Pro 1
1
Ri rejqalen ri etamabel-tzij
1Re etamabel taq tzij re' e richin ri Salomón, ri ruk'ajol kan ri David y rey pa ruwi' ri tinamit Israel.
2Re etamabel taq tzij re' richin chi ri wineq nril na'oj y etamabel,
richin chuqa' chi ri wineq niq'ax chuwech ri ch'abel ri nima'q ye'el-wi.
3Re' kan richin k'a chi ri wineq nik'ase' rik'in etamabel
nik'ase' pa ruchojmilal, utz y kan pa rubeyal nuben kik'in konojel.
4Re' chuqa' kan richin chi ri maneq ok ketamabal ye'ok nowineq,
richin chi ri k'a e ak'uala' na nik'oje' ketamabal y nikiya' rukojol ri utz y ri man utz ta.
5Ri aj-na'oj ri kan nrak'axaj re', ri retamabal nibe más pa jotol,
y ri kan niq'ax chuwech, kan xtretamaj k'a ri achike ruk'amon chi nuben.
6Richin chi ri wineq ri' niq'ax chuwech ri etamabel-tzij y ri ye'el chi tzij,
richin chuqa' chi xtiq'ax chuwech ri kitzij ri aj-na'oj
y nitikir nusol-rij ri etamabel ri e tz'apel chupan ri tzij ri'.
7Ri wineq ri kan k'o rukiy ri Dios chuwech,
chiri' k'a xtipe-wi ronojel ri runa'oj ri nik'atzin chire.
Jak'a ri wineq nakanik kan nrixowaj ri na'oj y ri tijonik.
Pixabanik chike ri alk'ualaxela'
8Kan jebel k'a tiya' ixikin rix alk'ualaxela', chire ri tijonik richin ri itata',
y man tiwixowaj ri nuk'ut chiwech ri ite'.
9Roma re' kan xke'ok jun wiqobel ri nik'oje' pan ijolon,
kan xke'ok k'a chuqa' achi'el jun ichinaj ri nikiwiq jebel ri ruwa taq ik'u'x.
10Rix alaboni', wi ri e banoy etzelal nikajo' chi yixok ta kachibil,
rix kan man tiwajo' chi yixbe kik'in.
11Rik'in juba' nikibij chiwe: Kixanpe qik'in,
tiqabana' jun pikbel y achike na k'a wineq xtiqaqa chupan,
y ri nakanik ri xtiqaqa chupan, xtiqakamisaj.
12Xa jubeq' k'a xtiqabanala' chike ri winaqi', achi'el nuben ri jul chike ri ch'akulaj e kaminaqi' chik.
Xa kan chi tz'aqet xkeqabeq', achi'el toq k'o jun ri nitzaq pa jun jul.
13Rik'in re', kan k'iy k'a ruwech chi beyomel xtiqak'en kan chuwi-kiq'a',
y ronojel re xtiqak'en chuwi-kiq'a' rije', kan xtunojisaj ri qachoch.
14Kixanpe k'a qik'in y tiqatejtobej ronojel,
y chuqa' xaxe jun xtiqaben chire ronojel ri xtiqil chiqajujunal, xkecha' chiwe.
15Jak'a rix alaboni', kan man k'a ke'itzeqelibej rije' chupan ri bey ri kik'uan,
xa kan tijech'ej kan iwi' chire ri kibey rije'.
16Roma rije' kan e anineq chubanik ri etzelal,
y kan e anineq chuqa' chubanik kamik.
17Ri pikbel ri nikiya' rije' chiwech man nik'atzin ta, roma kan q'alaj-wi jebel.
18Y man ketaman ta chi xa ja rije' xkeqaqa chupan ri pikbel.
Xa kan ja ri kik'aslen rije' ri xtapon ri pa kamik.
19Kan k'a chiri' k'a ye'apon-wi ri winaqi' ri janila eleq' kibanalon,
kan jari' ri xtelesan ri kik'aslen.
Man tawetzelaj ri na'oj
20Ri na'oj xa kan nuben achi'el jun wineq, nisik'in ri pa taq bey.
Ri na'oj kan rik'in uchuq'a' nich'on, ri akuchi nikimol-wi-ki' ri winaqi'.
21Ri na'oj kan ja ri pa ruwi' ri tz'aq kow nich'on-pe,
y ri akuchi k'o-wi ri okibel richin ri tinamit chiri' nuya-wi rutzijol.
22Rix ri kan man k'iy ta ok iwetaman, ¿kan jantape' k'a xtiqa' chiwech chi man k'iy ta iwetaman?
Rix ri xa maneq ik'ix, ¿kan jantape' k'a xtiqa' chiwech ri xa k'ixbel chikiwech ri winaqi'?
Rix ri nik'atzin chi k'o ta iwetamabal, ¿kan jantape' k'a xtiwetzelaj ri etamabel?
23Y wi rix kan nitzolin k'a pe ik'u'x wik'in roma re yixinch'olij,
yin kan xtinben k'a chi xtok ri nu-espíritu ri pan ik'aslen
y chuqa' kan xtinbij k'a chiwe ri ch'abel ri ninwajo' chi ninya' chiwe.
24Jak'a rix xa man yiniwak'axaj ta,
kan man jun nuben chiwe toq yin ninyuq nuq'a' richin chi yixinto',
25rix xa nijech'ej kan ri pixabanik ri ninya' chiwe,
y xa niwetzelaj ri ch'olinik ri ninben chuqa' chiwe.
26Xa roma ri' toq yin kan xkitze'en k'a chiwij toq xtiqaqa ri ruk'ayewal pan iwi',
y xkixinyojobej toq xkixapon chupan ri xibinri'il ri xa man iwoyoben ta.
27Kan xkitze'en k'a chiwij toq xtiqaqa ri tijoj-poqonal pan iwi', achi'el jun nimalej kaq'iq',
xkitze'en k'a chiwij toq xtipe ri wululen chiwij, achi'el jun surkum ri yixrumes-el,
xkitze'en k'a chiwij toq xtipe kamik y jalajoj ruwech oyowal pan iwi' y kan xtuqasaj iq'ij.
28Y jari' toq rix kan xkiniwoyoj richin yixinto', jak'a yin man xkiniman ta chiwe;
k'ari' toq rix xkinikanola' y xa man xkiniwil ta chik.
29Y kere' xtik'uluwachij roma xa xiwetzelaj ri tijonik,
y roma chuqa' kan maneq chik rukiy ri Dios chiwech.
30Chuqa' roma ri man jun rejqalen xiben chire ri pixabanik ri xinya' chiwe,
y kan xiniwetzelaj toq yin xixinch'olij.
31Rix xa kan xtik'ul yan k'a ri ruk'amon chi nik'ul roma ri itzel ibanobal,
y roma kan janila k'iy ruk'exel ri itzel pixabanik ri xtik'ul, kan xtik'o ik'u'x chire.
32Roma ri wineq ri man k'iy ta retamabal y man niniman ta tzij, xa jari' ri xtikamisan richin,
y ri maneq runa'oj y nuben ri achike niqa' chuwech rija', ruyon rija' nuqasaj ruq'ij.
33Jak'a ri wineq ri kan nuben ri nubij ronojel re na'oj re', kan kuqul k'a ruk'u'x xtik'ase',
kan k'o k'a uxlanen pa ruk'aslen, y man nuxibij ta ri' chi k'o ta nuk'uluwachij.
Currently Selected:
Pro 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.