alil in k'anej ti' bay eb israel: Caywal ti' yalon Jehová Cham Yajaw yetok yowal c'ul. A wal juntzan nación tu', max buchwaj eb yin siquilal tx'otx', yin tzalanlak, yin jobelak c'al yin pac'anlak. 7Yuj wal tu xin, ayin Jehová Yajaw in ti' chi wak' in ti', tol a juntzan nacionlak tu', yowalil ok buchlay c'apaxok. 8Axa pax bay juntzan siquilal tx'otx' yul makbej e conobal, xiwil mimek awoj telak ok ch'ibajok, yet ok e lo sat te', yujtol toxa ok ex meltzojok. 9Ayin ok in taynej awoj tu', ok wak' yunej tol ok tzoc'lay ajok, c'al yawlay ayok. 10A ayex ok ex cajay bay tu', ok wiaj can e bisil. Ok nojil e conoblak tu' e yuj, axa bay max uchchajtok conob tu xin, ok ca watx'nelay ajok. 11Ayin ok ex wiaj can yetokc'al e jobbejal no', yelxac'al ok aj can e bisil. Xiwil ex ok ex cajay bay tu', axcata' yayji yet yalantok, yelxac'al watx' ok e yun e yayji yintak yet yalantok. Caywal tu' ok yun e yojtaknen elok, tol ayin ton Jehová in. 12A wal ok wutej, tol ok ex ec'jab bay siquilal tx'otx', cax ok e yion pax e satak junelxa bay tu', c'amxa yechel ok c'ayaj e yuninal bay siquilal tx'otx' tu'.
13Ayin wal caw Jehová Yajaw in chi wala': A eb anima bay juntzanxa nación, chi yal eb tol chi c'ayaj eb anima, c'al yuninal bay siquilal tx'otx' yul yet Israel. 14Yuj tu' xan ayin caw ok wak' yunej, tol manxa ok yun axca tu'. 15Ayin caw chi wala', tol manxa ok buchwaj juntzan nación yin tx'otx'al Israel, tamwal yalon eb yobal k'anej yin, yujtol manxa ok c'ayil anima bay tu', ẍi Jehová, cachi, ẍi Cham.
16Max k'anjab Jehová ayin, max yaloni: 17Ach anima, a yet cajan eb et israelal bay is tx'otx'al yet yalantok, max yetnejtok eb is tx'otx'al tu' yuj is yob beybalil. Yujtol a is beybal eb, caw wal yajbejtak yul in sat. 18Yuj wal tu' xan max watok yowal in c'ul yiban eb, yuj is mak'om cam animail eb bay yul is conobal tu', c'al yuj jantak yobtakilal max el yunen eb tol max oc eb yin ayilal bay comon dios. 19Yuj wal e yaben yail yuj e yobtakilal tu' xan max ex in saklemnejtok bay xolak nación. 20Palta a bay masanil conoblak, bay max ex apni ocok, yobc'al max yun in binaji, yujtol max yal eb anima axca ti': A juntzan ti' conob Jehová eb, palta ilab tol max ilay el eb bay is conobal, ẍi eb. 21Yuj tu' xan caw wal yob max wabej tol yuj wal in conob xan caw wal yobxac'al chi yun in binaj bay xolak nación bay max ex apnic'al ocok.
22Yuj tu xin, al bay eb et conob Israel: Axca wal ti' yalon Jehová Cham Yajaw: A tzet ok wunej, man e yujok ayex israel ex ti' ok wunej, palta a wuj ayin ti', yujtol e yuj xan yob max yun in binaj xol juntzan nacionlak bay max quex apni oc tu'. 23Ok in tx'ox wal in mimanbilal satak juntzan nación max alon yobal k'anej win e yuj ayex ti'. Ayin wal caw chi wala', tol a e yin ayex ti' ok in tx'oxil in mimanbilal satak eb. Catatu' ok nachaj el yuj eb tol ayin ton Jehová in. 24Ayin ok ex wieltek bay xol juntzanxa tx'ok nacional tu'; cax ok ex in wajban ocok, axa ex wiontok bay e tx'otx'al tu' junelxa. 25Ok ex in sakbanej yetok sak aej, cax ok in tx'ajon el e yobtakil, axa sakbican el e yobtakil yin e yak'on ayilal bay juntzan comon dios. 26Ok waoc jun ac' nabalej e yin yin in q'uexon e c'ulbal. Ok wiel jun nabalej pit ayoc e yin, cax ok waon oc ikemal e yin. 27Axa waon oc Wespíritu e yin tu', yuj e yiken in chekbanil, c'al in ley. 28Ok ex ayjok ec' bay jun nación max wak' bay eb e yichmam, in conob ex ayex ti', ayinxa e Diosal in. 29Ayin ok ex in taynej, yet watx' manxa ok e yetnejtok e ba bay juntzan tzet yetal chex etnentok tu', cax ok wion aj can sat e yawoj trigo, c'amxa yechel ok waoc wajil e yiban. 30Xiwil sat te awbejal te' ok yak' wuj, yet watx' c'amxac'al q'uixawil ok jayoc e yiban satak juntzanxa nacionlak yuj wajil. 31A yet ok e naontek e yob beybalil ma e mul, ayexc'al oc ok ex q'uixwok aj yuj. 32Ayin wal caw Jehová Yajaw in chi wala'. Ojtaknejek el ex israel, man yujok tol watx' ex xan chi wun jun ti'; palta e moj wal e q'uixwi aj yuj e yob beybalil.
33Ayin Jehová Yajaw in chi wal axca ti': A wal yet ok wion el e yobtakil, axa ex wak'on ayjok bay e conobal tu', cax ok e ca watx'nen ajok. 34A tx'otx' tx'otx' max can yin tz'inanil tu', ok awlay awoj bay junelxa, cax ok yilon eb anima ok ec' bay tu', tol ayxa oc awoj. 35Cax ok yalon eb axca ti': A jun tx'otx' ti', max can yin tz'inanil, axa tinani' ayxa awoj chi jila', axcaxac'al yili Edén; a juntzan conoblak lajwinakxa ayok, toxac'al uchquiltak max yuncantok; axa tinani', caw wal watx'xa yayji, cajanxa anima bay, ẍi mi eb. 36Axca tu xin, a juntzanxa nacionlak okto cancan bay cawilal tu', ok yojtaknej el eb tol ayin caw Jehová in chin ca watx'nej aj tzet uchchajnaktok, c'al wawon junelxa tzet yetal tol ocbilajok. Ayin wal caw Jehová in chi wala', cax ok yunen tzet chi wal ti'.
37Ayin wal caw Jehová Yajaw in, chi wala': Ex yinatil Israel, ok wak' pax junelxa tzet yetal ok e k'an ayin. Ok wiaj can e bisil axca chi yun yaj can bisil no calnel. 38A juntzan conoblak lajwinak ayok, ok nojil yuj anima, lajanxac'al yili yec' anima axca yec' nililok no calnel chi ilay jay yin xajanbalil bay Jerusalén yet k'in. Axca tu' ok yun e yojtaknen elok tol ayin ton Jehová in, ẍi Jehová, cachi, ẍi Cham.
Currently Selected:
Ez 36: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
